Read Sukuma Bible 2015 – Bibilia Ilagano Lya Kale 2015 1 Mihayo ya Shikū 16 Bible Online

1 Mihayo ya Shikū 16 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 16

¹Hūna lūūlū būlīshikīlīja ī lisandīko lya ng'wa Mulungu, būlītūūla ū ng'wiheema īlo walī walībeegeja ū Daūdi. Hanuma ya henaho būmfunīja ū Mulungu shitambo sha kūpemva na shakwinha sha būsangī.

²Ū Daūdi aho wamala ū kūfunya ī shitambo sha kūpemva nī shakwinha sha būsangī, ūbalombela mbango a banhū mu lina lya ng'wa SEEBA.

³Hūna pye a Baisilaeli, bagosha na bakīma, būlī ng'wene winhwa nū Daūdi shipande sha ngatī, keki ya nhende, na keki ya mizabibu.

⁴Hanuma ya henaho ūbasola bamò ba Balawī kūbiza batūmami kū būtongi w'iheema lya ng'wa SEEBA: kūyūlombela banhū, kūlūmba, na kūngongoola SEEBA, ū Mulungu wa Isilalei.

⁵Ū ntongeeji wabo walī Asafu, wa kabīlī Zekalia, hūna ūlondeela Yeieli, Shemilamoti, Yehieli, Maatisia, Eliabu, Benaiya, Obedi-edomu, na Yeieli. A benabo ū nīmo gwabo gwalī kūtūla malimba na ndono; ū Asafu ū nīmo gwakwe gwalī kūlīja nzege.

⁶A bagabīji a ba Benaya nū Yahazieli baalī na nīmo gwa kūfuula mhembe, būlī gwa ū kū būtongi w'isandīko lya būlagane wa ng'wa Mulungu.

⁷Ū lūshikū lwenūlo ū Daūdi ūnagīja ū Asafu na a bīmbi biye gīkī ī lyīmbo lya kūnūmba SEEBA īlī lyīmve:

⁸Nkumīlījagi ū SEEBA, na lombagi mu lina lyakwe; bakumūkījagi a banhū ba mahanga īyo wīyītile.

⁹Ng'wīmbīlagi we, īmbagi mīmbo ga kūnkumīlīja; shikumūchagi ī shītwa shakwe shose pye.

¹⁰Yegelagi mu lina lyakwe lyeela, ī ng'holò ja banhū abo bakūnkoobaga SEEBA jisangabale.

¹¹Ng'wisagīlagwi SEEBA hamò nū būdūla wakwe, būkoobagi ū būshū wakwe būlī makanza.

¹²Yizūkagwi ī ya kūkumya īyo wīyīītile, īyo īlī ya kūkaamaaja, nū būlamuji wakwe ūbo wabūfunije.

¹³Ee bing'we shibyalīlwe sha ntūmami wakwe Isilaeli, Bing'we bitūnja ba ng'wa Yakobo abo mulī basolwa.

¹⁴Ū wei hū ng'wene ū SEEBA Mulungu wise, a kalamulīle kakwe kalī hose pyī ū mu sī.

¹⁵Ī lilagane lyakwe lyizūkagwi shikū jose welelo na weleo, ū mhayo ūyo agūlagīlile, kūshisha shibyalīlwe shihūmbī.

¹⁶Ī lilagane īlo akabeeja nū Abulahamu, ī shilahīlo īsho akang'wilahīlīla Isaka.

¹⁷Ū kūlī Yakobo ūshiinha nguzu shūbiza shilagīlo, ū kūlī Isilaeli lyūbiza ilagane lya welelo bose.

¹⁸Ūhaya, “Nakūkwinha bebe ī sī ya Kanaani, ū gwenūyo hū gūkūbiza ngabo gwa wingīji wako.”

¹⁹Ī shikū jene baalī bataalī bageehu no ū būkūmi wabo; baalī bageehu no, hama bikalaga moi gītī bageni dūhū.

²⁰Bikalaga bakūyūngaga kūfuma ihanga īlī kūja kū līngī, kūfuma būtemi ūbū kūja kū būtemi būngī.

²¹Atanekelile nūūlū ūmò wa kūbiboneela, na a batemi wabahamaga kūlwa kūbagunīja a boi.

²²Ūhaya gīkī, “Mutizūbakuumya a babilwa maguta bane, yaya ū kūbīītīla yabūbi a bahangi bane.”

²³Bing'we banhū ba mu sī jose ng'wīmbīlagi ū SEEBA; būlī lūshikū īlomeelagi ī ya būpīji wakwe.

²⁴Līkumūchagi ī likūjo lyakwe ū mu mahanga, ī shītwa shakwe sha kūkumya shimanīke kū banhū bose.

²⁵Nguno ū SEEBA alī ntaale, na igeleelilwe kūkumīlījiwa, igeleelilwe kogohwa kūtinda bamulungu bose.

²⁶Nguno pye a bamulungu ba mahanga balī mashiikolile dūhū, alīyo ū SEEBA hū ng'wene ū nseemi w'igūlū.

²⁷Ikūjo na magaka shimpīdije we, ū mu wikalo wakwe būlīmo būdūla na būyegi.

²⁸Bing'we ng'anda jose ja mu sī, ng'wisaabīlagi ū SEEBA, ng'wisaabagi ū SEEBA gīkī igeleelilwe ikūjo na nguzu.

²⁹Ng'wisaabīlagi ū SEEBA ī likūjo īlo lyigeleelilwe kū lina lyakwe. Enhagi shakwinha, ng'wegeele kū būtongi wakwe; Namyagi ū SEEBA mu wiza ūbo wigeleelilwe weela wakwe.

³⁰Banhū bose ba mu sī detemagi ū kū būtongi wakwe. Ī sī īlang'hanilwe mu būdūla būtaale, ītīko kūsegejiwa aho īlī.

³¹Ī ligūlū ni līyegage, nī sī īzalabane; ū mu mahanga bahaye gīkī, “Ū SEEBA hū ng'wene ū nsugi.”

³²Ī nyanza īhuuyembe, nī shose īsho shilī muyo, a malaale nago gayege, nī ī shose īsho shilīmo!

³³Ī mitī ya mu bū īkwīmba, īkwīmba na būyegi ū kū būtongi wa ng'wa SEEBA; nguno aliza kwīlamula ī sī.

³⁴Nkumīlījagi ū SEEBA, nguno alī wawiza, īkī ī Kīgongo chakwe shilī sha welelo na welelo.

³⁵Nīlīlagi gīkī, “Tūpījage SEEBA mpīja wise, tūkumingage ūtūpīje ū kūfuma ū mu mahanga, tūpandīke kūlīkumīlīja ī lina lyako lyeela; tūpandīke kūlīyegela ī likūjo lyako.”

³⁶Akumīlījiwe ū SEEBA, ū Mulungu wa Isilaeli, kūfuma welelo na kūshisha welelo bose. Hūna a banhū bose būhaya; “Alichene, SEEBA akumīlījiwe!”

³⁷Ū Daūdi ūneka ū Asafu na a biye kū būtongi w'isandīko lya būlagane wa ng'wa SEEBA, gīkī abize wa kūyūbeeja būlī milīmo īyo yalī yigelile kwītwa būlī lūshikū.

³⁸Nū Obedi-edomu ūneka henaho, hamò na a biye abo makūmi atandatū, būbiza batūmami ba henaho. Ū ng'witūnja wa ng'wa Yedusuni, Obedi-edomu walang'hanaga na ha nyango, hamò nū Hosa.

³⁹Ū Daūdi ūneka ū ngabīji Sadoki na a bagabīji biye kwiheema lya ng'wa SEEBA īlo lyalī kwipandī lya higūlya lya Gibeoni,

⁴⁰gīkī bayūmfunīja ū SEEBA shakwinha sha kūpemva būlī lūshikjū, dilū na mhīndī, a ha ng'walīlo gwa shakwinha sha kūpemva, kūlenganīla nī yose īyo yandīkilwe mu shilagīlo sha ng'wa SEEBA, īsho walī wabinha a Baisilaeli.

⁴¹Bakalekwa hamò nabo ba Hemani na Yedusuni, na a bose abo baalī basolwa; abo baalī bahelilwe mu mina gabo kūlwa nīmo gwa kūnkumīlīja SEEBA, “īkī ū būtogwa wakwe būlī wa būja na būja.”

⁴²Ū nīmo gwa ba Hemani nū Yedusuni gwalī kūfuula mhembe na kūlīja nzege, nī shingī īsho shaalījiagwa h'ikanza lya kwīmba mīmbo meela. A bitūnja ba ng'wa Yedusuni baalī balang'hani ba ha mita.

⁴³Hanuma ya henaho a banhū a bose būsambaala, būlī bene būja kaya; ū Daūdi nang'hwe ūshoka kū ng'wakwe kwīfuuha mbango ī kaya yakwe.