Read Sukuma Bible 2015 – Bibilia Ilagano Lya Kale 2015 1 Mihayo ya Shikū 14 Bible Online

1 Mihayo ya Shikū 14 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 14

¹Ū mu shikū jenījo ntemi Hilamu wa Tulo ūntūmīla ū Daūdi banhū; būja na mitī ya ng'wininga, hamò na baselemala na bazengi ba numba, būkanzengela numba y'ikūlū.

²Ū Daūdi ūbona hape gīkī ū SEEBA wantūūlaga a ha būtemi wa Isilaeli, na gīkī ū būtemi wakwe wabūgūngūhyaga kūlwa nguno ya banhū bakwe a Baisilaeli.

³Ū Daūdi aho wasaamīla Yelusalemu, ūtoola bakīma bangī; ūbyalīlwa baana bangī bagosha na bakīma.

⁴A mina ga baana abo bakabyalīlwa kwenūko gaya aha: Shamua, Shobabu, Nasani, Solomoni,

⁵Ibuhaali, Elishua, Elipeleti,

⁶Noga, Nefegi, Yafia,

⁷Elishama, Beeliada na Elifeleti.

⁸A Bafilisiti aho bigwa gīkī ū Daūdi witīīlilwe maguta kūbiza ntemi wa Baisilaeli, būja koi pye a bose kūjūnkooba; ū Daūdi aho wigwa ūfuma kūjūmanhya nabo.

⁹A Bafilisti aho bashika bandya kwīdumīla ī sī ya ntubīlo ya Lefaimu;

¹⁰hūna ū Daūdi ūmūja ū Mulungu gīkī, “Nabasange koi a Bafilisiti nakabadumīle? Ūkūbatūūla ū mu nkono gwane?” Ū SEEBA ūnshokeja, “Jaga koi ng'hana, nguno nakūbatūūla mu nkono gwako.”

¹¹Hūna ū Daūdi na a banhū bakwe ūja Baali-pelazimu, ūkabapyeenela kwenūko; ūhaya, “Ūmo ihūūma lya minzī līkapyagūlīlaga, h'ūmo wabapyagūlīla ū SEEBA a banishi bane mu nzīla ya nkono gwane.” Na lūūlū ī lipandī lyenīlo lyitanwa Baali-pelazimu.

¹²A Bafilisiti būpeela būleka henaho mashikolo gabo ga kwitongelegeja; ū Daūdi ūlagīja gūpemva mu moto.

¹³A Bafilisiti batadīīlile biza hangī ū kūduma ū mu sī ya ntubīlo yenīyo;

¹⁴ū Daūdi ūmūja hangī ū Mulungu, ū Mulungu ūng'wīla gīkī, “Yaya ū kūbizīīla kū būtongi wabo, pīndaga ūkabizīīle kū numa yabo, ūlabadumīle wishīīkīgije mu mitī ya mifolosaadi.

¹⁵Na lūūlū ūlū wigwa mishaadūko ū kwigūlya ya matambī ga mifolosaadi gītī banhū bingī bakūshimīzaga, a henaho pulukaga wandye būlūgū; nguno numho ū Mulungu watongelaga ū kū būtongi wako, akūlītūlaga ī libità lya Bafilisiti.”

¹⁶Nghana ū Daūdi wīta gīt'ūmo Mulungu akanagīīlīla; būbatūlagūla a Bafilisiti nzīla ngima kwandīja Gibeoni kūshisha Gezeeli.

¹⁷Na lūūlū ū lūkumo lwa ng'wa Daūdi lūsambaala hose pyī ū mu sī jenījo, ū Seeba ūbatūūlīla lyogohya a banhū ba mahanga gose būng'ogoha.