Read Sukuma Bible 2015 – Bibilia Ilagano Lya Kale 2015 2 Sang'weli 21 Bible Online

2 Sang'weli 21 - Sukuma Bible 2015 – Bibilia Ilagano Lya Kale 2015 bible

2 Sang'weli 21

¹Ū mu shikū ja būsugi wakwe ū Daūdi, īkagwa nzala yūbakoya ikanza lya myaka idatū; nose ū Daūdi ūkooba kūmana kūfuma kūlī SEEBA. Ū SEEBA ūng'wīla, “Ī yenīyī īlīmukoya kūlwa nguno ya ng'wa Saulo na kaya yakwe; nguno ya mininga ayo wagiita kūlwa kūbabūlaga Bagibeoni.”

²Hūna ū Daūdi ūbitana a Bagibeoni ūhooya nabo. (A Bagibeoni benebo baalī batī Baisilaeli, baalī basaagīīla kūfuma ng'wihanga lya Baamooli; a Baisilaeli baalī babilahīlīla gīkī batūbayagaja babamale, alīyo ū Saulo kulwa kūtogwa kūbayeja a Baisilaeli na a banhū ba Yuda, ūbeeja mbika ya kūbabūlaga pye a Bagibeoni bashile gete.)

³Na lūūlū ū Daūdi ūbabūūja a Bagibeoni benabo, “Namubeegeje mhayo kī? Mhayo kī ūyo nang'wītīle gūmuyeje mubūlombele ū wingīji wa banhū ba ng'wa SEEBA?”

⁴A Bagibeoni būshosha balīhaya, “A bise tūtūkoobaga feza nūūlū zahabu kūfuma kūlī Saulo nūūlū kūfuma mu kaya yakwe, nīyo a bise tūtī na būdūla wa kūmūlaga munhū ose ose ū mu Isilaeli.” Ū Daūdi ūbabūūja hangī, “Mulītogwa nang'wītīle mhayo kī lūūlū ī gīsī?”

⁵Būnshokeja ū ntemi balīhaya, “Ū munhū ū nkenaagūji ūyo walī na ng'hūmbū ja kūtūyagaja nose tūmalwa gīkī, kūshisha ī haha tūtī n'ipandī hose hose ū mu sī ya Isilaeli,

⁶ū munhū ng'wenūyo tūtogilwe twinhwe bagosha mpungatī ba shibyalīlwe shakwe tūkababūlagīle Gibea ya ng'wa Saulo ū nsolwa o ng'wa SEEBA, hūna tūbatendegese kū būtongi bo ng'wa SEEBA.”

⁷Ū ntemi ūnang'hana ū Mefi-boshesi ū ng'witūnja o ng'wa Yonasani ng'witūnja o ng'wa Saulo, ū ng'wenūyo ūneka ikale mpanga kūlwa nguno ū Daūdi nū Yonasani ū ng'witūnja o ng'wa Saulo baalī biyilahīlīla kū būtongi bo ng'wa SEEBA.

⁸Alīyo ūbasola ba Alimoni na Mefi-boshesi, bitūnja ba ng'wa Aiya nshīke o ng'wa Lisipa; a basūmba benabo walī wamyalīla Saulo. Ū ntemi ūbasola na bitūnja batanò ba ng'wa Melabu, walī wamyalīla Adilieli ng'witūnja o ng'wa Bazilai muna Mehola.

⁹Ū ntemi ūbafunya a banhū benabo, ūbinha a Bagibeoni būbabūlaga hūna būbatendegesa mu lūgūlū kū būtongi bo ng'wa SEEBA. Bose mpungatī būcha lūshikū lūmò; būbūlagwa mu shikū ja wandījo wa makanza ga magesa, aho gakandījaga magesa ga būsīga.

¹⁰Ū Lisipa ū nshīke o ng'wa Aiya ūsola magūnīla wamba hiwe, ga kūyūlaalīla. Atīngile hoi kūfuma ikanza lya kwandya magesa kūshisha yūtūlwa mbula ī mibimba; wikalaga henaho pye a makanza akūlang'hanaga, ī līīmi wajipuuga ī noni jitizūgwa hoi, nī būjikū wajilang'hanaga ī shiinu.

¹¹Ū Daūdi aho wawīlwa ūmo wītīlaga ū nshīke o ng'wa Aiya ū Lisipa, ūyo walī nke ndo o ng'wa Saulo,

¹²ūja ū kū banhū ba Yabeshi-gileadi ūūkageenha a maguha ga ng'wa Saulo na a ga ng'wa Yonasani. (A banhū benabo baalī bīyīnja ī mibimba ī Beeti-shani, bīsola mu wiba wiba ū kwīnga ū mu gwalugwa ya mu nzengo, ūko baalī bīnungeleja a Bafilisiti aho bamūlaga ū Saulo ī Giliboa.)

¹³Na lūūlū ū Daūdi ūgīnja koi a maguha ga ng'wa Saulo na a ga ng'witūnja wakwe ū Yonasani; na a ga banhū abo baalī babūlagwa hūna būtendegeswa ha ng'wape benabo, gūkumingwa nago.

¹⁴A maguha ga ng'wa Saulo na a ga ng'witūnja wakwe ū Yonasani būūkagajīkīla Zeelà mu sī ya Benjamini, mu shigila sha ng'wa Kishi ise o ng'wa Saulo; bīīta yose gīt'ūmo akabalagīīla ū ntemi. Hanuma ya henaho ū SEEBA hū wigwa ū kūlomba kwa banhū bakwe aho bakwīlombelaga ī sī yabo.

¹⁵Kwimanīla wabūūka būlūgū hangī a ha gatī ya Bafilisiti na a Baisilaeli. Ū Daūdi ūtulumenha ajile na a banhū bakwe, ūūkandya kūlwa nabo a Bafilisiti; ū Daūdi ūnoga no.

¹⁶Lyalīho idaaji ū mu Bafilisiti litanagwa lī Ishi-benobu, lya kūfuma mu būbyīle bo ng'wa Lafa; ī chūma sha h'ichimu lyalyo shalī na būdito bo kilo idatū na nusu, hama lyalī na lī lūshū ipya. Ī ling'wana lyenīlo līkangwakwabīla ū Daūdi, lyūsangwa lyahaya kūmūlaga.

¹⁷Alīyo wangūhīlwa na Abishai ng'wana Seluya hū ūnguna ng'wenūyo, ūlītūla ī Līfilisiti lyenīlo ūlībūlaga. Na lūūlū a banhū bakwe ū Daūdi būng'wīla, nīyo būng'wilahīlīla, “Ū bebe yaya lūūlū ū kūfuma hamò nise hangī kūja kū būlūgū, ītizūjimiwa ī tala ya mu Isilaeli.”

¹⁸Shikū jitabītile ningī būgwa būlūgū hangī a ha gatī ya Bafilisiti na a Baisilaeli ipandī lya Gobu. Ī likanza lyenīlo Sibeka muna Hushai ūlībūlaga lī Safu, nalyo lyalī lya kūfuma mu būbyīle bo ng'wa Lafa.

¹⁹Ikanza līngī hangī balwaaga na a Bafilisiti kūko Gobu kwenūko, Elihanani ng'witūnja o ng'wa Yaale-olegimu muna Betelehemu ūlībūlaga lī Goliati lya Gaasi, īlo mpīni gw'ichimu lyalyo lyalī līnang'ha itaale no, hangī igīnu gītī ng'wīsī.

²⁰Mu būlūgū būngī balwīlaga Gaasi, lyalīho idaaji lya nzwaala itandatū tandatū, ū kū makono nū kū mhambala, ī jose jalī nzwaala makūmi abīlī n'inè; nalyo lyalī lya kūfuma mu būbyīle bo ng'wa Lafa.

²¹Lyandya kūbasondagūla a Baisilaeli; ūlisanga Yonasani ng'witūnja o ng'wa Shimea, nkūlūye o ng'wa Daūdi, ūlībūlaga.

²²A madaaji būnè wago genaya gaalī ma muna Gaasi, gaalī ga kūfuma mu būbyīle bo ng'wa Lafa; a gose gakabūlagwa ha sīlīlī ya nkono go ng'wa Daūdi, na banhū bakwe.