Read Sukuma Bible 2015 – Bibilia Ilagano Lya Kale 2015 2 Sang'weli 9 Bible Online

2 Sang'weli 9 - Sukuma Bible 2015 – Bibilia Ilagano Lya Kale 2015 bible

2 Sang'weli 9

¹Hanuma ya yenīyī ū Daūdi ūbūūja, “Ataalī alīho munhū ose ose wa mu numba ya ng'wa Saulo nang'wītīle yawiza kūlwa nguno ya ng'wa Yonasani?”

²Ū mu shikū jenījo walīho ntūmami wa ha kaya ya ng'wa Saulo witanagwa ī lina lyakwe Ziba. Būng'witana wiza ū kūlī Daūdi; ū ntemi ūmūja, “Ū bebe hū ūlī Ziba?” Nang'hwe ūshosha, “Hū ng'wene ū ntūmami wako.”

³Ū ntemi ūmūja, “Atīho munhū ose ose wa mu kaya ya ng'wa Saulo nang'olekeje wiza bo ng'wa Mulungu?” Ū Ziba ūnshokeja ū ntemi ūhaya, “Alīho ng'witūnja o ng'wa Yonasani alemehalile a magūlū.”

⁴Ū ntemi ūbūūja, “Alī halī?” Ū Ziba ūshosha ūhaya, “Alī Lodebaali ha ng'wa Makili, ng'witūnja o ng'wa Amieli.”

⁵Ū ntemi ūlagīja ūīlwa ko ī Lodebaali, ū kū ng'wa Makili ng'witūnja o ng'wa Amieli.

⁶Ū Mefi-boshesi ng'witūnja o ng'wa Yonasani ū ng'witūnja o ng'wa Saulo, aho washika ū kū būtongi bo ng'wa Daūdi, winama kūlwa koolekeja ikūjo. Ū Daūdi ūhaya, “Mefi-boshesi!” Nang'hwe widīka, “Hū nene ntūmami wako.”

⁷Ū Daūdi ūng'wīla, “Lekaga ū kogoha, nakūkwītīla yawiza kūlwa nguno ya ng'wa so ū Yonasani. Pye a malaale ayo gaalī ga ng'wa gūkūyo Saulo nakūkūshokeja, hama ū bebe ūkūyūlīīla ha meeza yane būlī lūshikū.”

⁸Ū Mefi-boshesi winama, hūna ūshosha, “Ū ntūmami wako alī kī nang'hwe, nose ūlole na mvwa īchile gītī nene ūyū?”

⁹Hūna ū ntemi ūng'witana ū Ziba ū ntūmami wa ha kaya ya ng'wa Saulo ūng'wīla, “Ū ng'wizūkūlū o ng'wa so būgonzo nang'winhaga būlī shikolo īsho shalī sha ng'wa Saulo na kaya yakwe.

¹⁰Ū bebe na a bitūnja bako, hamò na a batūmami bako mukūyūnīmīla ī migūnda yakwe ng'wang'wenhela a matwajo, ū ng'wizūkūlū o ng'wa so būgonzo apandīke sha kwigunanhīla. Nīyo ū Mefi-boshesi ū ng'wizūkūlū o ng'wa so būgonzo akūyūlīīla ha meza yane būlī lūshikū.” (Ū Ziba walī na bitūnja ikūmi na batanò, na batūmami makūmi abīlī.)

¹¹Ū Ziba ūshosha, “Ū nene ntūmami wako nakwīta būlī mhayo ūyo ūlanilagīje ū nene ntūmami wako baba ntemi.” Na lūūlū ū Mefi-boshesi ūyūlīīla ha meza ya ng'wa Daūdi gīt'ūmò wa bitūnja ba ntemi.

¹²Ū Mefi-boshesi walī na ng'witūnja ataalī ndo; witanagwa Mika. A banhū ba mu kaya ya ng'wa Ziba a bose būbiza batūmami ba ng'wa Mefi-boshesi.

¹³Ū wei ū Mefi-boshesi ūbiza ng'wikaji wa mu Yelusalemu nguno būlī lūshikū walīīlaga ha meeza ya ntemi; walī alemehalile a magūlū.