Read Sukuma Bible 2015 – Bibilia Ilagano Lya Kale 2015 2 Sang'weli 7 Bible Online

2 Sang'weli 7 - Sukuma Bible 2015 – Bibilia Ilagano Lya Kale 2015 bible

2 Sang'weli 7

¹Na lūūlū ū ntemi aho wigasha ū ng'wikūlū lyakwe ūlembeela, nū SEEBA ūng'wifuuja ū kū banishi bakwe bose abo baalī bampīndīlīgije hose hose,

²ūng'wīla ng'hangi Nasani, “Ū nene ī haha nalī mu numba yawiza ya mitī ya ng'wininga, alīyo ī lisandīko lya ng'wa Mulungu līlī ng'wiheema!”

³Ū Nasani ūnshokeja ū ntemi alīhaya, “Gwītage ūyo ūlī nago ū mu ng'holò yako, nguno ū SEEBA alī hamò nang'ho.”

⁴Ū būjikū wenūbo ū mhayo go ng'wa SEEBA gūng'wizīīla ū Nasani; gūng'wīla,

⁵Jaga ūkang'wīle ū ntūmami wane ū Daūdi, Ū SEEBA alīhaya gīkī, “Ū bebe hū ūkūnizengela numba ya kwikala mo ū nene?

⁶Kūfuma ī likanza īlo nakabīnja a Baisilaeli mu Misili kūshisha lelo īyī, nataalī kwikala mu numba. Naakwījaga ī myaka nakūjaga ūko nū kūko, alīyo ū wikalo wane ng'wiheema dūhū.

⁷Līlīho īpandī lyose lyose ūko naja hamò nabo a banhū bane a Baisilaeli, hūna nūlūngalūnga na nsugi nūūlū ūmò ū mu banhū abo naabalagīlaga kūbadīīma, nūng'wīla gīkī, ‘Nibūlī ūtaalī kūnizengela numba ya mitī ya ng'wininga?’

⁸Alilūūlū, ū ntūmami wane ū Daūdi ng'wīlage gīkī, ‘Ū SEEBA wa būdūla bose alīhaya gīkī, Ū bebe nakwīnja kū madīīmīlo, nūkūlecha nīmo gwa kūdīīma ng'holo nguno naalī natogilwe ūbize nsugi wa banhū bane Baisilaeli.

⁹Ū nene nalī hamò nang'ho būlī kwene ūko ūkūjaga, na a banishi bako nakūjaga nūbayagaja nene ū kū būtongi wako. Na lūūlū ī haha nakūlīkūja no ī lina lyako, lībize itaale gīt'ūmo galī mina ga bataale ba mu sī.

¹⁰Hanuma a banhū bane a Baisilaeli nakūbabeegeja ipandī lyabo benekīlī, nabahambe ho gete, bapandīke kaya yabo ya wikomangīle; booye ū kwikala bakūkoyakoyiagwa. A banhū babūbi batūbakoya hangī gīt'ūmo bīītīlaga ī kwandya.

¹¹Nguno h'ūmo bakūbīītīlaga nī haha a banhū bane a Baisilaeli, kūfuma aho nandīja kūbatūūlīla balamuji. Nīyo nakūkwifuuja gete booye ū kūkūkoya a banishi bako pye a bose.’ Hama a higūlya ya yenīyo ū SEEBA alīhaya gīkī, ‘Ū SEEBA ng'wenekīlī akūkūbeegeja numba.

¹²Ī shikū jako ūlū jūshila, lyūshika ikanza lya kwifuula na bakūlūgenji bako, nakūngūngūhya ūmò wa mu būbyīle wako, wa kūfuma mu nkīmbīlī gwako gete, abize ng'wingīji wako; ū būtemi wakwe nakūwinha nguzu.

¹³Ū ng'wenūyo h'ūyo akūzenga numba kūlwa nguno ya lina lyane; ī lisumbī lya būtemi bokwe nakūlyīta līshinge ho kūshisha welelo bose.

¹⁴Ū nene nakūbiza Ise, ū wei akūbiza ng'wana wane. Ūlū ūhūba nakūntūla na nang'ha gwa banhū; nakūtūmamīla banhū ū kū ntwenya manasu.

¹⁵Alīyo ū būtogwa wane natīko ū kūng'wīngīja gīt'ūmo nakang'wīngīja Saulo, ūyo nakansunda ha mhūjo akwīngīle bebe.

¹⁶Ī numba yako nū būtemi wako shikūshinga ho welelo bose ū kū būtongi wane; ī lisumbī lyako lya būtemi līkwinhwa nguzu shikū jose ja welelo na welelo.’”

¹⁷Ū Nasani ūng'winha ū Daūdi ī mihayo ya koolekegeje kenaka pyī ūmo kagelelile.

¹⁸Hūna ū ntemi Daūdi wingīla mu gatī wigasha kū būtongi bo ng'wa SEEBA ūhaya, “SEEBA wa būdūla bose, ū nene nalī nani, nī kaya yane īlī kīnhū kī, nose ūnishishe mu mbika gītī īyī?

¹⁹SEEBA wa būdūla bose, ū mhayo gwenūyū ū mu miso gako gūlībiza gītī gūlī ndo no, nguno a higūlya ya henaho ongejaga na kūyomba mihayo ya numba ya ntūmami wako kūlwa shikū ja kū būtongi. Ee SEEBA wa būdūla bose, ī yenīyī h'īyo ūkabīītīlaga banhū na kale?

²⁰Ī gīsī lūūlū ū Daūdi ongenje mhayo kī gūngī ū gwa kūkūwīla? Nguno ū bebe SEEBA wa Būdūla bose ūndeebile gete ū ntūmami wako.

²¹Ū mhayo ū ntaale gwenūyū wagwītaga kūlwa nguno ya kwisagīja kwako na kasolele ka ng'holò yako, hūna ūmanīkīja ū ntūmami wako.

²²Ee SEEBA wa būdūla bose, ū būtaale wako būkīlanīgije no; atīho ūngī wa kūlenganījiwa nang'ho, na atīho Mulungu ūngī ūlū ūtī bebe wike, gīt'ūmo twigwīla na matū gise benekīlī.

²³Līlīho ihanga kī līngī ū mu sī īlo līdūgije kūlenganījiwa na Baisilaeli banhū bako, abo Mulungu akaja kūbakomoola gīkī babize bakwe, ibeegeje lina lyakwe wei ng'wenekīlī; hūna ūbeeja mihayo mitaale ya kogohya na kūkaamaaja, ūpeeja mahanga na bamulungu baago gīkī babīngīle a banhū bako abo ūkabakomoola kūfuma Misili?

²⁴Bebe ng'wenekīlī ūbazenga a banhū bako a Baisilaeli, ūbīīta kūbiza bako ba wikomangīle welelo bose. Na ng'hana SEEBA, ūbiza ūlī Mulungu wabo.

²⁵Alilūūlū SEEBA Mulungu, ū mhayo ūyo wagūhayaga kūlwa nguno yane nene ntūmami wako nī numba yane, gūshikīlījage gūje gīko shikū jose welelo na welelo; ītaga gīt'ūmo kūlī kwisagīja kwako.

²⁶Ū mu gīko ī lina lyako līkūgūngūhiwa welelo bose; a banhū bakūhaya gīkī, ‘Ū SEEBA wa būdūla bose hū ng'wene ū Mulungu wa Baisilaeli.’ Hūn'ī kaya ya ntūmami wako ū Daūdi īkūlama ū kū būtongi wako.

²⁷Nguno ū bebe SEEBA wa būdūla bose, Mulungu wa Baisilaeli, hū bebe wankundūlīlaga ū ntūmami wako ū mhayo gwenūyū ūng'wīla gīkī, ‘Nakūkūzengela numba.’ H'ī nguno yene ū ntūmami wako wapandīkaga būshisha ng'holò wa kūkwenhela būlombi gītī wenūbū.

²⁸Ee SEEBA wa Būdūla bose, ū bebe hū ūlī Mulungu! Ī mihayo yako īlī ya kūsanyiwa; bebe hū wang'wisagījaga ū ntūmami wako ī mihayo ī yawiza īyī.

²⁹Na lūūlū SEEBA wa būdūla bose, ni gūnyejage ng'hana ū gwa kwīyīlūkīla ī numba ya ntūmami wako, īhangame ū kū būtongi wako shikū jose ja welelo na welelo. Nguno hū bebe wagūhayaga ū gwenūyū; na lūūlū īkī wīfuuhaga ī numba ya ntūmami wako, ng'hana īkwīlūkīlwa welelo bose.”