Read Sukuma Bible 2015 – Bibilia Ilagano Lya Kale 2015 Wandijo 9 Bible Online

Wandijo 9 - Sukuma Bible 2015 – Bibilia Ilagano Lya Kale 2015 bible

Wandijo 9

¹Hūna ū Mulungu ūmfuuha ū Noa na a bitūnja bakwe; ūbawīla gīkī, “Ibyalagi mukwīle muyokaje ī sī.”

²Pyī ī shiinū ja mu sī nī noni ja higūlya, nī ja kwigweesa ha sī, nī ndīlo; jikūng'ogoha na kūdetema. Jose pye jatūūlagwa mu makono ging'we.

³Būlī shiseeng'wa shipanga īsho ng'anda ng'anda, shikūbiza shilīwa shing'we. Ūmo nakang'winhīla sha kūzwa shose, nī haha nang'winha pyī ī shose.

⁴Alīyo ī nyama yaya ū kwīlya na mininga gayo, nguno ū wenūbo būpanga wayo.

⁵Ī mihayo ya mininga ga banhū kwitwa ū mu bing'we, ībize ya kwenhelejiwa na shiinū ījo jikabūlagaga banhū, nūūlū ya kwītwa na banhū a babūlagi ba bichaabo, nakwīdīlīla nene. Munhū ose ose ūlū ūkenaagūla būpanga bo ng'wiye, nene ng'wenekīlī nakūntonda afunye būsomboji kūlwa mhayo gwenūyo.

⁶Ose ose ūyo wita mininga ga munhū, nang'hwe a mininga gakwe gakwitwa na munhū; nguno ū Mulungu akameeja ū munhū mu suso ya ng'wa Mulungu.

⁷Alīyo a bing'we ibyalagi gete, mukwīle no no no; ng'okale ū mu sī mubize bingī mo.

⁸Ū Mulungu ūng'wīla ū Noa na a bitūnja bakwe gīkī,

⁹“Ī haha nalībeeja ilagane ha gatī yane na a bing'we, hamò nī shibyalīlwe shing'we īsho shikwiza ha numa ying'we;

¹⁰pye nī shiseeng'wa shipanga īsho shilī hamò ning'we, noni, ndimu, shiinū; ī shose īsho ng'wafumile nasho mu ngalaba; pyī ī shiseeng'wa shipanga īsho shilī mu sī.

¹¹Ī lilagane lyane īlo nalībeeja ning'we nalīlyīta lībize lya kūshinga ho, Gūtaliigela hangī gwa kūyagaja būpanga bose mu nzīla y'ihūūma lya minzī; lītalabiza ho hangī ihūūma lya kwīkenaagūla ī sī.”

¹²Hūna ū Mulungu ūhaya gīkī, “Ūlū h'ū lūmeng'ho lw'ilagane īlo nalībeeja ha gatī yane na a bing'we, nī shiseeng'wa pyī īsho shilī hamò ning'we; īlo līkūbiza kūlwa shibyalīlwe shose ū mu shikū ījo jiliza.

¹³Naatūūlaga ità lya baashi lyane ū mu malunde, īlo līkūbiza lūmeng'ho lw'ilagane ha gatī yane nī sī.

¹⁴Būl'ikanza ūlū nūyenhela ī sī malunde ga mbula, hūna lichaamīka ità lya baashi ū mu malunde,

¹⁵nakūlizūkwa ī lilagane lyane a ha gatī yane na a bing'we, nī shiseeng'wa shipanga sha būlī mbika. A minzī gatīko kūshika mu mbika y'ihūūma lya kūkenaagūla shose pyī ī sha mibīlī.

¹⁶Būl'ikanza ūlū lichaamīka ità lya bashi ū mu malunde, nakūlībona nalizūkwe ī lilagane lya welelo bose, īlo līlīho ha gatī ya ng'wa Mulungu na shiseeng'wa shose sha būlī mbika.”

¹⁷Ū Mulungu ūng'wīla ū Noa gīkī, “Ū lwenūlū hū lūmeng'ho lw'ilagane īlo nabeejaga ha gatī yane na a bose a ba mibīlī abo balī mu sī.”

¹⁸A bitūnja ba ng'wa Noa abo bakafuma ū mu ngalaba baalī ba Shemu, Hamu na Yafeti. (Ū Hamu walī ise wa ng'wa Kanaani).

¹⁹A benaba h'a bitūnja ba ng'wa Noa, abo kūfuma mubo bakigela banhū ba kūsambaala hose pyī ū mu sī.

²⁰Ali lūūlū īkī ū Noa walī nīmi, akalīma ngūnda ūgūhamba mizabibu.

²¹Lūshikū lūmò aho wang'wa divai ya mu ngūnda gwakwe ūleewa, ūkalaala ng'wiheema lyakwe alī dūūhū.

²²Ū Hamu, ū ise wa ng'wa Kanaani wībona ī minala ya dūūhū ya ng'wa ise, ūfuma hanze kūjūbawīla a baana ba ng'wawe būbīlī wabo.

²³Hūna a boi, ū Shemu nū Yafeti, būsola nguto gwa ng'wenda, bagūbūūcha kū mabega gabo bagūgoloolile, būja nago shigongwa numa, būūkashika būnkudīkīja ū saabo ī minala ya dūūhū yakwe. Ū būshū wabo batikībūkile kū numa kūnola ū saabo aho alī dūūhū.

²⁴Wa kanoga ūmisha nose ū Noa, nū būleewa būbiza bong'wīngaga. Aho wadeeba īyo akang'wītīla ū ng'wtūnja wakwe ū ndo,

²⁵Ūhaya gīkī, “N'azumagwe ū Kanaani! Akūbiza nsese wa basese ū kū baana ba ng'wawe.”

²⁶Ūhaya na gīkī, “Akumīlīijwe ū SEEBA, ū Mulungu wa ng'wa Shemu! Ū Kanaani abize nsese wa ng'wa Shemu.

²⁷Ū Mulungu n'ayīgalīhyage ī sī ya ng'wa Yafeti; nīyo apandīke ha kwikala ū mu maheema ga ng'wa Shemu. Ū Kanaani abize nsese wakwe.”

²⁸Kwīngīīla h'ikanza lya kūbīta ī lihūūma, ū Noa akikala ho myaka magana adatū na makūmi atanò (350),

²⁹Ī myaka ya būlamu bo ng'wa Noa ī yose, yalī magana kenda na makūmi atanò (950), hūna ūcha.