Read Sukuma Bible 2015 – Bibilia Ilagano Lya Kale 2015 Wandijo 6 Bible Online

Wandijo 6 - Sukuma Bible 2015 – Bibilia Ilagano Lya Kale 2015 bible

Wandijo 6

¹A banhū aho bakwīla ū mu sī, būbyala na baana bakīma bingī,

²a baana ba ng'wa Mulungu būbabona a bashīke ba banhū gīkī basoga; bandya kūyūbatoola gīt'umo baalī batogelilwe boi benīkīlī.

³Hūna ū SEEBA ūhaya gīkī, “Ū moyo gwane gūtikala gūkwilwishaga na munhū shikū jose, nguno ū wei alī mīlī gwa kūcha; ī shikū ja būlamu bokwe jikūbiza myaka igana na makūmi abīlī (120).”

⁴Ū mu shikū jenījo nī ja kū būtongi baalīho Banefili ū mu sī; a baana ba ng'wa Mulungu bajaaga kūbatoola bashīke ba banhū babyala hamò nabo. A Banefili benabo baalī banhū ba nguzu,[10] na bakumūku kūfuma kale na kale.

⁵Ū SEEBA ūbona gīkī ī nhūngwa ja ng'wa munhū jilī ja malofu no ū mu sī, na gīkī pye a maganiko ga ng'holò ya ng'wa munhū galī masoso būl'ikanza.

⁶Ū mhayo gwenūyū gūkampīnīhaja no ū SEEBA, gūminya ū mu ng'holò, kūlwa nguno ya kūmeeja na kūntūūla mu sī ū munhū.

⁷Hūna lūūlū ū SEEBA ūhaya gīkī, “Ū munhū ūyo nameeja nakūmpyaagūla agaye gete ū mu sī. Bakūshila pye a banhū nī shiinū, pyī nī sha kwigweesa ha sī, nī noni ja higūlya; nguno nalī na būpīna no īkī nakashibeeja!”

⁸Alīyo walīho Noa, ū ng'wene ūbalīlwa wiza[11] ū kū būtongi bo ng'wa SEEBA.

⁹Īyī yene mihayo ya mu shikū ja ng'wa Noa. Ū Noa walī munhū ntūngīlīja ū mu banhū ba shibyalīlwe shakwe; walī atī na shisembo, nīyo washimīzaga mu kūng'wigwa Mulungu pye a makanza.

¹⁰Ū Noa ng'wenūyo walī na bitūnja badatū, ba Shemu na Hamu na Yafeti.

¹¹Ali lūūlū, ū kū būtongi bo ng'wa Mulungu ī sī yalī yabiipa no; yalī yokala wiboneeji.

¹²Ū Mulungu akabona gīkī ī sī yakenaagūkile; nguno ī nhūngwa ja banhū ba mu sī pye a bose, jikabiza ja malofu no!

¹³Hūna lūūlū ū Mulungu ūng'wīla ū Noa gīkī, “Lyashikaga ikanza lya kūbayagaja pye a banhū, nguno ī sī yokalile wiboneeji kūlwa nguno yabo. Nakūbakenaagūla a boi hamò nī sī.

¹⁴Hūna lūūlū, ū bebe beejaga ngalaba[12] ya ntī gwa gofa;[13] ū mu gatī wītūūlīle masenge ībize na chumba, hūna wīteleleje na laami ū mu gatī nī hanze.

¹⁵A kabeegeje kayo kalī gīkī, Ī ngalaba yenīyo ū būlīhu wayo būkūbiza makono igana na makūmi anè, ū būgalī galī wayo makono makūmi abīlī n'idatū, ū būgūngūhu makono ikūmi n'idatū na nusu.

¹⁶Ūkwīkundīkīja ū kwigūlya, alīyo ī likundīkījo līlekeele ng'wanya gwa būgalī bo nusu nkono (0.5). Ū ng'wanya gwenūyo gwīpīndīlīje pyī ī yose, kūlwa kwingīja būpe ū mu gatī. Ū nyango ūkwītūūlīla mu kabazu; nīyo wīyīte ībize na golofa ibīlī.

¹⁷Nakwenha ihūūma lya minzī ū mu sī līshiyagaje pyī īsho shilī na myūyī ya būpanga. Shose na shose ī sha būpanga īsho shilī ha sīlīlī y'igūlū shikūcha.

¹⁸Alīyo ū bebe nakūkwinha ilagane[14] lyane īlo nakūlyīta lībize na nguzu. Ū bebe kwingīla ū mu ngalaba na a bitūnja bako, nū nke wako; na a bīnga bako bakūbiza hamò nang'ho.

¹⁹Ū mu shiseeng'wa shose ī shipanga, ūkwenha ū mu ngalaba shibīlī shibīlī, ng'hosha na ng'hīma; shilang'hanwe ng'wenūmo hamò nang'ho, shiikale shipanga.

²⁰Pyī ī shiseeng'wa shikūbiza shibīlī shibīlī, mbika jose na jose ja noni na ja shiinū, pyī nī ja kwigweesa ha sī, jikwiza ū kūlī bebe jilang'hanwe jikale mhanga.

²¹Ūkūsola na shilīwa sha būlī mbika, sha kūlya ū bing'we, nī shiseeng'wa īsho shilī hamò nang'ho; na shingī ūlatūūle kūlwa shikū ja kū būtongi.”

²²Ū Noa wīta būlī mhayo gīt'umo akalagīlīlwa na Mulungu.