Read Sukuma Bible 2015 – Bibilia Ilagano Lya Kale 2015 Wandijo 5 Bible Online

Wandijo 5 - Sukuma Bible 2015 – Bibilia Ilagano Lya Kale 2015 bible

Wandijo 5

¹Īyī yene mihayo ya kwihela kwa shibyalīlwe sha ng'wa Adamu. Ū Mulungu aho wanseema ū munhū, akaameeja mu suso yakwe wei ng'wenīkīlī.

²Ūbaseema ngosha na nkīma; aho wamala kūbaseema ūbafuuha, ūbinha lina lya munhū.

³Ū Adamu aho washisha būlamu bo myaka igana na makūmi adatū (130), ūbyala ng'wana ngosha wa kūng'wikola we, mu suso yakwe; ī lina lyakwe ūng'wilīka Seti.

⁴Kūfuma a ha kūbyalwa kwa ng'wa Seti, ū Adamu akikala ho myaka magana anaane (800); ūbyala na bitūnja bangī, hamò na bashīke.

⁵Ī myaka ya būlamu bo ng'wa Adamu ī yose yalī magana kenda na makūmi adatū (930), hūna ūcha.

⁶Ū Seti aho washisha myaka igana n'ītanò (105), ūmyala Enoshi.

⁷Kūfuma a ha kūbyalwa kwa ng'wa Enoshi, ū Seti akikala ho myaka magana anaane na mpungatī (807). Ūbyala na bitūnja bangī, hamò na bashīke.

⁸Ī myaka ya būlamu bo ng'wa Seti ī yose yalī magana kenda n'ikūmi n'ībīlī (912), hūna ūcha.

⁹Ū Enoshi aho washisha myaka makūmi kenda (90), ūmyala Kenani.

¹⁰Kūfuma a ha kūbyalwa kwa ng'wa Kenani, ū Enoshi akikala ho myaka magana anaane n'ikūmi n'ītanò (815). Ūbyala na bitūnja bangī, hamò na bashīke.

¹¹Ī myaka ya būlamu bo ng'wa Enoshi ī yose yalī magana kenda n'ītanò (905), hūna ūcha.

¹²Ū Kenani aho washisha myaka makūmi mpungatī (70), ūmyala Mahalaleli.

¹³Kūfuma a ha kūbyalwa kwa ng'wa Mahalaleli, ū Kenani akikala ho myaka magana anaane na makūmi anè (840). Ūbyala na bitūnja bangī, hamò na bashīke.

¹⁴Ī myaka ya būlamu bo ng'wa Kenani ī yose yalī magana kenda n'ikūmi (910), hūna ūcha.

¹⁵Ū Mahalaleli aho washisha myaka makūmi atandatū n'ītanò (65), ūmyala Yaledi.

¹⁶Kūfuma a ha kūbyalwa kwa ng'wa Yaledi, ū Mahalaleli akikala ho myaka magana anaane na makūmi adatū (830). Ūbyala na bitūnja bangī, hamò na bashīke.

¹⁷Ī myaka ya būlamu bo ng'wa Mahalaleli ī yose yalī magana anaane na makūmi kenda n'ītanò (895), hūna ūcha.

¹⁸Ū Yaledi aho washisha myaka igana na makūmi atandatū n'ībīlī (162), ūmyala Enoka.

¹⁹Kūfuma a ha kūbyalwa kwa ng'wa Enoka, ū Yaledi akikala ho myaka magana anaane (800). Ūbyala na bitūnja bangī, hamò na bashīke.

²⁰Ī myaka ya būlamu bo ng'wa Yaledi ī yose yalī magana kenda na makūmi atandatū n'ībīlī (962), hūna ūcha.

²¹Ū Enoka aho washisha myaka makūmi atandatū n'ītanò (65), ūmyala Matusela.

²²Kūfuma a ha kūbyalwa kwa ng'wa Matusela, ū Enoka ūmala myaka magana adatū (300) akūshimīzaga hamò na[9] Mulungu. Ūbyala na baana bangī bagosha na bakīma.

²³Ī myaka ya būlamu bo ng'wa Enoka īkabiza magana adatū na makūmi atandatū n'ītanò (365).

²⁴Ū mu shimīzīle yakwe ū Enoka wikalaga hamò na Mulungu, hūna kwimanīla oya ū kwilonga, nguno ū Mulungu akansola.

²⁵Ū Matusela aho washisha myaka igana na makūmi anaane na mpungatī (187), ūmyala Lameki.

²⁶Kūfuma a ha kūbyalwa kwa ng'wa Lameki, ū Matusela akikala ho myaka magana mpungatī na makūmi anaane n'ībīlī (782). Ūbyala na bitūnja bangī, hamò na bashīke.

²⁷Ī myaka ya būlamu bo ng'wa Matusela ī yose yalī magana kenda na makūmi atandatū na kenda (969), hūna ūcha.

²⁸Ū Lameki aho washisha myaka igana na makūmi anaane n'ībīlī (182), akabyala ng'wana ngosha;

²⁹Ūng'wilīka ī lina lyakwe Noa; ūhaya gīkī, “Akūtūlūngūja ū mu katūmamīle kise nū būdito wa milīmo ya makono gise, īyo tūlī nayo kūlwa makoye ga sī īyo SEEBA wīzuma.”

³⁰Kūfuma a ha kūbyalwa kwa ng'wa Noa, ū Lameki akikala ho myaka magana atanò na makūmi kenda n'ītanò (595). Ūbyala na bitūnja bangī, hamò na bashīke.

³¹Ī myaka ya būlamu bo ng'wa Lameki ī yose yalī magana mpungatī na makūmi mpungatī na mpungatī (777), hūna ūcha.

³²Ū Noa aho washisha myaka magana atanò (500), ūbabyala ba Shemu, Hamu na Yafeti.