Read Sukuma Bible 2015 – Bibilia Ilagano Lya Kale 2015 Wandijo 41 Bible Online

Wandijo 41 - Sukuma Bible 2015 – Bibilia Ilagano Lya Kale 2015 bible

Wandijo 41

¹Aho yabīta myaka ībīlī migima, ū Falao ūloota shilooti wīmīīlaga bbihī na mongo gwa Nile.

²Kwimanīla jafumbūka ng'ombe mpugatī kūfuma ū mu mongo gwenūyo, jikūdīīmaga madete; jalī ng'īnu no hangī jawiza kīngī nasho.

³Hanuma na ng'ombe jingī mpungatī jūfumbūka kūfuma ū mu mongo gwa Nile gwenūyo; ī jene jalī dīīda jabūbi no, hama ngombooku kūheeba, jūshika jīmīīla a ha lūgegu lwa mongo bbihī nī jawiza.

⁴Ī ng'ombe ījo jalī dīīda na ngombooku, jūjilya ījo jalī ng'īnu na jawiza. Ū Falao ūbbamhuka ū mu tūlo.

⁵Yūmīta hangī ī tūlo, ūloota hangī lūkangala lwa kabīlī; ūbona mangala mpungatī ga būsīga gahoolile kūfuma h'itina līmò, gaalī mataale, nī mbeke jago jawiza no.

⁶Hanuma ūbona na mangala gangī mpungatī ga būsīga, nago gahoolile kūfuma h'itina līmò; a gene gaalī manyalīīzu, na gakalamuchiwe lūyaga lo kīya!

⁷A mangala mpungatī ayo gaalī manyalīīzu, gūgalya a mangala mpungatī a mataale, ayo gaalī na mbeke jawiza. Ū Falao ūbbamhuka hangī ū mu tūlo; ūbona gashi shilooti dūhū!

⁸Alīyo aho weela ī dilū, akakoya no ū mu maganiko; hūna ūbalagīlīja bize pye a bachūūja[77] na a bachembi ba ngoko ba mu Misili. Ū Falao ūbasomboolela ī shilooti shakwe, alīyo atilongile nūūlū ūmò wabo, wa kūdūla kūnshomelegeja ī shilooti shenīsho.

⁹Ī likanza lyenīlo ū ntaale wa bang'wisha ūng'wīla ū Falao gīkī, “Lelo nawizūkwa ū būhūbi bone.

¹⁰Makanza malebe ū Falalo walī wabapelanīla a batūmami bakwe; ūniponya mu jeela ū nene nū ntaale wa bazugi ba migatī, tūlugalīlwa mu numba ya ntaale wa balang'hani.

¹¹Lūshikū lūmò mu būjikū tūloota, būlī ng'wene shilooti shakwe na makūlū gasho.

¹²Ū mu jeela ng'wenūmo akasangwa alīmo na nsūmba Ng'hebulania, ntūmami wa ntaale wa balang'hani; kwike nang'hwe walī mfungwa ng'wichiswi. Ū nsūmba ng'wenūyo aho twanootoolela ī shilooti shise, ūtūshomelegeja a makūlū gasho; būlī ng'wene na makūlū ga shilooti shakwe.

¹³Na ng'hana pyī īkashikīīla ūmo akatūshomelegeja, gūtalebile ho nūūlū gūmò; ū nene nūshoshiwa a ha nīmo gwane, ū ng'wichane ūbūlagwa.”

¹⁴Hūna ū Falao ūlagīja ī likanza lyenīlo enhwe ū Yosefu; haho na haho ūfunyiwa ū mu jeela. Aho wamala kūmooga ndezu ūzwala na myenda yīngī, wiza ū kūlī Falao, ūshika wīmīīla kū būtongi bokwe.

¹⁵Ū Falao ūng'wīla gīkī, “Naalootaga shilooti, kwike atīho nūūlū ūmò wa kūnishomelegeja. Alīyo nigwaga gīkī, ū bebe ūlū ūshiigwa ī shilooti, ūkashideebaga washishomeleja.”

¹⁶Ū Yosefu ūnshokeja ū Falao ūhaya, “Ū nene natūgūdūla ū mhayo gwenūyo, alīyo ū Mulungu hū ng'wene akūng'winha ū Falao ishosho lyawiza.”

¹⁷Na lūūlū ū Falao wandya kūnootoolela ū Yosefu; ūng'wīla, “Ū mu shilooti shane, naalī nīmīīlaga bbihī na ngegu ja mongo gwa Nile,

¹⁸kwimanīla ū kūfuma ū mu mongo ng'wenūmo, jafumbūka ng'ombe mpugatī ng'īnu jawiza, jikūdīīmaga madete.

¹⁹Hanuma jūfumbūka na ng'ombe jingī mpungatī kūfuma ū mu mongo gwa Nile gwenūyo; ī jene jalī dīīda jabūbi no, hangī ngombooku kūheeba. Nataalī kūbona na kamò ng'ombe jabūbi gīko pye a hose ū mu sī ya Misili.

²⁰Ī ng'ombe ījo jalī dīīda na ngombooku, jūjilya ī mpungatī ī ja kwandya, ījo jalī ng'īnu na jawiza.

²¹Alīyo nūūlū aho jajilya, jikikala ngombooku dūhū, walī atīho wa kūdeeba gīkī jajilyaga; nguno jalī jitaalī jabūbi dūhū, gīt'umo jalī ī kwandya. Hūna nūbbamhuka ū mu tūlo.

²²“Ū mu shilooti shane, naalī nabona na mangala mpungatī ga būsīga gahoolile kūfuma h'itina līmò, mataale ga mbeke jawiza no.

²³Hanuma nūbona na mangala gangī mpungatī ga būsīga, nago gahoolile kūfuma h'itina līmò; a gene manyalīīzu, gakalamuchiwe lūyaga lo kīya!

²⁴A mangala mpungatī ayo gaalī manyalīīzu, gūgalya a mangala mpungatī a mataale, ayo gaalī na mbeke jawiza. Na lūūlū naalī nabawīla a bachūūja, alīyo atigelile nūūlū ūmò wa kūniwīla a makūlū gaho.”

²⁵Hūna ū Yosefu ūng'wīla ū Falao gīkī, “Ī shilooti sha ng'wa Falao shilī sha mbika īmò nguno shilī shimò dūhū. Ū Mulungu wang'olekejaga ū Falao mhayo ūyo alīhaya kūgwīta.

²⁶Ī ng'ombe jawiza ījo mpungatī jilī myaka mpungatī; na a mangala ga būsīga ayo mpungatī a gawiza nayo mpyaka mpungatī. Ī shoi shilī shilooti shimò dūhū.

²⁷Ī ng'ombe mpungatī ī jabūbi ījo jalī jafumbūka ha numa, īlī myaka mpungatī; pye na a mangala a manyalīīzu ayo gakalamuchiwe lūyaga lwa kīya, ī yenīyo myaka mpungatī ya nzala.

²⁸H'ūmo nalīng'wīlīla ū Falao, gīkī ū Mulungu wang'olekejaga ū Falao mhayo ūyo alīhaya kūgwīta.

²⁹Īliza myaka mpungatī ya mbooto nūlūmhona[78] nhaale hose pyī ū mu sī ya Misili;

³⁰alīyo a ha numa yaho īkwiza myaka yīngī mpungatī ya nzala. A henaho pyī ī mbooto nūlū mhona ya mu Misili īkwīwa; hama ī nzala īkwīkenaagūla no ī sī.

³¹Ndūhū wa kūyizūkwa nūūlū ūmò ī mhona ya mu sī; nguno ī nzala īyo īkūkūūbīja īkūbiza nhaale no.

³²Ī shilooti shenīshi wenhelagwa ū Falao mu mbika ibīlī kūlwa nguno ū mhayo gwenūyū gwafunyiwe na Mulungu; hama nīyo ū Mulungu akūgūshikīlīja wangū.

³³Na lūūlū ī haha ni yabeelela ū Falao asole munhū wa masala na ng'witegeleja, antūūle kūbiza ntaale ū mu Misili.

³⁴Hanuma ū Falao atūūle na bambīlīja hose pyī ū mu sī yenīyī; balayūsola īmò y'itanò ya shilīwa shose īsho shikwigela ū mu sī ya Misili, ū mu myaka īyo mpungatī ī ya mbooto.

³⁵A banhū benabo babize na nīmo gwa kūshisoleleja pyī ī shilīwa ū mu myaka yawiza īyo īliza. Nīyo ū Falao afunye shilagīlo gīkī, ī shilīwa shenīsho shibīkwe chiza ū mu magūngūli kūlwa shikū ja kū būtongi.

³⁶Shilang'hanwe kūlwa kūtūmamīla ū mu shikū ja nzala ya myaka mpungatī īyo īliza ū mu sī ya Misili; ī sī ītizūkenaagūlwa nzala.”

³⁷Ū mhayo gwenūyo gūbeela ū kūlī Falao, nū kū bana ng'oma bakwe.

³⁸Hūna ū Falao ūbabūja gīkī, “Tūdūgije kūpandīka munhū ūngī ose ose wa kūbiza gītī ng'wenūyū; ūyo alī na moyo gwa ng'wa Mulungu mulī we?”

³⁹Ū Falao ūng'wīla ū Yosefu gīkī, “Nīyo īkī ū Mulungu wakoolekejaga ī mihayo yenīyī, atīho ūngī wa kūbiza gītī bebe ū mu būdeeba, nū witegeleja.

⁴⁰Ū bebe wabizaga ntaale wa kaya yane; pye a banhū bane bakūbiza ha sīlīlī ya shilagīlo shako. Ū nene nakūbiza ntaale ū kūlī bebe kūlwa nguno y'isumbī dūhū.”

⁴¹Ū Falao ūnkomeleja ū Yosefu alīg'wīla, “Managa gīkī naakūtūūlaga ha būtaale bo sī yose ya Misili.”

⁴²Ī likanza lyenīlo ū Falao wīzuula ī sīīlī yakwe ya kūmeng'hela, īyo yalī kū lwaala lwakwe; ūnzwalīkīja Yosefu kū lwaala lwakwe. Ūnzwīka na myenda y'ikūjo ya kitaani, na ngufu gwa zahabu ū mu nhingo yakwe.

⁴³Hama ūlagīja ū Yosefu wigashe ng'wigogoteeni lyakwe, koolecha gīkī ū mu sī ya Misili walī wa kabīlī ū mu būtaale. Hūna a banhū bandya kūhamuka na būyegi bakūhayaga, “Tujagi mazwi!” Ūbiza wantūūlwa ha būtaale wa sī yose ya Misili.

⁴⁴Hūna ū Falao ūng'wīla ū Yosefu gīkī, “Ū nene nalī Falao, alīyo ū bebe ūlū ūtayombile mhayo, atīho munhū nūūlū ūmò wa kwīta mhayo gose gose ū mu sī ya Misili ī yose.”

⁴⁵Hūna ū Falao ūng'wilīka ū Yosefu lina lya Zafenati-panea; ūng'winha na Asenati, nshīke wa ng'wa Potifela ngabīji wa Oni, kūbiza nke wakwe. Ū Yosefu wīyeleela pyī ī sī ya Misili.

⁴⁶Ū Yosefu walī na myaka makūmi adatū, aho alandya būtūmami ū mu būsugi bo ng'wa Falao, ū ntemi wa Misili. Ū Yosefu atigashije dūhū ng'wikūlū lya ng'wa Falao, akīnga wandya kūja hose hose ū mu sī ya Misili.

⁴⁷Ū mu myaka mpungatī ī ya mbooto nūlū mhona, ī shilīwa shapyaga shingī no ū mu sī yenīyo.

⁴⁸Pyī ī shilīwa īsho shigelaga ū mu sī ya Misili, ū mu myaka mpungatī ī ya mbooto nūlū mhona, ū Yosefu washikumingaga washibīka mu magūngūli. Būlī igūngūli lyalī na ha kūsūmbīja ī shilīwa sha mu malaale galyo.

⁴⁹Ī shilīwa īsho akashibīka ū Yosefu shikakwīla no, shūbiza gītī maseni ga ha nyanza; nose ooya ū kūshilola ū wingī washo, nguno shikakīlanīja a ha būbalīlwe.

⁵⁰Aho ītaalī kwandya ī myaka ya nzala, ū Asenati, ū nshīke wa ng'wa Potifela ngabīji wa Oni, akamyalīla ū Yosefu bitūnja babīlī.

⁵¹Ū Yosefu ūng'wilīka ū tangī wakwe Manase; nguno akahaya, “Ū Mulungu waninhile kūgīība pye a makoye gane, nī kaya ya ng'wa baba pyī ī yose.”

⁵²Ū ng'witūnja wa kabīlī ūng'wilīka Efulaimu; ūhaya, “Nguno ū Mulungu waninhile mbyala mu sī ya kūluhiwa kwane.”

⁵³Ī myaka mpungatī ya mbooto nūlū mhona ū mu sī ya Misili yūkalīka,

⁵⁴hūna yandya nī myaka mpungatī ī ya nzala, gīt'umo walī wahayīla dūhū ū Yosefu. Ī sī ī jingī pye jakoyaga no, nguno ī nzala yalī ng'halī; alīyo ū mu Misili shalīmo ī shilīwa.

⁵⁵Ī Misili nayo aho yandya kūkoya nzala, a banhū būyūnīlīīla ū Falao, balīkooba shilīwa. Alīyo ū Falao ūbawīla pye a Bamisili gīkī, “Jagi kūlī Yosefu mukīīte pyī īyo alīmuwīla kwīta.”

⁵⁶Ī nzala aho yasanja hose pyī ū mu sī, ū Yosefu wandya kūjilugūla ī numba ja mabīkīlo ga shilīwa; ūyūbajingīja ī shilīwa a Bamisili, nguno ī nzala īkabiza ng'halī no pye a hose ū mu sī yenīyo.

⁵⁷Ī nzala yalī nhaale no ū mu sī pyī ī jose, na lūūlū nī sī ī jingī pye jikayiza kūgūla shilīwa ū kūlī Yosefu.