Read Sukuma Bible 2015 – Bibilia Ilagano Lya Kale 2015 Wandijo 47 Bible Online

Wandijo 47 - Sukuma Bible 2015 – Bibilia Ilagano Lya Kale 2015 bible

Wandijo 47

¹Hūna ū Yosefu ūja ū kūlī Falao, ūkang'wīla gīkī, “Ū baba na a baana ba ng'wise bizaga ū kūfuma ī Kanaani, balī na a madaale gabo ga ng'holo na ng'ombe, pye nī shikolo shabo ī shingī; ī haha balī Gosheni.”

²Ū Yosefu walī na baana ba ng'wawe batanò abo akaja nabo ū kūlī Falao.

³Ū Falao ūbabūja a baana ba ng'wawe benabo, “A bing'we, ū nīmo gwing'we ni nīmo kī?” Būnshokeja ū Falao gīkī, “A bise basese bako tūlī badīīmi, gīt'umo baalī bataale bise kūfuma kale.”

⁴Bongeja kūng'wīla, “Twizaga kūūnū kwikala ikanza, nguno ī nzala nhaale no ī Kanaani; jamalile gete a maswa ī mitugo ja basese bako. Tūlīkūlomba ūtūzunīlīje a bise basese bako twikale Gosheni.”

⁵Ū Falao ūng'wīla ū Yosefu, “Bebe angū ū so na a baana ba ng'wing'we bapeelelaga kūūnū kūlī bebe;

⁶na lūūlū nolelage ū so na a baana ba ng'wing'we a ha soga gete; nguno ī sī ya Misili yīyī īlī kū būtongi wako. Ūdūgije kūbatūūla nūūlū ī Gosheni; nīyo ūlū balīho bamò babo ūbamanile gīkī bagūdeebile chiza ū nīmo gwa kūdīīma, batūūlage nū būdīīmi wa mitugo jane.”

⁷Hūna ū Yosefu ūntwala ū ise ū kūlī Falao; ū Yakobo ūmfuuha ū Falao.

⁸Ū Falao ūmūja ū Yakobo gīkī, “Ūlī na būlamu bo myaka yīnga?”

⁹Nang'hwe ū Yakobo ūnshokeja, “Ū būlamu bone ū mu shikū ja būshimīzi bone, būlī myaka igana na makūmi adatū. Ī myaka ya būlamu bone īlī migehu no, nīyo yokalile makoye; ītīko kūlenganīla nī ya būlamu bo bataale bane ū mu shikū ja būshimīzi wabo.”

¹⁰Ū Yakobo aho wamala kūmfuuha ū Falao wīnga ho.

¹¹Na lūūlū ū Yosefu ūmpandīkīla ha kwikala ū ise na a baana ba ng'wawe ū mu sī ya Misili. Ūbalolela a ha soga gīt'umo Falao walī walagīīlīla; ūpandīkīla Lamesesi, ūbatīnīla sī ng'wenūmo ūbinha yūbiza sabo yabo.

¹²Ū Yosefu ūyūng'winha ī shilīwa ū ise na a baana ba ng'wawe, nī kaya ya ng'wa ise ī yose, kūlenganīla nū wingī wabo.

¹³Alīyo ī sī yalī yamala gete ī shilīwa, nguno ī nzala yalī nhaale no. Ī sī ya Misili nī ya Kanaani jikayemba kīngī nasho kūlwa nzala.

¹⁴Ū Yosefu ūjikong'onha pyī ī hela ja mu Misili nī ja Kanaani kūlwa kūbajingīja shilīwa īsho bagūlaga; ī hela jenījo wajitwalaga kwikūlū lya ng'wa Falao.

¹⁵Nose būmala ī hela a bana Misili na a bana Kanaani; aho jashila, pyī ī Misili yiza ū kūlī Yosefu yūng'wīla gīkī, “Ī hela jise jashilile, alīyo twinahge ī shilīwa! Nibūlī tūnanuke ūlolile gīkī!”

¹⁶Nang'hwe ū Yosefu ūbawīla, “Enhagi ī mitugo jing'we. Īkī ng'wamalile ī hela, ng'wenha ī mitugo ng'wayīnza, nang'winha ī shilīwa.”

¹⁷Ng'hana bandya kūyūng'wenhela ū Yosefu ī mitugo jabo, bashika bayīnza wabinha ī shilīwa; būyūnekela falasa, ng'holo, mbūli, ng'ombe būyaga na nzobe. Ū ng'waka gwenūyo ūbabītya nguno ya kūyīnza mitugo jabo nang'hwe wabinha ī shilīwa.

¹⁸Ū ng'waka aho gwakalīka, būnsanga hangī ū kū ng'waka ūyo gūkalondeela; biza balīng'wibūūlīla balīhaya, “Tūtīko kūmisa nūūlū hado ū sīswe ū nkūjiwa, ī gīkī ī hela jise jashilile fu, nī mitugo jise ī haha jabizile sabo yako; tūtī na sha kūng'winha nūūlū hado ū sīswe ū nkūjiwa, ūlū ītī mibīlī yise na malaale gise dūhū.

¹⁹Nibūlī tūnanuke, na a malaale gise gakenaagūke alīyo nang'ho ūlolile? Tūgūlage, na a malaale gise ūgagūle, tūbize basese ba ng'wa Falao, pye na a malaale gise gabize gakwe. Kwike dūhū ū bebe ūtwinhe ī shilīwa a bise tūtizūshila akagaya na wa mbīyū, īkenaagūke ī sī.”

²⁰Na lūūlū ū Yossefu wīgūla pyī ī sī ya Misili, yūbiza ya ng'wa Falao; a bana Misili pye a bose ūmo bagelelile būgajinja a malaale gabo, nguno ī nzala yalī nhaale no, ī sī yūbiza ya ng'wa Falao.

²¹Ū Yosefu ūbatūūla mu būsese a banhū pye a hose ū mu Misili.

²²Kwike ī sī ya bagabīji atīīgūlile, nguno a bene bapandīkīlaga ng'wa Falao ī shiigunaanīlo; ī shakūlya shabigelaga ū kūfuma ū mu shakwinhwa īsho bīnjaga kū ng'wa Falao. H'ī nguno yene batajingije a malaale gabo.

²³Hūna ū Yosefu ūbawīla a banhū gīkī, “Ali lūūlū, ī lelo yenīyī īkī namugūla ng'wabiza ba ng'wa Falao pye na a malaale ging'we; jiiji ī mbīyū mulalīme muhambe.

²⁴Alīyo ūlū ng'ūbbisha, managi gīkī īmò ya ng'witanò ya shose īsho mulīgesa mukūng'winha Falao. Īj'inè ja ng'witanò jene jing'we, ja kūhamba mu malaale, na kūlya mu kaya jing'we na baana bing'we.”

²⁵Būnshokeja balīhaya, “Ū bebe sīswe nkūjiwa wabūpījaga ū būpanga wise, bebe tūchīlage shigongo dūhū ūtwanukūle; a bise twabizaga basese ū kūlī Falao.”

²⁶Na lūūlū ū Yosefu ūgwīta ū mhayo gwenūyo kūbiza shilagīlo ū mu sī ya Misili kūshisha lelo īlī; gīkī īmò ya ng'witanò ya matwajo ga mu sī īlī sabo ya ng'wa Falao.

²⁷Ū Isilaeli ūbiza wigasha Misili lūūlū, ipandī lya Gosheni. Ī kaya yakwe yūsaba no, hama būkwīla wangū, nguno baalī bibyaji kīngī nasho.

²⁸Ū Yakobo akikala ū mu Misili ikanza lya myaka ikūmi na mpungatī; ī myaka ya būlamu bokwe ū bose yalī igana makūmi anè na mpungatī.

²⁹Ī likanza lya kūcha kwakwe ū Isilaeli aho lyegeela kūshika, akang'witana ū ng'witūnja wakwe ū Yosefu; ūng'wīla gīkī, “Ūlū ūlīzunya kūnīītīla mhayo, gūtūūlage ū nkono gwako ha sīlīlī y'itango lyane ūnilahīlīle, gīkī ūkūnīītīla yawiza mu ng'hana. Yaya ū kūnijīka mu Misili ū nene.

³⁰Alīyo ūlū nūlaala, nīnjage ū mu sī ya Misili ūkanijīke hamò na a babyaji bane, ūko baajīkilwa a boi.” Nang'hwe ūhaya, “Nakwīta ūmo ūlīhayīla.”

³¹Ūng'wīla, “Nilahīlīlage.” Ū Yosefu ūng'wilahīlīla. Ū Isilaeli winama ha nsago gwa būlīīlī ūlamya.