Read Sukuma Bible 2015 – Bibilia Ilagano Lya Kale 2015 2 Sang'weli 8 Bible Online

2 Sang'weli 8 - Sukuma Bible 2015 – Bibilia Ilagano Lya Kale 2015 bible

2 Sang'weli 8

¹Hanuma ya yose yenīyī, ū Daūdi ūbapyena a Bafilisiti; nīyo ūbasuga būbiza ha sīlīlī yakwe gete. Nū nzengo gwa Metegama ūgūsola kūfuma ū mu makono gabo.

²Na a Bamoabu ūbapyeena, nīyo a bene ūlagīla balambalale hasī, hūna lūyūtūmamīlwa lūgoye lwa būlīhu būlebe, lwagoloolwa shipimo shibīlī wababūlaga a benabo, ī sha kadatū wabaleka bikala bapanga. Na lūūlū ū mu gīko a Bamoabu būbiza ha sīlīlī ya ng'wa Daūdi, ūyūbatobisha goodi.

³Ikanza ilebe ū Daūdi wajaga kū mongo gwa Flati kūtūūla meng'ho ja lūbīmbī lwa būsugi wakwe, aho alī mu nzīla wilwisha būlūgū na ntemi Hadadeza wa Zoba, ng'witūnja o ng'wa Lehobu.

⁴Ū Daūdi ūdima magogoteni ga būlūgū shihūmbī shimò ga ng'wa Hadadeza, na badamhīji ba falasa shihūmbī mpungatī,[10] na bashilikale shihūmbī makūmi abīlī ba kūshimīza bo magūlū. Ī falasa ī ningī ūjitīna a matimba, ūlekeela igana līmò.

⁵Biza Baalamu ba Damasiko kūngunanha ū Hadadeza ū ntemi wa Zoba, alīyo ū Daūdi ūbabūlaga banhū shihūmbī makūmi abīlī ū mubo.

⁶Ū Daūdi ūtūūla ng'hambī ja bashilikale ba kūlang'hana ū mu Alamu ya Damasiko; na a Baalamu būbiza ha sīlīlī ya būsugi wakwe, nabo ūyūbatobisha goodi. Ū SEEBA wang'winhaga ū Daūdi būtindi būlī kwene ūko wajaga.

⁷Batūmami ba ng'wa Hadadeza baalī na mūda ja zahabu ūjisola ū Daūdi, ūja najo Yelusalemu.

⁸Ū Daūdi ūsola shaba ningī no kūfuma ū mu mizengo ya ng'wa Hadadeza ya Teba na Belotai.

⁹Ntemi Toi wa Hamati aho wigwa gīkī ū Daūdi walīpyenile pyī ī libità lya ng'wa Hadadeza,

¹⁰ūntūma ng'witūnja wakwe Yolamu ūja ū kūlī ntemi Daūdi kūngīsha na kūnūmba, kūlwa nguno ya kūmpyena ū Hadadeza ū mu būlūgū, nguno ng'hangala ningī ū Hadadeza wikalaga wiza kūndumīla ū Toi. Ū Yolamu aho wiza akenha shikolo sha feza, na sha zahabu, na sha shaba.

¹¹Ī shose shenīshi ū ntemi Daūdi ūmfunīja SEEBA, gīt'ūmo walī wajīītīla ī feza nī zahabu ja kūfuma kū mahanga a gangī, ayo walī wagapyena,

¹²mahanga gītī ga Edomu, Moabu, Baamoni na Bafilisiti, na Baamaleki. Nī shisho shikading'wa kūfuma kūlī Hadadeza ng'witūnja o ng'wa Lehobu ntemi wa Zoba.

¹³Ū lūkumo lwa ng'wa Daūdi lūkongeja no ū kūsambaala aho wafuma kūbabūlaga Baedomu shihūmbī ikūmi na shinaane kū sī ya ntubīlo, īyo yalī sī ya munhu.

¹⁴Ū mu sī ya Edomu ūtūūla ng'hambī ningī ja bashilikale ba kūlang'hana, nīyo pye a Baedomu būbiza ha sīlīlī ya būsugi bo ng'wa Daūdi. Nguno ū SEEBA wang'winhaga ū Daūdi būtindi būlī kwene ūko wajaga.

¹⁵Hūna lūūlū ū Daūdi ūbiza nsugi wabo pye a Baisilaeli, ū būsugi wakwe ū kū banhū bakwe bose walī wawiza na būtūngīlīgije.

¹⁶Ū ntaale wa mabità ga bashilikale walī Yoabu ng'wana Seluya; ū ng'wandīki wa mihayo ya būsugi walī Yehoshafati ng'witūnja o ng'wa Ahiludi.

¹⁷A bagabīji baalī Sadoki ng'witūnja o ng'wa Ahitubu na Ahimeleki ng'witūnja o ng'wa Abiataali; Selaya walī ng'wandīki.

¹⁸Benaya ng'witūnja o ng'wa Yehoyada walī ntaale wa Bakeleeti na Bapeleeti; a bitūnja ba ng'wa Daūdi baalī bagabīji.