Read Sukuma Bible 2015 – Bibilia Ilagano Lya Kale 2015 Wandijo 40 Bible Online

Wandijo 40 - Sukuma Bible 2015 – Bibilia Ilagano Lya Kale 2015 bible

Wandijo 40

¹Hanuma y'ikanza ū mu shikū jenījo, batūmami ba ntemi wa Misili, ng'winhīlīja wa shakūng'wa na nzugi wa migatī, būnsaayīcha ū saabo būgonzo, ū ntemi wa Misili.

²Ū Falao ūbapelanīla no a batūmami bakwe benabo; ū ntaale wa binhīlīja ba shakūng'wa, nū ntaale wa bazugi ba migatī.

³Ūbaponya mu jeela, ū mu numba ya ntaale wa balang'hani; ū mu jeela īyo walī afungilwe nū Yosefu.

⁴Ū ntaale wa balang'hani ūbatūūla mu makono ga ng'wa Yosefu; ūbiza nang'hani wabo; bikala mo ikanza ilebe ū mu jeela yenīyo.

⁵A banhū benabo aho balī ū mu jeela, lūshikū lūmò aho balaalile ī būjikū būloota shilooti; būlī ng'wene shilooti shakwe, ū ng'winhi wa shakūng'wa nū nzugi wa migatī, nīyo būlī shilooti shaalī na makūlū gasho.

⁶A ha ntondo yaho ī dilū ū Yosefu wiza ū kūbalola, ūbabona bazongaga no.

⁷Ūbabūja a batūmami ba ng'wa Falao benabo, abo baalī baafungwa hamò nang'hwe ū mu numba ya ng'wa ise būgonzo, ūhaya, “Bing'we nibūlī lelo būzongile gīko ū būshū wing'we?”

⁸Būng'wīla, “Twalootaga shilooti, alīyo tūtī na munhū wa kūtūshomelegeja.” Ū Yosefu ūbawīla, “Ū nīmo gwa kūshomeleja gūtī gwa ng'wa Mulungu? Aliniwīlagi ī shilooti shing'we.”

⁹Ū ntaale wa binhīlīja ba shakūng'wa ūnootoolela ū Yosefu ī shilooti shakwe. Ūng'wīla, “Ū mu shilooti shane, naalī nabona nzabibu ū kū būtongi wane.

¹⁰Ū nzabibu gwenūyo gwalī na matambī adatū; kwimanīla gwandya kūfuluma, hūna gūlaba, gūtwaja na matwajo; haho na haho a matwajo gūpya.

¹¹Ī shikombe sha ng'wa Falao shalī ū mu nkono gwane, nūsola matwajo nūbeeja divai nītūūla ū mu shikombe sha ng'wa Falao, nūng'winha mu nkono gakwe.”

¹²Ū Yosefu ūng'wīla, “A makūlū gaho galī gīkī, a matambī ay'adatū jene shikū idatū.

¹³Ūlū jilabīte shikū idatū, ū Falao akūkwīnja ū mu jeela akūshoshe a ha nīmo gwako, wandye hangī ū kūng'winhīlīja ū Falao ī shikombe gīt'umo wītīlaga ī kwandya, aho walī ng'winhīlīja wa shakūng'wa.

¹⁴Ali lūūlū, ī mihayo yako ūlū īlabeele, nizūkagwe nane ūnīītīle yawiza; ūng'wīle ū Falao ī mihayo yane ūnīnje ū mu jeela yenīyī.

¹⁵Nguno ū nene nenhwa ū kūūnū bo nguzu kūfuma kū sī ya Bahebulania; nūūlū ī haha natīītile mhayo gose gose gwa kwigeleelwa kūnenheleja kūponyiwa mu jeela.”

¹⁶Ū ntaale wa bazugi ba migatī aho wabona gīkī a makūlū ga shilooti gabeela, ūng'wīla ū Yosefu, “Ū nene nane nalootaga gīkī, naalī na malangahe adatū ga migatī nagidīīkile kū ntwe.

¹⁷Ū ng'wilangahe ī lya higūlya shalīmo shilīwa sha ng'wa Falao, sha būlī mbika shikalangilwe chiza chiza, alīyo ī noni jalūshilyaga, ū ng'wilangahe aho līl'ū kū ntwe gwane.”

¹⁸Ū Yosefu ūng'wīla, “A makūlū gaho galī gīkī, a malangahe ay'adatū, jilī shikū idatū.

¹⁹Ūlū jilabīte shikū idatū, ū Falao akūkwīnja ū mu jeela, akwīngīje ū ntwe gwako, ūningelejiwe mu līntī, hūna ī nyama ya mīlī gwako īkūgombagūlwa noni.”

²⁰Ū lūshikū lwa kadatū lwaho lwalī lwa kwizūkwa kūbyalwa kwakwe ū Falao; ūbabeegeja shigukulu pye a batūmami bakwe a bataale. Abo walī wabaponya mu jeela ūbafunya mo, ū ntaale wa binhīlīja ba shakūng'wa, nū ntaale wa bazugi ba migatī.

²¹Ū ntaale wa binhīlīja ba shakūng'wa ūnshosha a ha nīmo gwakwe, wandya hangī ū kūng'winhīlīja ū Falao ī shikombe.

²²Alīyo ū ntaale wa bazugi ba migatī, ūmūlaga gīt'umo walī wabashomelegeja dūhū ū Yosefu.

²³Kwike ū ntaale wa binhīlīja ba shakūng'wa atang'wizūkilwe ū Yosefu, akang'wība gete.