Read Sukuma Bible 2015 – Bibilia Ilagano Lya Kale 2015 Wandijo 46 Bible Online

Wandijo 46 - Sukuma Bible 2015 – Bibilia Ilagano Lya Kale 2015 bible

Wandijo 46

¹Na lūūlū ū Isilaeli ūbūūka ū lūgendo lwakwe, nī shikolo shakwe ūshijana pye ī shose. Aho washika Beeli-sheba ūmfunīja shitambo ū Mulungu wa ng'wa ise Isaka.

²Ū Mulungu wiyoolecha ū kūlī Isilaeli mu makanza ga būjikū ūyomba nang'hwe; ūng'witana gīkī, “Yakobo! Yakobo!” Nang'hwe widīka, “Kalame.”

³Ūhaya, “Ū nene nalī Mulungu, Mulungu wa ng'wa so; ūtizoogoha ū kūja ī Misili, nguno nakūkwīta ūbize ihanga itaale ū kwenūko.

⁴Nakūja hamò nang'ho ī Misili; hanuma nakūkūshosha hangī ū kūūnū, gūzunyage ū gwenūyo. Hama ū Yosefu h'ūyo akūgakundīkīja a miso gako na nkono gwakwe.”

⁵Hūna ū Yakobo ūbūūka īngile ī Beeli-sheba; a bitūnja ba ng'wa Isilaeli būmūcha ū saabo, ū Yakobo ū mu magogoteeni ayo Falao walī wagatūma kwiza kūmūkīja; būbabūūcha na a baana babo na a bake babo.

⁶Būjiswaga nī mitugo jabo, nī shikolo shabo īsho baalī bapandīka ū mu Kanaani būshibūūcha; ū Yakobo ūsaamīla Misili hamò na a babyalwa bakwe a bose.

⁷Ūbajana Misili a bitūnja bakwe na a bashīke bakwe na a bizūkūlū bakwe, pye a babyalwa bakwe.

⁸Aya h'a mina ga Baisilaeli abo bakasaamīla Misili; Yakobo nū būbyīle wakwe: Lubeni myalwa wa kwandya wa ng'wa Yakobo.

⁹A bitūnja ba ng'wa Lubeni baalī: Hanoki, Palu, Heziloni, na Kalīmi.

¹⁰A bitūnja ba ng'wa Simioni baalī: Yemueli, Yamini, Ohadi, Yakini, Zohaali na Shauli, Ū ng'wene ū nina walī muna Kanaani.

¹¹A bitūnja ba ng'wa Lawī baalī: Gelishoni, Kohati, na Melaali.

¹²A bitūnja ba ng'wa Yuda baalī: Eeli, Onani, Shela, Pelezi na Zeela, (kwike a ba Eeli nū Onani baalī bamala kūcha mu sī ya Kanaani). A bitūnja ba ng'wa Pelezi baalī: Hezeloni na Hamuli.

¹³A bitūnja ba ng'wa Isakaali baalī: Toola, Pua, Jashubi na Shimuloni.

¹⁴A bitūnja ba ng'wa Zabuloni baalī: Seledi, Eloni na Yahileeli.

¹⁵A benaba baalī bitūnja abo Leya akamyalīla Yakobo makanza gene bataalī Padani-alamu; kūleka kūng'wisaaba ū nshīke wakwe ū Dina. Ī lisaabu lya bitūnja bose na a bashīke bakwe baalī makūmi adatū na badatū (33).

¹⁶A baana ba ng'wa Gadi baalī: Zefoni, Hagī, Shuni, Esiboni, Eli, Alodi na Aleli.

¹⁷A bitūnja ba ng'wa Asheli baalī: Imna, Ishiva, Ishivi, Belia, ilūmbū lyabo walī Seela. A bitūnja ba ng'wa Belia baalī: Hebeeli na Melikieli.

¹⁸A bitūnja benaba ū Yakobo akabyalīlwa na Zilipa, ūyo Labani akang'winha nshīke wakwe Leya. Ī lisaabu lyabo baalī ikūmi na batandatū (16).

¹⁹A bitūnja ba ng'wa Laheli, ū nke wa Yakobo baalī: Yosefu na Benjamini.

²⁰Ū mu Misili, ū Yosefu akabyalīlwa bitūnja bakwe ba Manase na Efulaimu, abo ninaabo walī Asenati nshīke wa ng'wa Potifela, ngabīji wa Oni.

²¹A bitūnja ba ng'wa Benjamini baalī: Bela, Bekeeli, Ashibeli, Geela, Naamani, Ehi, Loshi, Mupimu, Hupimu na Alidi.

²²A benaba baalī bitūnja ba ng'wa Laheli, abo Yakobo akabyalīlwa; Ī lisaabu lyabo baalī ikūmi na bane (14).

²³Ng'witūnja wa ng'wa Dani walī: Hushimu.

²⁴A bitūnja ba ng'wa Nafutali baalī: Yazieli, Guni, Yezeeli, Shilemu.

²⁵A benaba hū baalī bitūnja ba ng'wa Yakobo abo bakabyalwa na Biliha, ūyo Labani akang'winha nshīke wakwe Laheli. A bose baalī mpungatī (7).

²⁶A banhū a bose abo bakaja na Yakobo Misili, abo baalī ba būbyīle wakwe dūhū, kūleka kūbisaaba a bīnga bakwe, baalī banhū makūmi atandatū na batandatū ū wingī wabo.

²⁷Ūlū ūbasanja na a bitūnja abo akabyalīlwa Yosefu mu Misili, a banhū ba mu kaya ya ng'wa Yakobo abo bakaja Misili baalī makūmi mpungatī ū wingī wabo.

²⁸Hūna ū Yakobo ūntūma ū Yuda atonge ū kūlī Yosefu akoolekejiwe chiza ī nzīla ya kūja ī Gosheni.

²⁹Ū Yosefu ūsangwa amalīīlile alindanile n'igogoteeni lyakwe, na lūūlū ūja ī Gosheni kūnsūng'wanha ū ise ū Isilaeli. Kūshika dūhū aho walī ū ise, ūng'wibuga ūnkumbatīla, ūlīla ikanza itaale.

³⁰Ū Isilaeli ūng'wīla ū Yosefu gīkī, “Ī haha lūūlū yashila, nūūlū nakacha nigejaga. Nguno nakūbona na miso gane gīkī ng'hana ūtaalī ūlīho ūlī mpanga.”

³¹Hūna ū Yosefu ūbawīla a baana ba ng'wawe nī kaya ya ng'wa ise gīkī, “Leka naje ū kūlī Falao, nakayombe nang'hwe nang'wīle, ‘Ī kaya ya ng'wa baba, na a baana ba ng'wise, abo baalikalaga mu sī ya Kanaani bizaga kūlī nene.

³²A banhū benabo basugi ba mitugo; ū nīmo gwabo kūdīīma. Bajenhanījaga nī mitugo jabo, balī na ng'holo na ng'ombe; pye nī shikolo shabo ī shingī.’

³³Ū Falao ūlū ūng'witana ūmubūja gīkī, ‘Ū nīmo gwing'we ni nīmo kī?’

³⁴Nshokejagi gīkī, ‘A bise basese bako ū nīmo gwise kūfuma ha būdo gūlī kūdīīma mitugo; hū nīmo gwa bataale bise kūfuma kale.’ Ūlū ng'wīta gīko mukūzunīlījiwa ū kwikala ū mu sī ya Gosheni, nguno ū kū bana Misili būlī ndīīmi adalahilwe gīkī nsoso.”