Read Sukuma Bible 2015 – Bibilia Ilagano Lya Kale 2015 1 Mihayo ya Shikū 21 Bible Online

1 Mihayo ya Shikū 21 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 21

¹Ū mu shikū jenījo ū Shetani ūbapelanīla a Baisilaeli gīkī abīītīle yabūbi, hūna ūnsamīlīja ū Daūdi kūbabala a Baisilaeli.

²Na lūūlū ū Daūdi ūng'wīla ū Yoabu na a bataale ba mabità ga bashilikale abo walī nabo; ūhaya gīkī, “Jagi mukababale a Baisilaeli, kwandīja Beeli-sheba kūshisha Dani, hanuma munehele ī lishosho, nabūmane ū wingī wabo ūmo būlī.”

³Alīyo ū Yoabu ūnshokeja ū ntemi gīkī, “Ū SEEBA ni abongejage a bashilikale ng'hangala magana na magana. Baba būgonzo ntemi, a bose benabo batī batūmami ba ng'wa baba būgonzo ū ntemi? Nibūlī ū baba būgonzo ū ntemi alīīta mhayo gūlī gīko? Mhayo kī ūyo gūlenheleja nose ū baba būgonzo abingīje mu kwihīga a Baisilaeli?”

⁴Alīyo ū ntemi ūtūmamīla nguzu ū mu kūng'wīla ū Yoabu; na lūūlū ū Yoabu wīnga, ūja pye a hose ū mu sī ya Isilaeli; ūūkashoka hangī ī Yeluslemu.

⁵Ū Yoabu ūng'wenhela ū Daūdi ī lisaabu lya bashilikale: ū mu Isilaeli ī yose baalīmo bashilikale milyoni īmò na shihūmbī igana, abo baalī badūgije kūdima shū mu būlūgū; ū mu sī ya Yuda baalīmo shihūmbī magana anè na makūmi mpungatī.

⁶Alīyo ū Yoabu atababalile a ba lūganda lwa ng'wa Lawī nū lwa ng'wa Benjamini; nguno ī shilagīlo sha ntemi shaalī shabūbi no ū kūlī wei.

⁷Nīyo ī shilagīlo shenīshi shaalī shabūbi nū mu miso ga ng'wa Mulungu, na lūūlū ūbagwisīja nsango a Baisilaeli.

⁸Hūna ū Daūdi ūng'wīla ū Mulungu gīkī, “Naahūbile no ū kwīta ū mhayo gwenūyo. Nalīkwikūmbīlīja ūwīnje ū būkenaagūji wa ntūmami wako; nīītile mhayo gwa nyachilū-chilū no!”

⁹Ū SEEBA ūng'wīla Gadi ūyo walī ng'hangi wa ng'wa Daūdi,

¹⁰“Jaga ūkang'wīle ū Daūdi, ‘Ū SEEBA alīhaya gīkī: Nalīkwinha mihayo īdatū ūsole gūmò gwaho, ūniwīle nakwītīle īyo natogilwe kūkwītīla.’”

¹¹Na lūūlū ū Gadi ūja ū kūlī Daūdi ūkang'wīla, “Ū SEEBA alīhaya gīkī, ‘Isolelage bebe ng'wenekīlī;

¹²myaka īdatū ya nzala, nūūlū banishi bako bakwiboneele mu nzīla ya būlūgū ikanza lya myeji īdatū, nūūlū lūshū lwa ng'wa SEEBA lwīkenaagūle ī sī yako ikanza lya shikū idatū; hū kūhaya līgwe ihuuya na malaika wa ng'wa SEEBA abīte pye a hose aje akwīkenaagūlaga ī sī ya Isilseli!’ Ali lūūlū, iganikage ūninhe ū būlamuji wako nakang'winhe ī lishosho ūyo wanitūmaga!”

¹³Ū Daūdi ūshosha alīhaya, “Nalī mu makoye madito no ī haha; hambū-hambū nagwe mu makono ga ng'wa SEEBA, nguno ū ng'wene ī shigongo shakwe shilī shitaale no. Yaya ū kūnileka nagwe mu makono ga banhū.”

¹⁴Na lūūlū ū SEEBA ūtūma ihūūya ū mu sī ya Isilaeli, būgwa bagosha shihūmbī makūmi mpungatī ba mu Isilaeli.

¹⁵Ū Mulungu ūntūma malaika kwīkenaagūla nī Yelusalemu, alīyo aho wandya ū malaika, ū SEEBA ūbūbona ū būkenaagūji wenūbo, ūsaatwa no. Ūng'wīla ū malaika ūyo wabayagajaga a banhū gīkī, “Wigejaga lūūlū! Gwichage ū nkono gwako.” Ī likanza lyenīlo ū malaika akasangwa wīmīīlaga ha lūbūūga lwa kūtūlīla, lwa ng'wa Alauna ūmò wa Bayebusi.

¹⁶Ū Daūdi aho wabūūcha a miso ūmona ū malaika wa ng'wa SEEBA īmīīlile higūlya, atapandile a hasī; kūnū adimīlile līlūshū mu nkono gūgoloolilwe higūlya ya Yelusalemu. A henaho ū Daūdi na a banamhala ba Yelusalemu būgwa ha sī bachimīgije; a bose baalī bazwalile shizwalo sha magūnīla.

¹⁷Ū Daūdi ūng'wīla ū Mulungu, “Naalī natī nene ūyo naalī nalagīgije gīkī babalwe a bashilikale? Ū nene hū nalī ng'hūbi, hū nene nalī nkenaagūji! A banhū bene balī ng'holo jako dūhū, a bene bīītile mhayo kī? Ee SEEBA Mulungu wane, ū nkono gwako ni gūnigwīlage nene hamò na kaya yane. Ī lihūūya ni lītizagūbamala a banhū bako!”

¹⁸Hūna ū malaika wa ng'wa SEEBA ūnagīja ū Gadi akang'wīle ū Daūdi aje akanzegele ū SEEBA ng'walīlo a ha lūbūūga lwa kūtūlīla lwa ng'wa Alauna ū Nyebusi.

¹⁹Nghana ū Daūdi ūja gīt'ūmo SEEBA akalagīīlīla mu nzīla ya ng'wa Gadi.

²⁰Ū Alauna watūlaga ngano jakwe, aho wabūūcha a miso ūmona ū malaika; walī na bitūnja bakwe banè būpeela būūkibisa.

²¹Hūna nū Daūdi wiza, ū Alauna aho wamona aliza, wīnga a ha lūbūūga winama ha sī ū būshū wakwe ū kū būtongi wa ng'wa Daūdi.

²²Ū Daūdi ūhaya, “Nizunīlījage nalīsole ī libbaala lyenīlī aho lūlī lūbūūga lwako lwa kūtūlīla, nalītūmamīle kūzenga hoi ng'walīlo kūlwa ng'wa SEEBA, līhangījiwe ī lihūūya ū kū banhū. Nijingījage ūmo gūlī ū mpango gwalyo.”

²³Ū Alauna ūng'wīla ū Daūdi, “Līsolage dūhū! Ū baba būgonzo ū ntemi ni ītage gīt'ūmo atogelilwe. Jiiji nī nzīkū najifunyaga kūlwa shakwinha sha kūpemva, a matūlīlo ga būsīga gakūbiza ng'hwi ja kūpemba, ī ngano jikūtūmama kūlwa shakwinha sha būsu; ī shose shenīshi nashifunyaga.”

²⁴Alīyo ū ntemi Daūdi ūnshokeja ū Alauna gīkī, “Yaya ītī gīko, ū nene nalītogwa kūshifunīja ū mpango gwasho gete. Natīko kūshisola ī shikolo shako kūlwa nguno ya ng'wa SEEBA; nūūlū natīko kūfunya shitambo shikolo sha kwinhwa dalali.”

²⁵Hūna lūūlū ū Dūadi ūng'winha ū Alauna kilo mpungatī ja zahabu kūlwa ipandī lyenīlo, aho lwalī ū lūbūūga lwa kūtūlīla.

²⁶Ū Daūdi ūzenga ho ng'walīlo kūlwa nguno ya ng'wa SEEBA, ūfunya shakwinha sha kūpemva na shakwinha sha būsangī. Ūnīlīīla ū SEEBA, ū SEEBA nang'hwe ūng'widīka mu nzīla ya moto kūfuma ng'wigūlū a ha ng'walīlo gwa shitambo sha kūpemva henaho.

²⁷Hūna ū SEEBA ūng'wīla ū malaika, nang'hwe ū malaika ūlīshosha ī līlūshū mu shilaalo shaalyo.

²⁸Ī likanza lyenīlo ū Daūdi aho wabona gīkī ū SEEBA wang'widīka a ha lūbūūga lwa kūtūlīla būsīga lwa ng'wa Alauna ū Nyebusi, ū Daūdi ūfunya hoi shitambo.

²⁹Ū mu shikū jenījo ī liheema lya ng'wa SEEBA īlo Musa walī walībeeja kwitogolo lyalī lītaalī kwipandī lya higūlya lya Gibeoni; pyī nū ng'walīlo gwa shakwinha sha kūpemva.

³⁰Alīyo ū Daūdi atagimile ū kwegeela hoi ū kūmūja ū SEEBA, kūlwa nguno ya kūlyogoha ī līlūshū lya ng'wa malaika wa ng'wa SEEBA.