Read Sukuma Bible 2015 – Bibilia Ilagano Lya Kale 2015 1 Batemi 19 Bible Online

1 Batemi 19 - Sukuma Bible 2015 – Bibilia Ilagano Lya Kale 2015 bible

1 Batemi 19

¹Ū Ahabu ūng'wīla ū Yezebeli pyī ī mihayo īyo akīyīta ū Eliya, nū mumo akababūlagīla na līlūshū pye a bahangi.

²Hūna ū Yezebeli ūtūma munhū ū kūlī Eliya kūhaya, “A bamulungu ni banitūlage hataale na kūtinda ho, ūlū īlashike hīkī ī ntondo, nasangwe nataalī kūwīta ū būpanga wako kūbiza gītī bo ng'wa ūmò wa bahangi benabo.”

³Ū Eliya ūbona apeele, iipīje ū būpanga bokwe; aho washika Beeli-sheba mu sī ya Yuda, ūneka henaho ū ntūmami wakwe.

⁴Ū wei ūja lūgendo lwa lūshikū lūgima ūkolobela mu gatī yitogolo; ūshika ha līntī lya kaniniigwe wigasha mu mbeho yalyo, ūlomba gīkī hambū hambū ache. Ūhaya, “Ee SEEBA, nigejaga lūūlū ī haha, nīngījage ū būpanga; nguno ū nene natī wawiza kūbaheeba a bakūlūgenji bane!”

⁵Hūna ūlaala ū mu mbeho ya ntī gwenūyo ūbītwa tūlo; kwimanīla malaika wankuumya ūng'wīla, “Bebe būkaga ūlye shilīwa.”

⁶Kūlola lola hoi ī gīkī, ūbona ngatī gookejiagwa ha makala ga moto, n'ibīlīka lya minzī ga kūng'wa; ī shenīsho shalī bbihī na a haaho walī atūūlile ū ntwe gwakwe. Ūsola ūlya, na a minzī ūng'wa, ūlaala hangī.

⁷Ū malaika o ng'wa SEEBA wiza hangī lūkangala lwa kabīlī ūnkuumya ūng'wīla, “Būūkaga ūlye nguno ūlī na lūgendo lūlīhu no, lūkūkūheeba.”

⁸Ūbūūka ng'hana, ūlya nū kūng'wa ūng'wa. Ī shilīwa shenīsho shūng'winha nguzu ja kūshimīza lūgendo lwa shikū makūmi anè līīmi na būjikū, kūshisha ūshika kū lūgūlū lwa Holebu, lūgūlū lwa ng'wa Mulungu.

⁹Aho washika kwenūko wingīla ng'wihalo ūlaala ng'wenūmo ī būjikū; kwimanīla ū mhayo go ng'wa SEEBA gwang'wizīīla gūlīmūja, “Ūlīta kī a henaha Eliya?”

¹⁰Ūhaya, “Nalī na wiilu no kūlwa nguno ya ng'wa SEEBA, ū Mulungu wa būdūla bose, nguno a Baisilaeli baalīlekile ī lilagane lyako, nī myalīlo yako bīsambaagūla, na a bahangi bako būbabūlaga. Naasaagile nene iyene dūhū, alīyo nū nene ī haha balībūkooba ū būpanga waane bawīnje!”

¹¹Ū SEEBA ūng'wīla, “Fumaga hanze ūkīmīīle ha lūgūlū, kū būtongi bo ng'wa SEEBA; nguno ū SEEBA alīhaya kūbīta.” Kwimanīla gwabūūka nyaga ntaale gwa nguzu, gūbīnzagūla mitī na kūpaanagūla mawe kū būtongi bo ng'wa SEEBA, alīyo ū SEEBA walī atīmo ū mu nyaga gwenūyo. Aho gwabīta ū nyaga yūding'himīla nyahīnga, alīyo ū SEEBA walī atīmo ū mu nyahīnga yenīyo.

¹²Aho yabīta ī nyahīnga gwiza moto, alīyo ū SEEBA walī atīmo nū mu moto gwenūyo. Gwahayūbīta ū moto, wigwa ilaka ikoonu līlīyomba mu būlembeezu.

¹³Ū Eliya aho waliigwa ī lilaka lyenīlo wifīkīja ng'wenda ū kū būshū wakwe; ūfuma hanze ūkīmīīla a ha nyango gwa kwingīlīla ū ng'wihalo. Hūna ilaka lyūnyombya līlīmūja, “Ūlīta kī ū kūūnū Eliya?”

¹⁴Ūhaya, “Nalī na wiilu no kūlwa nguno ya ng'wa SEEBA ū Mulungu wa būdūla bose, nguno a Baisilaeli baalīlekile ī lilagane lyako, nī myalīlo yako bīsambaagūla, na a bahangi bako būbabūlaga. Naasaagile nene iyene dūhū, alīyo nū nene ī haha balībūkooba ū būpanga wane bawīnje!”

¹⁵Ū SEEBA ūng'wīla, “Shokaga ūbītīle ī nzīla īyo wizīīlile, ūje kwitogolo lya Damasiko; ūlū ūshika koi ūkūng'witīīla maguta Hazaeli abize ntemi wa Alamu.

¹⁶Hanuma na Yehu ng'witūnja o ng'wa Nimushi ūkūng'witīīla maguta abize ntemi wa Isilaeli; hanuma ya henaho ūkūng'witīīla maguta Elisha ng'witūnja o ng'wa Shafati muna Abeli-mehola, alabize ng'hangi a ha ng'wanya gwako.

¹⁷Ū Yehu akūmūlaga būlī ng'wene ūyo alalūpūlūgūke ū lūshū lwa ng'wa Hazaeli, ū wa kūlūpūlūgūka ū lūshū lwa ng'wa Yehu, Elisha akūmūlaga.

¹⁸Alīyo ū mu Isilaeli balīmo banhū shihūmbī mpungatī, abo nabalekile bikale bapanga; a benabo balemile ū kūntugīja mazwi ū Baalī, nī milomo yabo ītaalī kūmbipa na hado yaya.”

¹⁹Na lūūlū ū Eliya wīnga a henaho; ūmona Elisha ng'witūnja o ng'wa Shafati akūlīmaga na nzīkū jakwe makūmi abīlī n'inè jitungilwe majooki. Ū wei ng'wenekīlī walī kū numa hamò n'ibīlī jaho. Hūna ū Eliya ūbītīla haho bbihī, aho washika hoi ūgūsola ū ng'wenda gwakwe ūmponekeja ū Elisha.

²⁰Ū Elisha ūjileka ī nzīkū jakwe ūmpeeleela ū Eliya, ūshika ūng'wīla, “Nizunīlījage naje nakanage tame baba na mayū; nakwiza tūje hamò.” Ū Eliya ūnshokeja, “Shokaga dūhū ū bebe; ī gīsī naakwītīla mhayo kī ū nene?”

²¹Ū Elisha ūneka, ūshoka; ūshikīla kūjisīnza ī nzīkū jakwe, a majooki gajo ūgabbutagūla jūbiza ng'hwi ja kūjizugīla ī nyama; ūbinha banhū būlya. Hūna ūnkūūbīja ū Eliya ūūkabiza ntūmami wakwe.