Read Sukuma Bible 2015 – Bibilia Ilagano Lya Kale 2015 2 Sang'weli 17 Bible Online

2 Sang'weli 17 - Sukuma Bible 2015 – Bibilia Ilagano Lya Kale 2015 bible

2 Sang'weli 17

¹Ū Ahisofeeli ongeja kūng'wīla ū Abusalomu, “Nizunīlījage nasolanhye banhū shihūmbī ikūmi na shibīlī nabūūke ū būjikū wa lelo yenīyī nankūūbīje ū Daūdi.

²Nakūja nakang'wisanganīje aho ataalī asedeekile na anogile, nang'wibakīje abbahe, bampeele pye a banhū abo balī hamò nang'hwe. Ū nene nakūntūla ū ntemi dūhū,

³nūkwenhela a banhū. Ū munhū ūyo ūlīnkooba ūlū ūcha bakūshoka dūhū a banhū, nīyo pye bakūbiza balī mhola.”

⁴Ū mhayo gwenūyo gūnyeja ū Abusalomu na a banamhala ba Isilaeli a bose.

⁵Alīyo ū Abusalomu ūhaya, “Aling'witanagi nū Hushai ū muna Aliki, tūng'wigwe nang'hwe ū būhayi wakwe.”

⁶Ū Hushai aho washika ū kū būtongi bo ng'wa Abusalomu, ū Abusalomu ūhaya, “Ū Ahisofeeli wahayaga twīte gīkī na gīkī, ūlībona kinehe, twīte ūmo wahayīlaga? Ūlū ītī chene twinhage nang'ho ū būganikīji wako.”

⁷Ū Hushai ūhaya, “A maganiko ga ng'wa Ahisofeeli gatī gawiza ī likanza īlī.

⁸Ū bebe ūndeebile ūmo alī ū so na a banhū bakwe; ūmanile gīkī a boi balī banhū ba būlūgū ba shikū ningī, nīyo ī haha basaayaga no gītī ndūba yīngījiagwa baana bayo. Hama a higūlya ya henaho ūmanile gīkī ū so ayīmanīīlile ī mihayo ya būlūgū, ū būjikū wenūbū atūbiza ho a ha banhū.

⁹Nīyo nūūlū nī haha wamalaga kūbiswa ng'wihalo ilebe, nūūlū alī ipandī līngī. Hama a banhū abo balaatonge ū kūbūlagwa, ū lūkumo lūkūsambaala hose pyī; gīkī, ‘Bashila kūcha a banhū ba ng'wa Abusalomu.’

¹⁰Na lūūlū a henaho nūūlū ūbiza alīho nshilikale wa ng'holò gītī ya shimba, akwaaba gītī būgondo kūlwa kogoha, nguno pye a Baisilaeli bamanile gīkī ū so ng'wene munhū wa būlūgū, na a babo balī kū lwandī lwakwe bakaja shū.

¹¹Na lūūlū nidegelekage nane a maganiko gane; gīkī, pye a Baisilaeli babilingwe kwandīja Dani kūshisha Beeli-sheba. Bize a halī bebe bingī gete gītī maseni ga ha ng'walo gwa nyanza, hūna ūbatongeele bebe ng'wenekīlī ū kū būlūgū.

¹²Tūje tūkūnkobyaga hose hose ūko alabize wibisaga, tūkang'wikīīle gītī lūme kwika hasī; atūpīla nūūlū hado pye na a banhū bakwe.

¹³Ūlū wihamba kūpeelela kū nzengo nebe, a henaho pye a Baisilaeli bakwiza gītī balī na ngoye j'igokoolo, bagūholomole ū nzengo gwenūyo pye gete kūja kū longa; katizūsaaga ho nūūlū kamenyulwa kado k'iwe.”

¹⁴Ū Abusalomu na a Baisilaeli a bose būhaya, “A maganiko ga ng'wa Hushai ū muna Aliki gabeela kūtinda a ga ng'wa Ahisofeeli.” Īkaja gīko nguno ū SEEBA walī wahela gīkī a kahelele ka ng'wa Ahisofeeli kabipiwe, ū Abusalomu agwīlwe mhayo gwabūbi.

¹⁵Hūna ū Hushai ūbawīla a bagabīji, ū Sadoki nū Abiasaali; ūhaya, “Ū Ahisofeeli walī wang'wīla ū Abusalomu na a banamhala ba Isilaeli kwīta gīkī na gīkī, alīyo ū nene nūbawīla hambū hambū ūlū kwīta gīkī na gīkī.

¹⁶Alilūūlū, twalagi mhola ī haha ū kūlī Daūdi, mung'wīle gīkī, ‘Ūtizūshika a ha būkīlīlo wa mongo ū ng'wikūngū ūlaale henaho, kīlaga gete ī lelo yenīyī, yaya ū kwilewa; ūlū wilewa īkūbipa ī mihayo, ū ntemi akūmilwa, pye na a banhū abo alī nabo!’”

¹⁷A basūmba a ba Yonasani nū Ahimaazi baalī baalenda Enilogeni; baalindīīlīlaga kwenūko ī mihayo, a boi yalī yaya gete ū kūbonwa balingīla ū mu nzengo. Walīho ng'wanikī ntūmami walī wasolwa kūyūbatwalīla koi ī mhola, hūna nabo baja ū kūlī ntemi Daūdi bakang'wīla.

¹⁸Alīyo nsūmba nebe akababona, ūng'wīla ū Abusalomu; na lūūlū a basūmba benabo būbīlī wabo bīnga wangū wangū, būja Bahulimu ha kaya ya ngosha ūmò walī na lwinzī ha gwalugwa yakwe, bika ng'wenūmo.

¹⁹Ū nke wa ngosha ng'wenūyo ūsola ikundīkījo ūkundīkīja a ha nomo gwa lwinzī, hūna wanikīla ho būsīga; yūbiza shilambū ū kūdeeba.

²⁰A banhū ba ng'wa Abusalomu aho biza a halī nkīma ng'wenūyo būmūūja, “Baja halī a ba Ahimaazi nū Yonasani?” Ū nkīma ng'wene ūbashokeja, “Bakīlaga mongo.” Abo baalī batūng'wa būgema ū kūbakooba, alīyo batabapandīkile, būshoka Yelusalemu dūhū.

²¹Abo baalī batūng'wa aho bīnga, a basūmba a babīlī benabo būfuma ū mu lwinzī, būja ū kūlī Daūdi būūkang'winha ī mhola. Būng'wīla, “Igolanyagi wangū mugūkīle ū mongo, nguno ū Ahisofeeli wīhelaga gīkī na gīkī ī mihayo ya kūng'wītīla.”

²²Na lūūlū ū Daūdi na a banhū pye abo baalī hamò nang'hwe būbūūka būgūkīla ū mongo gwa Yolodani. Aho būleela ū būjikū walī atīho nūūlū ūmò ūyo walī ataalī ū kwīkīla ī Yolodani.

²³Alīyo ū Ahisofeeli aho wabona gīkī ū mhayo gwakwe gwaleka ū kūlondeelwa, ūgolanya nzobe yakwe ūdamhīla ūja kū nzengo gwa ng'wawe; ūshika ūlonja lonja ya ha ng'wakwe, hanuma winija ūcha; ūjīkwa mu shigila sha ng'wa ise!

²⁴Hūna ū Daūdi ūja ūūkashika Mahanaimu; ū Abusalomu nang'hwe ūgūkīla ū mongo gwa Yolodani na a Baisilaeli a bose.

²⁵Ū Abusalomu walī wamala kūnsola Amasa kūbiza ntaale wa mabità a ha ng'wanya go ng'wa Yoabu. Ū Amasa walī ng'witūnja wa Ng'wisilaeli nebe witanagwa Isila, walī wantoola nshīke o ng'wa Nahashi Abigaili, ng'wana wa ng'wawe na Seluya ū nina o ng'wa Yoabu.

²⁶A Baisilaeli nū Abusalomu būtūūla ng'hambī yabo mu Gileadi.

²⁷Ū Daūdi aho washika ī Mahanaimu, ūnsanga ho Shoobi ng'witūnja o ng'wa Nahashi muna Laba ya Amoni, na Makili ng'witūnja o ng'wa Amieli muna Lodebaali, na Bazilai muna Logelimu ya Gileadi.

²⁸A banhū benabo baalī bang'wīma nzīla ū Daūdi, biza na shilaalīlo na shiseme sha kūtūmamīla, mabakūli na nungū; hamò na ngano, būsīga, būsu, na shisuumo shikalangilwe, mahalage na nduulu.

²⁹Na būūkī baalī nabo, na mabeelè galaalile, ng'holo, shibanda sha mashishanga galaalile. Ī shose shenīshi shalī sha kūlya ū Daūdi na a banhū abo baalī hamò nang'hwe. Nguno bakahaya, “Lyabanojaga ī litogolo a banhū, nū kūtuuba bigwaga, nī notà yabaminyaga!”