Read Sukuma Bible 2015 – Bibilia Ilagano Lya Kale 2015 Wandijo 49 Bible Online

Wandijo 49 - Sukuma Bible 2015 – Bibilia Ilagano Lya Kale 2015 bible

Wandijo 49

¹Hūna ū Yakobo ūbitana a bitūnja bakwe; ūhaya, “Bing'we ibilingagi aha namuwīle īyo īlang'wilongele kū shikū ja kū būtongi.

²Bitūnja ba ng'wa Yakobo ibilingagi mundegeleke ū sīng'we ū Isilaeli.

³Bebe, Lubeni, ūlī ng'wana wane wa kwandya, ūlī būdūla wane, lūmeng'ho lwa wandījo wa nguzu jane; Ūlī ntongeeji ū ng'wikūjo, nū mu būgaagaanu ūlī ntongeeji.

⁴Ūbange minzī gatalembeelaga, alīyo ūtūtongeela hangī, nguno ūkalinha ha būlīīlī bo ng'wa so: Ūkasosohaja ha būlaalo wane.

⁵“Simioni na Lawī bene ba shikūlū na shizuna jigi; ī shū jabo shilī shilanga sha kūtūmamīla kwiboneela.

⁶Ee, būpanga wane ūtizūbiza na lūbanza nabo; būpanga wane īngaga ū ng'wigele lyabo. Nguno baabūlaga banhū mu būpelanu wabo, būtīnagūla matimba ga nzīkū kūlwa wibonya wabo.

⁷Leke būzung'we ū būpelanu wabo, nguno wabūbi no; pyī nū būkalī wabo, nguno wa nyakenaagūji. Benabo leka nabasalang'hanīje mulī Yakobo; bajimīīlīle mulī Isilaeli.

⁸“Yuda a baana ba ng'wing'we bakūkūkumīlīja; ū nkono gwako gūkūbīnza nhingo ja banishi bako. A baana ba ng'wa so bakūbiza baakūkwinamīla bebe.

⁹Ee, Yuda ūlī ng'wana wa shimba; ng'wana wane wafumile ū kwihīīga. Abange shimba yalembeelaga Īkūkūngīlīga, gītī shimba ng'hīma; nani ū wa kūnkomya?

¹⁰Ū būdūla wa būtemi būtalang'wīnga Ū Yuda, ū nang'ha gwa nyatemi gūtī gwa kwīnga mu magūlū gakwe, kūshisha ize ūyo gūng'wigeleelilwe kūbiza gwakwe, ūyo igelile kwigwiwa na mahanga.

¹¹Akūkūnga nzobe yakwe ha nzabibu, nū ng'wana wa nzobe wakwe ha nzabibu gwawiza. Akūfula shizwalo shakwe mu divai, ī myenda yakwe mu mininga ga mizabibu.

¹²A miso gakwe gakūbiza na būūza būpiile kūtinda divai, na a mino gakwe gakūbiza gape kūtinda mabeele.

¹³“Ū Zabuloni akūzenga kū mbalama ya nyanza, abize būkolelo wa meeli; Ī sī yakwe īkūbīmbīkanwa na Sidoni.

¹⁴Ū Isakaali ng'wene nzobe ya nguzu, īlembeelile yalindaga kūbūūcha miligo.

¹⁵Ūlū alabūbone ū wiza w'ipandī lya kwifuula kwakwe, nū wiza wa sī yakwe, akwinamya ibega lyakwe alinde nīmo gwa kūbūūcha; akūzunya ū kūtūmamiwa bo nguzu.

¹⁶Ū Dani akūbiza namuji wa banhū bakwe, gīt'umo jilī ng'anda jingī ja Baislaeli.

¹⁷Ū Dani abange ng'hoboko īlī hihī n'ipanda, ng'wenūyo ng'wene ibambahili lichaamīka mu nzīla, īlyo līkalumaga ndaamhī kū mashiigina kūshisha ū ndamhīji wagwa sagaalī.

¹⁸Ee SEEBA, nangūhīlage ūnipīje.

¹⁹Ū Gadi akūdumīlwa n'ibità lya banishi, alīyo akwilwisha nabo, kūshisha akūbapyena, bang'olekeje mashiigina.

²⁰Ū Asheli ī shilīwa shakwe shikūbiza sha būhondo, akūbiza na shizeeze sha kūdūla kūlisha batemi.

²¹“Ū Nafutali ng'wene mhala ya kū matogolo, īyo īkabyalaga baana bawiza.

²²Ū Yosefu ng'wene nzabibu gwa matwajo mingī; gwenūyo gwene nzabibu gwa matwajo masoga, ūyo gūzwīlile ha lūzwīlo lwa minzī; gwa matambī galandaalile higūlya ya ndugu.

²³Balasi baalī bang'wilumīlwa ng'haya kūndumīla, būng'wītīla wanishi bakūnasaga.

²⁴Alīyo ū būta bokwe būtatelile, na a makono gakwe gatanogolekile, kūlwa kūguzuhiwa na nkono gwakwe Ū wa būdūla, ū Mulungu[81] wa ng'wa Yakobo; kūlwa kūguzuhiwa nū Ndīīmi, ūyo alī Shiganga sha ng'wa Isilaeli.

²⁵Kūlwa nguno ya ng'wa Mulungu wa ng'wa so, ūyo akakūgunanhaga; kūlwa nguno yakwe ū wa būdūla bose, ūyo akakūfuuhaga kūfuma ng'wigūlū kwigūlya, ja ha sī, na mu gatī ya sī, na ja konhya baana, na ja nda ya būbyīle.

²⁶Ī ja ng'wa so jene jawiza no, jitindile wingī wa mbango ja bakūla kale, nūūlū a ba kale gītī ngūlū. Jitindile wiza bose ūbo būkilongaga kūfuma kū ngūlū ja kale. Ī jose jenīji jiikale ha ntwe gwa ng'wa Yosefu, jing'widīkīle jimpīndije hose hose, ūyo asolilwe kūfuma mu baana ba ng'wawe.

²⁷Ū Benjamini ng'wene mhūūge saasagūji, ī dilū akalyaga sha kūpondya; mhīndī lyabiza igabanha īsho wadimaga.”

²⁸Ī jenīji h'ī ng'anda ikūmi n'ibīlī ja baana ba ng'wa Isilaeli, hama ī yenīyī h'ī mihayo īyo akabawīla ū saabo aho alībafuuha; wang'winhaga būlī munhū ījo jalī jing'wigeleelilwe.

²⁹Hūna ūbalagīla alībawīla gīkī, “Ū Nene nalī hihī kūcha naje kū bang'wise. Mukūja mukanijīke ūko bajīkilwe bataale bane, ū ng'wipilinga lya ng'wilaale lya ng'wa Efuloni ū Ng'hītī,

³⁰Ī lipilinga īlo līlī ng'wilaale lya Makipela, hihī na Mamule ya Kanaani; īlo Abulahamu akagūla kūlwa nguno ya kūjīkīla, kūfuma kūlī Efuloni Ng'hītī, hamò nī lilaale lyaho.

³¹Ū ng'wenūmo h'ūmo wajīkwa ū Abulahamu nū nke ū Saala, h'ūmo wajīkwa nū Isaka nū nke ū Lebbeka, h'ūmo nanjīka nū Leya.

³²Ī lilaale nī lipilinga gakagūlwa a gose kūfuma kū Bahītī.”

³³Ū Yakobo aho wamala ū kūbinha ī shilagīlo a bitūnja bakwe, ūduta magūlū gakwe higūlya ya būlīīlī, hūna wesheema lwa kūmalīīja; ūtwalwa kū bang'wawe.