Read Sukuma Bible 2015 – Bibilia Ilagano Lya Kale 2015 Wandijo 48 Bible Online

Wandijo 48 - Sukuma Bible 2015 – Bibilia Ilagano Lya Kale 2015 bible

Wandijo 48

¹Ikanza ilebe ū Yosefu ūwīlwa gīkī, “Ū so alīsaata.” Na lūūlū ūbasola a bitūnja bakwe a ba Manase nū Efulaimu, ūja nabo koi.

²Ū Yakobo aho wawīlwa gīkī, “Ū ng'witūnja wako ū Yosefu wiza kūkūlola;” ū Isilaeli wiyūmīlīja kūgūngūmūka, wigasha a ha būlīīlī.

³Ū Yakobo ūng'wīla gīkī, “Aho nalī Luzu, mu sī ya Kanaani, ū Mulunguū wa būdūla bose[80] akaniilongela, ūnifuuha.

⁴Ūniwīla gīkī, ‘Nakūkwīta ūbize na mbyala nhaale, na a banhū bako nakūbakwīja. Nakūkwīta ūbize ihanga lya banhū bingī. Nī sī yenīyī nakūkwinha bebe na banhū ba shibyalīlwe shako, ībize yako ya wikomangīle kūshisha welelo bose.’

⁵Ali lūūlū, a bitūnja bako a babīlī abo ūkabyalīlwa mu Misili nataalī ū nene kwiza kūūnū, babizaga bane; ū Efulaimu nū Manase bane, gīt'umo Lubeni na Simioni balī bane.

⁶Hūna a baana bose bose abo ūlabyalīlwe a ha numa ya benaba, bene bako. Ū mu sī īyo balinhwe bakūbalīlwa ū mu mina ga baana ba ng'wabo.

⁷Ū Laheli akazumalīkīla mu sī ya Kanaani tūlī mu nzīla nalīshoka kūfuma Padani. Tūūsangwa twegeela dūhū ī Efulata, nūnjīka bbihī n'ikūūwa lya Efulata (h'ī Betelehemu), ūnilekela būpīna.”

⁸Ū Isilaeli aho wababona a bitūnja ba ng'wa Yosefu a babīlī, ūbūja; “Banani a beneba?”

⁹Ū Yosefu ūng'wīla ū ise gīkī, “Angū h'a bitūnja bane abo Mulungu waninha ū mu sī īyī.” Hūna ū Isilaeli ūhaya, “Benhage aha nabafuuhe.”

¹⁰Kwike a miso ga ng'wa Isilaeli gakasangwa gandije kwīta wiija kūlwa nguno ya būkūji; nose walī atabonaga chiza. Na lūūlū ū Yosefu ūbeegeleja a bitūnja bakwe a halī ise; nang'hwe ū ise ūbakumbatīla na kūbabbipa.

¹¹Ū Isilaeli ūng'wīla ū Yosefu gīkī, “Ī liganiko lya kūbūbona ū būshū wako lyalī lyashila, alīyo ī haha ū Mulungu wanizunīlīgije kūbabona na a baana bako.”

¹²Hūna ū Yosefu ūbīnja a ha mazwi ga ng'wa ise, hanuma winama ū kū būtongi bo ng'wa ise, ū kūnū achimīgije ha sī ū būshū.

¹³Hangī ū Yosefu ūbasola ūbabūcha būbīlī wabo, ū Efulaimu mu nkono gwakwe gwa būlyo ūnoleja kū nkono gwa lūmoso gwa ng'wa Isilaeli, ū Manase mu nkono gwakwe gwa lūmoso, ūnoleja kū nkono gwa būlyo gwa ng'wa Isilaeli; hūna ūbeegeleja a halī we.

¹⁴Ū Isilaeli ūgabisanya a makono gakwe; ūgūgoloola ū nkono gwakwe ū gwa būlyo, ūgūtūūla ha ntwe gwa ng'wa Efulaimu, nūūlū īkī walī ndo. Ū gwa lūmoso ūgūtūūla ha ntwe gwa ng'wa Manase, nūūlū īkī ū Manase hū walī tangī ū kūbyalwa.

¹⁵Hūna ūmfuuha ū Yosefu akūhayaga gīkī, “Ū Mulungu ūyo babyaji bane ba Abulahamu na Isaka bashimīzaga mu kūng'wigwa we, ū Mulungu ūyo alī Ndīīmi wane shikū jose kūshisha lelo,

¹⁶Ū malaika ūyo wanipīja kūfuma mu makoye gose; ū ng'wenūyo ni abīīlūkīlage mbango a bayanda benaba. Bitanīlwe kū lina lyane, na a mina ga babyaji bane, a ba Abulahamu na Isaka, nīyo biyongeje bakwīle ū mu sī.”

¹⁷Ū Yosefu aho wamona ū ise watūūla ū nkono gwakwe ū gwa būlyo ha ntwe gwa ng'wa Efulaimu, akaleka ū kūyega; na lūūlū ūgwīnja ū nkono gwa ng'wa ise a ha ntwe gwa ng'wa Efulaimu ūgūtūūla ha ntwe gwa ng'wa Manase.

¹⁸Ū Yosefu ūng'wīla ū ise, “Baba wahūbīla, ūyū hū myalwa wa kwandya, ntūūlīlage ng'wene ū nkono gwako ū gwa būlyo.”

¹⁹Alīyo ū ise akalema ūhaya, “Namanile ng'wanone, nilekage namanile. Nang'hwe akūbiza ihanga lya banhū; nīyo nū wei akūbiza ntaale. Alīyo ū nzunaye akūbiza ntaale kūntinda ū wei, nīyo ū būbyīle wakwe būkūbiza mahanga mingī.”

²⁰Ū lūshikū lwenūlo ūbafuuha; ūhaya, “Ū mu lina lyako, ū Isilaeli akūyūfuuha alīhaya gīkī, ‘Ū Mulungu ni akwītage ūbize gītī Efulaimu na Manase.’” Ūbiza wantūūla ū Efulaimu kū būtongi wa ng'wa Manase.

²¹Hūna ū Isilaeli ūng'wīla ū Yosefu gīkī, “Ū nene nalī hihī kūcha, alīyo ū Mulungu akūbiza hamò ning'we, na akūmushosha hangī ū kū sī ya babyaji bing'we.

²²Na lūūlū ū bebe īkī ūlī ntongeeji wa biyo, nalīkwinha inong'ho lya kūkongeja; nalīkwinha ū lūgūlū ūlo nakabataaja Baamoli mu kwilwisha būlūgū nabo bo līlūshū na būta wane.”