Read Sukuma Bible 2015 – Bibilia Ilagano Lya Kale 2015 2 Batemi 21 Bible Online

2 Batemi 21 - Sukuma Bible 2015 – Bibilia Ilagano Lya Kale 2015 bible

2 Batemi 21

¹Ū Manase walī na myak'ikūmi n'ībīlī aho alandya kūbiza ntemi, ūsuga alī mu Yelusalemu ikanza lya myaka makūmi atanò n'ītanò. Ū nina witanagwa ī lina lyakwe Hefuziba.

²Akīīta yabūbi no ū mu miso ga ng'wa SEEBA, kūlwa kūlondeela nhūngwa ja mahanga ga banhū abo SEEBA walī wabapeeja gīkī babīngīle a Baisilaeli.

³Ūgazenga hangī a mapandī ga higūlya ayo ise Hezekia walī wagakenaagūla, ūzenga na ng'walīlo kūlwa ng'wa Balī, na ng'hīngī ya ng'wa Ashela ūbeeja, gīt'ūmo walī wītīla Ahabu ntemi wa Isilaeli; na a mabità ga sonda ja ng'wigūlū a gose waginamīlaga na kūgalamya.

⁴Na myalīlo ūzenga ū mu hekalu ya ng'wa SEEBA, īyo ū SEEBA walī wahaya, “Ī lina lyane nakūlītūūla mu Yelusalemu.”

⁵Ū mu gwalugwa ja ha hekalu būbīlī wajo ūzenga myalīlo kūlwa nguno ya mabità gose ga sonda ja ng'wigūlū.

⁶Na ng'witūnja wakwe ūmpemba mu moto kūlwa kūmfunya shitambò; ūbiza munhū wa kūtūmamīla nguzu ja giiti, ī mihayo ya būchembelwa wa ngoko yūbiza yakwe, ūyūkooba na būgunanhwa kūfuma kū banhū ba masamvwa ga būlagūji, na myoyo misoso ya mbika jingī na jingī. Ūmpelanya no ū SEEBA nguno ya mihayo yamalofu ī yose īyo wīyītaga ū mu miso gakwe.

⁷Akasula shiikolile sha lī Ashela hūna ūshisola ūshitūūla mu hekalu, īyo ū SEEBA walī wang'wīla ū Daūdi nū ng'witūnja wakwe ū Solomoni, “Ī lina lyane nakūlītūūla ilalī ū mu hekalu yenīyī, nū mu nzengo gwa Yelusalemu ūyo naagūsola kūfuma mu ng'anda jose ja Isilaeli.

⁸A Baisilaeli ūlū būbiza bilang'hani, na bīshikīlīja mu welwa ng'holò pyī īyo naabalagīla, na būshidima ī shilagīlo ī shose īsho wabinha Musa ntūmami wane, natalajileka hangī ī mhambala jabo jishimīze kūja ūko na ūko, kwīnga ū mu sī īyo naabinha bakūlūgenji babo.”

⁹Alīyo a banhū batadegelekile; ū Manase walī wabatūnja kūngī, nose ū būbi ūbo baalī bīīta walī būtaale no, kūgatinda na a mahanga ayo SEEBA walī wagayagaja gīkī gabīngīle a Baisilaeli.

¹⁰Hūna ū SEEBA ūhaya mu nzīla ya batūmami bakwe a bahangi gīkī,

¹¹“Ū Manase ū ntemi wa Yuda wītile mihayo ya malofu no, nīyo kūheeba nū mumo bīītīlaga a Baamooli a bose abo bikalaga ū mu sī īyī mu shikū ja kale; a banhū ba Yuda wabatongeelile mu būhūbi būtaale no kūlwa shiikolile shakwe.

¹²Na lūūlū ū SEEBA ū Mulungu wa Isilaeli alīhaya, ‘Managi gīkī nakwenha būkenaagūji būtaale ū mu Yelusalemu nī Yuda; būlī munhū ūyo akwigwa gakūzīlīng'hana[8] a matū gakwe.’

¹³Ū nang'ha ūyo nakagūtūmamīla kwītūla Samalia, nūntūlīla na Ahabu, nakūgūtūmamīla nī Yelusalemu. Nakwīpyagūla yeele ī Yelusalemu gītī munhū akūpyagūlaga sahani, wa kūhayūmala ū kwīpyagūla wīkundīka.

¹⁴Nakūbūponya ū būshiigo wa banhū ba wingīji wane, nabatūūle mu makono ga banishi babo; pye a banishi babo bakūbaheeba na kūbiboneela.

¹⁵Nguno bīītile yabūbi ū mu miso gane, būnipelanya, nīyo kūfuma mu shikū ja bakūlūgenji babo aho bīngaga Misili, kūshisha haha.”

¹⁶Hama hangī a higūlya ya būhūbi ūbo akabenheleja banhū ba Yuda ū Manase, kūshisha bīīta būkenaagūji būtaale ū mu miso ga ng'wa SEEBA, akīīta mininga mingī no, nose ī Yelusalemu ī yose pyī ūmo īgelelile wīyookaja mininga ga banhū abo baalī batī na būbi.

¹⁷Mihayo yīngī ī ya mu shikū ja būtemi bo ng'wa Manase, pyī īyo wīta, nū būkenaagūji ūbo akīīta; ī yose yandīkilwe mu shitabo sha ng'hūlū ja batemi ba Yuda.

¹⁸Ū Manase wifuula na bakūlūgenji bakwe, ūjīkwa kwikūlū lyakwe, mu ngūnda gwakwe gwa Uza. Ng'witūnja wakwe Amoni ūbiza ntemi a ha ng'wanya gwakwe.

¹⁹Ū Amoni aho alandya kūbiza ntemi walī na myaka makūmi abīlī n'ībīlī, ūsuga ū mu Yelusalemu ikanza lya myaka ībīlī. Ū nina witanagwa ī lina lyakwe Meshulemeti, nshīke o ng'wa Haluzi muna Yotiba.

²⁰Akīīta yabūbi ū mu miso ga ng'wa SEEBA, gīt'ūmo ise Manase walī wītīla;

²¹nguno ya kūshimīzīla mu nzīla ja ng'wa ise ī jose, ī shiikolile pyī īsho washilamyaga ū ise, nū wei ūyūshilamya na kūshitumamīla.

²²Ū SEEBA ū Mulungu wa bakūlūgenji bakwe ūng'wība, atashimīzīlile gete ū mu nzīla ja ng'wa SEEBA.

²³Batūmami bakwe būng'wijomboka būmūlagīla ng'wikūlū lyakwe.

²⁴Alīyo a banhū ba mu sī yakwe būbabūlaga abo bakamūlaga ū ntemi Amoni, būntemya ng'witūnja wakwe Yosia a ha ng'wanya gwakwe.

²⁵Mihayo yīngī ī ya mu shikū ja būtemi bo ng'wa Amoni, pyī īyo wīta yandīkilwe mu shitabo sha ng'hūlū ja batemi ba Yuda.

²⁶Ūjīkwa mu shigila shakwe mu ngūnda gwa Uza. Ū ng'witūnja wakwe ū Yosia ūbiza ntemi a ha ng'wanya gwakwe.