Read Sukuma Bible 2015 – Bibilia Ilagano Lya Kale 2015 Wandijo 7 Bible Online

Wandijo 7 - Sukuma Bible 2015 – Bibilia Ilagano Lya Kale 2015 bible

Wandijo 7

¹Hūna ū SEEBA ūng'wīla ū Noa gīkī, “Ingīlaga lūūlū ū bebe ū mu ngalaba, hamò nī kaya yako; nguno ū mu shibyalīlwe shenīshi, ū bebe naakūbonile ūlī ntūngīlīja.

²Būlī mbika ja ndimu janaga mpungatī pungatī, ng'hosha na ng'hīma. Alīyo ī shiinū, ī jene janaga ibīlī bīlī, najo ng'hosha na ng'hīma ja būlī mbika.

³Nī noni ja būlī mbika, najo mpungatī pungatī, ng'hosha na ng'hīma; kūlwa kūlang'hana būlī lūnūngū lwikale lūpanga hose pyī ū mu sī.

⁴Ūlū jilashile shikū mpungatī kūfuma lelo īyī, nakwenha mbula ū mu sī, ītūle shikū makūmi anè, līīmi na būjikū; ī shiseeng'wa shipanga sha mu sī īsho naashibeeja, nashiyagaje shishile pye.”

⁵Na ng'hana ū Noa wīyīta pyī īyo akalagīlwa na SEEBA.

⁶Ī lihūūma lya minzī aho līliza mu sī, ū Noa walī na būlamu bo myaka magana atandū.

⁷Ū Noa wingīla ū mu ngalaba hamò na a bitūnja bakwe, nū nke na a bīnga bakwe, būpīla ī lihūūma lya minzī.

⁸Ndimu ja būlī mbika, nī shiinū; pyī nī noni ja mbika jose, jikiza ibīlī ibīlī, pyī ī shiseeng'wa sha mu sī, nī shiinū ja kwigweesa ha sī.

⁹Jose pye jiza ū kūlī Noa, jilī ng'hosha na ng'hīma, jūyūshika jingīla ū mu ngalaba gīt'umo ū Mulungu walī wanagīīlīla ū Noa.

¹⁰Aho jashikaana ī shikū mpungatī, a minzī g'ihūūma giza ū mu sī.

¹¹Ī lihūūma līkandya mu ng'waka gwa magana atandatū ū mu myaka ya būlamu bo ng'wa Noa. Lwalī lūshikū lw'ikūmi na mpungatī mu ng'weji gwa kabīlī; ū mu lūshikū lwenūlo, pyī ī nzwīlo ja minzī ī ja mu gatī ya sī jūlugūlīlwa; nī myongo ya minzī ū kwigūlū yūlekelwa.

¹²Hūna ī mbula yūtūla ītūlile a ha sī, kūshisha shikū makūmi anè, līīmi na būjikū!

¹³Ū lūshikū lwenūlo ū Noa akingīla ū mu ngalaba alī hamò na a bitūnja bakwe a ba Shemu na Hamu nū Yafeti; pyī nū nke na a bake ba bitūnja bakwe.

¹⁴Bakingīla mo nī shiinū ja būlī mbika, nī ndimu ja mbika na mbika, pyī nī shiinū ja kwigweesa ha sī; nī noni, nī shingī pyī īsho shikalalaga.

¹⁵Ī shiseeng'wa shose īsho shilī na myūyī ya būpanga, shikiza ū kūlī Noa shilī shibīlī shibīlī, shingīla ū mu ngalaba.

¹⁶Pyī ī shiseeng'wa īsho shikingīla, shaalī ng'hosha na ng'hīma; kūlenganīla nū mumo ū Mulungu walī wanagīīlīla ū Noa, hūna ū SEEBA ūnugalīla.

¹⁷Ī mbula īkamala shikū makūmi anè īkūtūlaga a ha sī; aho gakwīla a minzī, gībūūcha ī ngalaba yeleela higūlya, yīnga a ha sī.

¹⁸A minzī gongeja ū kūkwīla a higūla ya sī, nayo ī ngalaba īlīho dūhū a ha minzī īkweleelaga.

¹⁹A minzī gakakwīla no a ha sī, kūshisha būlī lūgūlū lūlīhu a ha sīlīlī y'igūlū lūlibījiwa.

²⁰A minzī gongeja ū kūkwīla a ha sī, nose nī ngūlū ī ndīhu no no no jūlibījiwa ī jose; a minzī gūbiza higūlya yajo būlīhu bo kwegeela makono mpungatī.

²¹Būlī shiseeng'wa shipanga īsho ng'anda ng'anda ha sī, shūshila kūcha, noni, ndimu, shiinū, nī ja kwigweesa ha sī ī jose ūmo jigelelile; pye na a banhū.

²²Pyī ī sha ha sī nyūūmu, īsho shikesheemelaga mu mūūlū shikashila kūcha!

²³Pyī ī shiseeng'wa shipanga shūpyagūlwa gete shūshila ū mu sī, banhū, ndimu, shiinū, pyī nī ja kwigweesa ha sī; nī noni ja higūlya ī jose, jūshila ho gete. Noa iyene dūhū ūsaaga, na a babo walī nabo ū mu ngalaba; nī shiseeng'wa ī shingī īsho shaalīmo.

²⁴A minzī gakīkundīkīja ī sī kūshisha lyūbīta ikanza lya shikū igana na makūmi atanò.