Read Sukuma Bible 2015 – Bibilia Ilagano Lya Kale 2015 2 Batemi 2 Bible Online

2 Batemi 2 - Sukuma Bible 2015 – Bibilia Ilagano Lya Kale 2015 bible

2 Batemi 2

¹Ū lūshikū lwene ū SEEBA wantwalaga ū Eliya ng'wigūlū mu nzīla ya nyaga gwa nshūlūūlū, ū Eliya nū Elisha bashimīzaga hamò kūfuma Giligaali.

²Hūna ū Eliya ūng'wīla ū Elisha, “Ikalaga henaha nguno ū SEEBA wanitūmaga kūja Beeseli.” Ū Elisha ūhaya, “Ūmo SEEBA alī mpanga, na gīt'ūmo bebe ūlī mpanga, natīko ū kūkūleka.” Na lūūlū būja dege būūkashika ī Beeseli.

³Aho bashika koi, a bahangi ba Beeseli būng'wīla ū Elisha, “Ūmanile gīkī ū SEEBA alīkwīngīja ū so būgonzo ī lelo?” Ū Elisha ūhaya, “Namanile huumūlagi dūhū a bing'we.”

⁴Ū Eliya ūng'wīla, “Ikalaga henaha Elisha, nguno ū SEEBA wanitūmaga kūja Yeliko.” Ū Elisha ūhaya, “Ūmo SEEBA alī mpanga, na gīt'ūmo bebe ūlī mpanga, natīko ū kūkūleka.” Na lūūlū būja dege būūkashika ī Yeliko.

⁵Aho bashika koi, a bahangi ba Yeliko būng'wīl'ū Elisha, “Ūmanile gīkī ū SEEBA alīkwīngīja ū so būgonzo ī lelo?” Ū Elisha ūhaya, “Namanile huumūlagi dūhū a bing'we.”

⁶Ū Eliya ūng'wīla, “Ikalaga henaha nguno ū SEEBA wanitūmaga kūja kū mongo gwa Yolodani.” Ū Elisha ūhaya, “Ūmo SEEBA alī mpanga, na gīt'ūmo bebe ūlī mpanga, natīko ū kūkūleka.” Na lūūlū būshimīza dege bajile kū būtongi.

⁷Banhū makūmi atanò ū ng'wibità lya bahangī būbalondeela; kwike bīmīīla ka kūle hoi hado balolelile ū kū mongo gwa Yolodani, ūko walī ū Eliya nū Elisha.

⁸Ū Eliya ūgūsola ū ng'wenda ūyo walī igumīīlile, ūgūlingalinga, hūna ūgūtūmammīla kūgatūla a minzī; gūgabanhīka kū būlyo na kū lūmoso, būbīta būbīlī wabo balīshimīza hasī nyūmu.

⁹Aho bakīla, ū Eliya ūng'wīla ū Elisha, “Niwīlage ū mhayo ūyo ūlītogwa nakwītīle aho nataalī kūsolwa nakwīngīle.” Ū Elisha ūhaya, “Nalīlomba napandīke ng'hangala ibīlī ngabo gwa moyo ūyo gūlī mulī bebe.”

¹⁰Ū Eliya ūhaya, “Walomba mhayo ndimu, alīyo ūlū ūnibona a h'ikanza īlo nalīsolwa kūkwīngīla, ū mhayo gwenūyo gūkūbiza gwako, kwike ūlū ītī chene numho ndūhū.”

¹¹Aho bakūshimīzaga kūnū bakūlūngalūngaga, kwimanīla lilonga igogoteni lya moto na falasa ja moto, lyūbalekanya, ū Eliya ūhwehulwa nyaga gwa nshūūlūlū kūja ng'wigūlya.

¹²Ū Elisha ūgūbona ū mhayo gwenūyū; ūlīla alīhaya, “Baba! Baba! Magogoteni ga Isilaeli, na badamhīji ba falasa ba Isilaeli!” Ū Elisha atamonile hangī ilalī. Hūna ūshidima ī shizwalo shakwe, ūshitandūla habīlī.

¹³Ūgūsola ū ng'wenda ūyo gūkalagala kūfuma kūlī Eliya, ūshoka ūja nago ūkīmīīla a ha lūgegu lwa mongo gwa Yolodani.

¹⁴Hūna ū ng'wenda ūyo akagūlagaja Eliya ūgūdima ūgatūla a minzī nū ng'wenda gwenūyo; kūnū alībūūja, “Alīhalī ū SEEBA, ū Mulungu o ng'wa Eliya?” Aho wagatūla a minzī gūgabanhīka kū būlyo na kū lūmoso, ūgūkīla ū mongo.

¹⁵A bahangi ba Yeliko abo balolaga bīmīīlaga ka kūle būhaya, “Ū būdūla bo ng'wa Moyo ūbo walī mulī Eliya ī haha būlī mulī Elisha!” Hūna būnsūng'wanha, bahayūshika aho walī binama ū kū būtongi wakwe kūshisha hasī.

¹⁶Būng'wīla, “Baba a bise batūmami bako tūlī na bagosha makūmi atanò ba nguzu. Leka baje bakankoobe ū so būgonzo; hamo ū Moyo o ng'wa SEEBA adūgije kūbiza wamūūchaga ūūkaneka mu lūgūlū lūlebe nūūlū kū mahululu malebe.” Ū Elisha ūlema alīhaya, “Yaya ū kūbatūma.”

¹⁷Kwike būng'wiyandīīla no, nose ūcha minala ū kwikala alīlema. Na lūūlū ūhaya, “Batūmagi naheene baje lūūlū.” Būtūma banhū makūmi atanò, būūkamala shikū idatū bakūkoobaga, būlemeelwa ū kūmpandīka.

¹⁸Būshoka ū kūlī Elisha, walī Yeliko; ūbawīla, “Natamulemegije ū kūja?”

¹⁹A banhū ba mu nzengo gwenūyo būng'wīla ū Elisha, “Baba būgonzo ūlīgūbona ū nzengo gwenūyū gīkī gūlī ha soga jigi jigi; alīyo a minzī gaho mabi no, nī sī ītabbiishaga ī shilīwa.”

²⁰Nang'hwe ūbawīla, “Nenhelagi ibbakuli ipya aha.” Būng'wenhela.

²¹Ūja ū kū lūzwīlo lwa minzī ūūkiitīla ko munhu; hūna ūhaya, “Ū SEEBA alīhaya gīkī, ‘Aminzī genaya nagapījaga. Gatenha lūfu hangī, nūūlū gatūyenheleja ī sī īleke kūbbiisha shilīwa.’”

²²Na ng'hana kūfuma lwise lwenūlo a minzī genayo gūbeela kūshisha na lelo īyī; gīt'ūmo gwalī ū mhayo ūyo akagūyomba Elisha.

²³Ū Elisha wīnga a henaho ūja kū nzengo gwa Beeseli, aho alī ū mu nzīla ajile, bayanda balebe bafumaga mu nzengo bandya kūmela balīng'wīla, “Bebe o wanga, inungage ng'wigūlya! O wanga, inungage ng'wigūlya!”

²⁴Ūgalūka ūbalola, aho wababona ūbazuma mu lina lya ng'wa SEEBA. Jūpuluka ndūba ibīlī kūfuma mu masaka jūbasaasagūla bayanda makūmi anè na babīlī.

²⁵Ū wei ūgoloola ajile kū lūgūlū lwa Kalimeli, wahayīnga ū kwenūko, ūshoka Samalia.