Read Sukuma Bible 2015 – Bibilia Ilagano Lya Kale 2015 Wandijo 43 Bible Online

Wandijo 43 - Sukuma Bible 2015 – Bibilia Ilagano Lya Kale 2015 bible

Wandijo 43

¹Kwike ī nzala yalī ītaalī ng'halī ū mu sī.

²Na lūūlū aho bamala ī shilīwa īsho baalī benha kūfuma Misili, ū saabo ūbawīla, “Jagi ko hangī mukatūsumīle shilīwa nūūlū shigehu.”

³Alīyo ū Yuda ūng'wīla, “Ū munhū ng'wenūyo akatūkomeleja no, alīhaya gīkī, ‘Nūūlū kūnibona ū būshū bone dūhū yaya, numho mubize mulī nang'hwe ū nzuna wing'we.’

⁴Na lūūlū ūlū ūlīzunya tūje nang'hwe ū nzuna wise, tūkūja tūkakūgūlīle ī shilīwa.

⁵Alīyo ūlū ītī chene, nū kūja tūtūjaga ko, nguno ū munhū ng'wenūyo walī atamelanaga aho alītūwīla gīkī, ‘Nūūlū kūnibona ū būshū bone dūhū yaya, numho mubize mulī nang'hwe ū nzuna wing'we.’”

⁶Ū Isilaeli ūbabūja, “Nibūlī mukang'wīla ū munhū ng'wenūyo gīkī mulī na nzuna wing'we ūngī, nose ng'wanīītīlile makoye mataale chenīkī?”

⁷Nabo būnshokeja, “Ū munhū ng'wenūyo watūbūjaga mabūjo gatī na wiligīle. Watūbūjaga a bise benekīlī ūmo tūlī, nī ya kū kaya kūūnū; gīkī, ‘Ū sīng'we ataalī alīho mpanga?’ Na gīkī, ‘Mulī na ng'wana wa ng'wing'we ūngī?’ A bise twanshokejaga dūhū gīt'umo watūbūgījaga; ī gīsī lūūlū, ni tūdeebe ginehe gīkī akūnoga nose atūwīle na gīkī, ‘Jagi mukang'wenhe ū nzuna wing'we?’”

⁸Hūna ū Yuda ūng'wīla ū ise ū Isilaeli gīkī, “Ntūūlage mu nkono gwane ū nyanda tūje, tūtizūnanula banhū, twikale bapanga a bose, ū bebe na bise, hamò na a baana bise.

⁹Nene ng'wenekīlī naliyeega kūlwa nguno yakwe, ūlū ūgwīlwa mhayo gwabūbi gose gose nilīlīīlage nene. Ūlū nūlemeelwa kūng'wenha kwiza kūntūūla mu nkono gwako hangī, ū nene hū nakūbūbūūcha ū būbi wenūbo ū kū būtongi wako shikū jose ja būlamu bone.

¹⁰Nguno ūlū ni ītī kwigedya gedya, ī haha ni twashikije nūūlū ng'hangala ibīlī tūkūjaga twakashoka.”

¹¹Hūna ū saabo ūbawīla, “Na lūūlū ūlū gūtī na wiligīle ū gwenūyū, nahene ītagi gīkī, Tūūlagi ū mu magūnīla ging'we shikolo shimò na shimò sha mu sī yise; musolanye ī shawiza wiza, muntwalīle kanong'ho ū munhū ng'wenūyo, maguta ga mitī ya kūūnū, būūkī, shisanjo sha mu shilīwa, ngazu, ngubaalū, na lozi.[79]

¹²Nī hela mubūūche ningī, jikīle ng'hangala ibīlī a hela ījo ng'walī ng'wasola ī kwandya. Nguno īng'wigeleelilwe kūjishosha ī hela ījo mukatūūlīlwa mu magūnīla ging'we aho mukaja ī kwandya; īkī hamo jikatūūlwa mo bo kūhūbīlwa dūhū.

¹³Nsolagi nū nzuna wing'we muje wangū ū kūlī munhū ng'wenūyo.

¹⁴Ū Mulungu ū wa būdūla bose, ang'winhe kūchīlwa shigongo ū kū būtongi bokwe ū munhū ng'wenūyo; alanzunīlīje nū ng'wana wa ng'wing'we ū ūngī, hamò nū Benjamini, ng'wize nabo kaya. Ī yene ūlū gūlīho gwa kūchīlwa, ū nene ni nachīlagwe dūhū!”

¹⁵Na lūūlū a banhū benabo būshisola ī shikolo īsho batwalaga gītī manong'ho, būsola nī hela ningī ho, ja kūshika ng'hangala ibīlī a ha hela ī ja kwandya; hamò nū Benjamini. Būbūūka bajile; bihuuta ko ī Misili būūkashika biyoolecha ū kūlī Yosefu.

¹⁶Ū Yosefu aho wamona ū Benjamini alī hamò nabo, ūng'wīla ū ntūmami wa kū ng'wakwe gīkī, “Batwalage kaya a banhū benaba, ūkasīnze ntugo gwawiza, ūtūbeegeje shilīwa, bakūlya hamò nane ī sha līīmi ī lelo.”

¹⁷Ū munhū ng'wenūyo wīta gīt'umo akawīlīlwa nū Yosefu, ūbatwala a banhū benabo ū kū ng'wa Yosefu.

¹⁸Alīyo aho batwalwa ū kū kaya ya ng'wa Yosefu bakogoha no, nguno biganikaga gīkī, “Twenhwa aha kūlwa nguno ya hela ījo jikatūūlwa mu magūnīla gise ī kwandya. Alītogwa tūbize tūtī na mbika yose yose ya kwigunaanīla, nguno alī na ng'hūmbū ja kūtūdima atūtūūle mu būsese, nī nzobe jise jibize jakwe.”

¹⁹Hūna būng'wegeela ū ntūmami wa ha ng'wa Yosefu walī ha nyango; būng'wīla gīkī,

²⁰“Baba tūkiza nī kwandya ū kūūnū kūgūla shilīwa;

²¹alīyo ū mu nzīla aho tūjile kaya twahayūshika ha ng'hambī ya kūlaala, tūtaligūla ī miligo; tūjibona ī hela jise jilīmo jitang'anhīlile. Jalī jitungilwe jūtūūlwa būlī ng'wene ng'wigūnīla lyakwe, kwegeela higūlya a ha nomo gwalyo; na lūūlū twajenhanījaga najo.

²²Twenhaga na hela jingī ja kūgūla shilīwa, tūtamanile hīmba nani akatūshokeja ī hela jise ū mu magūnīla.”

²³Nang'hwe ūbashokeja, “Ū gwenūyo gwa mhola gūtizūmukoya, ū Mulungu wing'we na Mulungu wa ng'wa sīng'we, h'ūyo akang'winha ī sabo īyo mukīpandīkīla mu miligo ying'we yenīyo; ī hela jing'we naajanukūla nene.” Hūna ūng'wenha ū Simioni wisangīja nabo.

²⁴Hanuma ū ntūmami ng'wenūyo ūbingīja mu numba ya ng'wa Yosefu, ūkabinha minzī ga kooja mhambala; nī nzobe jabo ūjinha shilīwa.

²⁵Būshitaligūla na kūshibeeja beeja ī shikolo īsho baalī benha kūlw'inong'ho lya kūng'winha Yosefu. Hūna būnindīīla gīkī ūlū alize ī līīmi bang'winhe; nguno baalī bigwa gīkī ī sha līīmi bakūlīīla henaho.

²⁶Ū Yosefu aho wingīla ū mu numba, binama ū kū būtongi bokwe kūshisha ha sī; hūna būng'winha ī linong'ho īlo baalī bang'wenhela, nguno baalī nalyo ng'wenūmo.

²⁷Ūbabūgīlīja ī mhola jabo, a boi benekīlī ūmo baalī; hama ūbabūja, “Kinehe ū sīng'we ū namhala ūyo ng'waniwīlaga makanza gene, alī mhola? Ataalī alīho mpanga?”

²⁸Nabo būshosha, “Ū nsese wako ū sīswe ataalī alīho mpanga, nīyo alī mhola no.” Binama hangī ū kū būtongi wakwe kūg'olekeja ikūjo.

²⁹Ū mu kūbalola lola gīko, ūnkalalīla no no no ū Benjamini ū nzunaye, ūyo basangīlile nina; hūna ūbūja, “Ūyū hū ng'wene ū nzuna wing'we ū kwangūlīja, ūyo ng'waniwīlaga mhola jakwe?” Kwimanīla wang'wīla, “Mulungu akwītīle yawiza ng'wana wane.”

³⁰Ū Yosefu aho wamona ū nzunaye yūbīlīla kūhaya kūlīla ī ng'holò yakwe nguno ya ng'hūmbū; wīnga ho wangū wangū, ūja ipandī lya iyene ūkalīla kwenūko.

³¹Hanuma y'ikanza wiluguta ū būshū, hūna ūshoka watimbyaga ng'holò; ūshikīla kūhaya, “Tengagi ī shilīwa.”

³²Būntengela ī shakwe iyene, nī sha baana ba ng'wawe shūbiza heeke; a Bamisili abo baalī nang'hwe ū ng'wilīīlo, nabo būbiza heeke, nguno a Bamisili batīko kūlya hamò na Bahebulania; ū mhayo gwenūyo ū kū Bamisili gwa malofu no.

³³A ha kwigasha būhelwa kwandīja wa kwandya kūbyalwa, ūūkamalīīgīja ū kwangū wabo; būyūkumya dūhū kūnū bakwilola lolaga.

³⁴Ī shilīwa bagabūlīlagwa kūfuma a ha meza ya ng'wa Yosefu, ū Benjamini winhwa shingī kūbaheeba a biye ng'hangala itanò. Na lūūlū būyega na kūng'wa hamò nang'hwe mu wiyaabī būtaale.