Read Sukuma Bible 2015 – Bibilia Ilagano Lya Kale 2015 2 Batemi 14 Bible Online

2 Batemi 14 - Sukuma Bible 2015 – Bibilia Ilagano Lya Kale 2015 bible

2 Batemi 14

¹Mu ng'waka gwa kabīlī go ng'wa Yehoashi ng'witūnja o ng'wa Yehoahazi ntemi wa Isilaeli, Amazia ng'witūnja o ng'wa Yoashi ūbiza ntemi wa Yuda.

²Aho alandya kūbiza ntemi walī na myaka makūmi abīlī n'ītanò; ūsuga alī mu Yelusalemu ikanza lya myaka makūmi abīlī na kenda. Ū nina witanagwa Yehoadini, muna Yelusalemu.

³Ū Amazia akīīta yawiza ū mu miso ga ng'wa SEEBA; kwike atashikile ūmo walī ū nkūlūgenji wakwe ū Daūdi. Ū mu mihayo yose walondeelaga kashimīzīle ka ng'wa ise Yoashi.

⁴Na a mapandī ga higūlya gatīnjiwe; a banhū baalī bataalī būja koi kūfunya shitambò na kūzuukīja būbbani.

⁵Ū Amazia aho wabona gīkī wabūdima chiza ū būsugi, ūbabūlaga a batūmami ba mu būsugi bokwe abo baalī bamūlaga ū ntemi ū ise.

⁶Alīyo a bitūnja ba babūlagi benabo atababūlagile, nguno h'ūmo handīkīlilwe ū mu shitabo sha shilagīlo sha ng'wa Musa; ūmo SEEBA alagīlile, “A babyaji yaya ū kūbūlagwa kūlwa nguno ya būhūbi wa baana babo, na a baana batizūbūlagwa kūlwa nguno ya būhūbi wa babyaji babo; būlī munhū akūcha kūlwa būhūbi wakwe wei ng'wenekīlī.”

⁷Ū Amazia hū ng'wene ūyo akabapyena bana Edomu mu sī ya ntubīlo; īyo yalī sī ya munhu, ūbabūlaga banhū shihūmbī ikūmi ū mubo. Nū nzengo gwa Sela ūgūdima, ūgūgalūcha ī lina gūbiza Yokiseli, lina īlo na lelo lītaalī līkūtūmamaga.

⁸Hanuma ya henaho ū Amazia ūtwala nhūng'wa kūlī ntemi wa Isilaeli ū Yehoashi ng'witūnja o ng'wa Yehoahazi, ng'witūnja o ng'wa Yehu; ūng'wīla, “Nzūgū tūpamanye būshū kū būshū ū bebe nū nene.”

⁹Alīyo ū Yehoashi ūnshokeja ū Amazia ū ntemi wa Yuda ūng'wīla, “Kagwaata kalebe kakigīmba gīmba ng'wipoolu lya Lebanoni, kūtwala mhola kū ntī gwa manga ū mu Lebanoni ng'wenūmo; kūlagīja kalīhaya, ‘Nfunyage ū nshīke wako atoolwe na ng'witūnja wane!’ Alīyo kwimanīla shiinū ya muumo Lebanoni ng'wenūmo yūbītīla ī mhandī jenījo, yūkapandagīla a kagwaata kenako!

¹⁰Gashi īkī wabapyenile bana Edomu hū wītile lūgiili giili. Bebe ni wayegela būtindi wako dūhū, wikale kū ng'wako kwenūko! Ī gete waseeseelilwe kī, nose ūlīhaya kwiyenheleja makoye ga kūkūgwisha ū bebe nī Yuda?”

¹¹Alīyo ū Amazia atigwiile, nose ū Yehoashi ū ntemi wa Isilaeli ūbūūka kūjūndumīla; na ng'hana ū wei nū Amazia ū ntemi wa Yuda būpamanya būshū kū būshū balī Beti-shemeshi mu sī ya Yuda.

¹²Ī Yuda yūpyenwa kībi no na a Baisilaeli, būlī munhū ūpeela ashokile kū ng'wakwe.

¹³Aho balī ū mu būlūgū wa Beti-shemeshi wenūbo, ū Yehoashi ū ntemi wa Isilaeli ūndima ū Amazia ū ntemi wa Yuda, ū ng'witūnja o ng'wa Yoashi, ng'witūnja o ng'wa Ahazia. Hanuma ū Yehoashi ūja ī Yelusalemu ūūkīgwisha ī ndugu ya Yelusalemu kwandīja kū mita gwa Efulaimu kūja kū Mita gwa Kuluba, ibbala lya būlīhu wa fuuti magana atandatū.

¹⁴Ī zahabu nī feza ūjisola, pyī nī shikolo ī shingī īsho akapandīka kūfuma mu hekalu ya ng'wa SEEBA, nū kūfuma ū mu mabīkīlo ga sabo ga mu numba y'ikūlū. Ūdima na banhū ūbajana aho alīshoka Samalia.

¹⁵Mihayo yīngī ī ya mu shikū ja būtemi bo ng'wa Yehoashi, īyo wīta nī ya būtindi wakwe, pyī nī ya būlūgū wakwe ūbo akalwa na Amazia ntemi wa Yuda, ī yose yandīkilwe mu shitabo sha ng'hūlū ja batemi ba Isilaeli.

¹⁶Ū Yehoashi wifuula na bakūlūgenji bakwe, ūjīkwa mu nzengo gwa Samalia, hamò na batemi ba Isilaeli. Ng'witūnja wakwe Yeloboamu wingīla a ha ng'wanya gwakwe, ūbiza ntemi.

¹⁷Kwike ū Amazia, ū ng'witūnja o ng'wa Yoashi, ū ntemi wa Yuda, akikala alīho mpanga kūshisha ikanza lya myaka ikūmi n'ītanò, a ha numa ya kūcha kwa ng'wa Yehoashi ū ng'witūnja o ng'wa Yehoahazi ū ntemi wa Isilaeli.

¹⁸Mihayo yīngī ī ya mu shikū ja būtemi bo ng'wa Amazia yandīkilwe mu shitabo sha ng'hūlū ja batemi ba Yuda.

¹⁹A bana Yelusalemu būnīīla gwīnda ya kūhaya kūmūlaga, aho wadeeba ūtoloka ūpeelela Lakishi, alīyo būtūma banhū būnkūūbīja ī Lakishi būūkamūlaga.

²⁰Hūna wenhwa ha falasa wiza ūjīkwa mu Yelusalemu hamò na bakūlūgenji bakwe mu nzengo go ng'wa Daūdi.

²¹Hanuma a banhū ba Yuda a bose būnsola ng'witūnja wakwe Azalia,[4] būntemya a ha ng'wanya gwa ng'wa ise ū Amazia; walī na myaka ikūmi n'ītandatū.

²²Aho wifuula ū Amazia hamò na bakūlūgenji bakwe, ū Azalia ūgūshosha ū nzengo gwa Elasi mu būsugi wa Yuda, nīyo ūgūzenga būpya.

²³Mu ng'waka gw'ikūmi n'īnè go ng'wa Amazia ng'witūnja o ng'wa Yoashi ntemi wa Yuda, Yeloboamu ng'witūnja o ng'wa Yehoashi ūbiza ntemi wa Isilaeli mu Samalia; ūsuga ikanza lya myaka makūmi anè na gūmò.

²⁴Nang'hwe wīta yabūbi ū mu miso ga ng'wa SEEBA, atalekanile nū būhūbi bo ng'wa Yeloboamu ū ng'witūnja o ng'wa Nebati, ūbo walī wabenheleja a Baisilaeli kūhūba.

²⁵Hū ng'wene ūyo akalūshosha ū lūbīmbī lwa sī ya Isilaeli kūfuma Lebo lūūkashika kū nyanza ya Alaba, kūlenganīla na mhayo go ng'wa SEEBA, ū Mulungu wa Isilaeli; ūmo walī wayombela mu nzīla ya ntūmami wakwe Yona ng'witūnja o ng'wa Amitai, ūyo walī ng'hangi wa Gaasi-hefa.

²⁶Ū SEEBA akabūbona ū būbi wa būluhi ūmo būlī munhū waluhīlaga ū mu Baisilaeli, abize nsese nūūlū alī mu wiyaabī; walī atīho ose ose ū wa kūbagunanha.

²⁷Na lūūlū īkī ū SEEBA walī atahayile gīkī akūlīpyagūla līshile ho gete ī lina lya Baisilaeli ū mu sī, akabapīja mu nzīla ya nkono go ng'wa Yeloboamu ng'witūnja o ng'wa Yehoashi.

²⁸Mihayo yīngī ī ya mu shikū ja būtemi bo ng'wa Yeloboamu yandīkilwe mu shitabo sha ng'hūlū ja batemi ba Isilaeli; pyī īyo wīta nī ya būtindi wa mabità gakwe mu būlūgū, nū mumo akīshokeja mu sī ya Isilseli mizengo ya Damasiko na Hamasi īyo yalī ya Yuda.

²⁹Nang'hwe ū Yeloboamu wifuula na bakūlūgenji bakwe, a batemi ba Isilaeli; ng'witūnja wakwe Zekalia ūbiza ntemi a ha ng'wanya gwakwe.