Read Sukuma Bible 2015 – Bibilia Ilagano Lya Kale 2015 Wandijo 44 Bible Online

Wandijo 44 - Sukuma Bible 2015 – Bibilia Ilagano Lya Kale 2015 bible

Wandijo 44

¹Ū Yosefu ūng'wīla ū ntūmami wa ha ng'wakwe gīkī, “A magūnīla ga banhū benabo gookajage shilīwa hangī, gīt'umo būlī ng'wene adūgije kūbūūcha; nī hela jabo ūbatūūlīle, būlī ng'wene ū ng'wigūnīla lyakwe.

²Hūna ī shikombe shane ī sha feza ūshitūūle ū ng'wigūnīla lya nzuna wabo ū wa kūmalīīja, shibize ng'wenūmo nī hela jakwe ī ja shilīwa.” Ng'hana wīta gīt'umo akawīlīlwa nū Yosefu.

³Aho weela ū būjikū, a banhū benabo būshindīkīlwa ītaalī dilū, bandya lūgendo nī nzobe jabo.

⁴Aho bataalī kūgūsegenela ū nzengo, ū Yosefu ūng'wīla ū ntūmami wakwe gīkī, “Bakūūbījage wangū a banhū benabo, ūlū ūlabapandīke ūbawīle gīkī, ‘Nibūlī ū wiza ng'wabūlīpa yabūbi?

⁵Ī shikombe shenīshi shitī sha ng'wa baba būgonzo sha kūng'welà na kūlagūlīla? Ū mhayo ūyo ng'wagwītaga gwenūyū mi no!’”

⁶Aho wabapandīka ūbawīla ng'hana ī mihayo yenīyo.

⁷Nabo būshosha balīhaya, “Mhayo kī gwenheleja nose ū nkūjiwa ū sīswe būgonzo ahaye mihayo īlī gīko? A abise basese bako ū kwīta mhayo gūlī gīko ng'wiko; ni gūkachīīlage kūle ūko.

⁸Ū beebe manīlaga dūhū a ha gīkī ī hela ījo tūkajisangīla mu magūnīla gise twajenhanīgije kūfuma Kanaani. Nibūlī hangī tūgime kwiba feza nūūlū zahabu kūfuma mu numba ya ng'wa so būgonzo?

⁹Ūlū alilonge ūmò wa mu bise batūmami bako alī nasho akūcha; hama pye a bangī tūkūbiza basese ba ng'wa sīswe būgonzo.”

¹⁰Nag'hwe ūshosha, “Ū gwenūyo ng'wadala, na lūūlū twītwe gīkī, ūyo alilongeali nasho h'ūyo akūbiza nsese wane; a bangī pye mukūbiza mutī mu kwihīga.”

¹¹Ī likanza lyenīlo būlī ng'wene wicha ha sī ū nigo gwakwe ūgūtaligūla.

¹²Hūna ū ntūmami ng'wenūyo wandya kūbaloja ī miligo yabo, kwandīja ū ntaale wabo ūkamalīīgīja kūlī ndo wabo. Ī shikombe shilongela ng'wigūnīla lya ng'wa Benjamini.

¹³Ī likanza lyenīlo būtandūla shizwalo shabo kūlwa būpīna; ī miligo yabo bīdaamhīja ha nzobe jabo haho na haho, būshoka ū mu nzengo.

¹⁴Aho washoka ū Yuda na a baana ba ng'wawe, būnsanga ū Yosefu ataalī mo ū mu numba; būshikīla kwiponeja ha sī ū kū būtongi wakwe.

¹⁵Ū Yosefu ūbawīla, “Mhayo kī ū gwenūyū ng'wītaga? Mutamanile gīkī ū munhū wa kūbiza gītī nene adūgije kūmanīja mihayo nūūlū ya mu mbisīla?”

¹⁶Ū Yuda ūhaya, “Tūlī na mhayo kī ūyo tūdūgije kūng'wīla ū sīswe būgonzo? Tūyombe mhayo kī? Gūlīho mhayo kī ūyo gūdūgije kūtūgunanha mu kwibūūla kwise? Ū Mulungu waboolechaga hape ū būkenaagūji wa basese bako. Ī haha pye tūlī basese ba ng'wa sīswe nkūjiwa; a bise aba, nū yūyo wabonagwa nasho ī shikombe.”

¹⁷Alīyo ū Yosefu ūhaya, “Ū nene ng'wiko ū kwīta mhayo gūlī gīko. Ūyo wabonagwa nasho ī shikombe, ng'wenūyo dūhū h'ūyo akūbiza nsese wane. A bangī pye shimīzagi mhola muje kūlī sīng'we.”

¹⁸Hūna ū Yuda ūng'wegeela ūng'wīla, “Baba nkūjiwa, nkūlīlagwe ū nsese wako ayombe kamhayo kaka ū kūlī baba nkūjiwa. Ūtizūmpelanīla ū nsese wako, nūūlū īkī ūlī na būdūla gītī Falao ng'wenekīlī.

¹⁹Ū bebe baba nkūjiwa ūkatūbūja a bise basese bako gīkī, ‘Mulī na sīng'we nūūlū nzuna wing'we?’

²⁰Tūkakūshokeja gīkī, ‘Ū sīswe tūlīnang'hwe, kwike wakūlaga; hama alīho na nsūmba, ng'witūnja wakwe akabyalwa kū būnamhala wakwe. Ū nsūmba ng'wenūyo walī na nkūlūye, ūzumalīka; ūsaaga wei iyene dūhū ū mu bitūnja ba kūbyalwa nū nina. Na lūūlū ū ise antogilwe no!’

²¹Ū bebe aho wigwa gīko ūkayomba, ‘Ng'wenhagi nize namone nane na miso gane.’

²²A bise tūkakūnshokeja ū bebe baba nkūjiwa gīkī, ‘Ū nyanda atūdūla ū kwīnga aneke ū ise, ūlū wīta gīko akūzumalīka ū namhala!’

²³Alīyo ū bebe ūkatūwīla a bise basese bako gīkī, ‘Ū nzuna wing'we wa kūmalīīja ūlū atizile hamò ning'we, mutī bakūbūbona hangī ū būshū wane.’

²⁴Na lūūlū aho twashoka ū kūlī ntūmami wako ū sīswe, tūkang'wīla īyo ūkīhaya ū bebe baba nkūjiwa.

²⁵Alīyo lyashikile ikanza ū sīswe ūtūwīla, ‘Jagi ko hangī mukatūsumīle ī shilīwa nūūlū shigehu.’

²⁶Nise tūshosha, ‘Tūtūjaga ko. Ū kūja ū kwenūko numho ū nzuna wise abize alī hamò nise. Ū nzuna wise ūlū atī hamò nise, tūtīko ū kūbūbona ū būshū wa munhū ng'wenūyo.’

²⁷Ū nsese wako ū sīswe ūtūwīla gīkī, ‘Ū nke wane akanibyalīla bitūnja babīlī.

²⁸Ūmò ūnileka ūkajimīīla; nane nūhaya, Ū ng'wenūyo walyiwe mashiinū, na kūshisha lelo īyī natīnamona.

²⁹Ūlū munīngīje nū ng'wenūyū, hūna mhayo gose gose gwabūbi gūkang'wilongele koi, mukūnibūlaga na būpīna, mubize ng'wanihilimīkīja mu shigila gete!’

³⁰Na lūūlū ūlū nūja ū kūlī nsese wako ū sīswe alīyo ū nyanda atī hamò nise, ū sīswe ūyo būpanga bokwe būlī hamò nū būpanga bo nyanda,

³¹akūyagala ūlū ūbona gīkī ū nyanda atīho. A bise basese bako tūkūmūlaga na būpīna ū sīswe, tūng'hilimīkīje mu shigila gete.

³²Ū nene nsese wako hū nakiyeega ū kūlī baba kūlwa nguno yakwe ū nyanda. Nakahaya gīkī, ‘Ūlū nūlemeelwa kūng'wenha kūlī bebe hangī, ū nene hū nakūbūbūūcha ū būbi wenūbo ū kū būtongi wako baba, shikū jose ja būlamu bone!’

³³Ali lūūlū, nalīkwikūmbīlīja ū nene nsese wako nashiige aha, a ha ng'wanya gwa nyanda, nabize nene ū nsese wa ng'wa baba nkūjiwa; ū nyanda ashoke kaya na a bakūlūye.

³⁴Nakūdūla ginehe ū nene ū kūja ū kūlī baba, ū nyanda ūlū atī hamò nane? Yaya natūdūla! Natatogilwe kūgūbona ū mhayo gwabūbi gwenūyo gūlīngwīla ū baba!”