Read Sukuma Bible 2015 – Bibilia Ilagano Lya Kale 2015 1 Mihayo ya Shikū 22 Bible Online

1 Mihayo ya Shikū 22 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 22

¹Hūna ū Daūdi ūhaya gīkī, “Ī numba ya ng'wa SEEBA Mulungu īkūbiza henaha, nū ng'walīlo gwa shitambò sha kūpemva kūlwa nguno ya Baisilaeli gūkūbiza henaha nago.”

²Hanuma ya henaho ū Daūdi ūlagīja būkumingwa pye abo baalī batī Baisilaeli abo bikalaga ū mu Isilaeli; hūna ū kūfuma ū mubo ūsolanhya bapondagūji ba mawe, ba kūbeegeleja mawe ga kūzengela numba ya ng'wa Mulungu.

³Ūfunya chūma shingī kūlwa kūbeegeja misumaali ya kūlūnganīja mbawa ja ha milyango ya ha mibita; na kūlūnganīja mapandī gangī ayo gaalī gigeleelilwe kūlūnganyiwa; ūbinha na shaba ningī no, īyo būdito wayo walī būtadūgije nūūlū kūmanīka.

⁴Ūfunya na mitī mingī ya miyenze-yenze, nayo yalī ītī na būbalīlwe; nguno a bana Sidoni na a bana Tulo baalī bang'wenhela mitī mingī no ū Daūdi.

⁵Hūna ū Daūdi ūhaya, “Ū ng'witūnja wane ū Solomoni ataalī ndo no, hama ataalī kūmana mihayo mingī; alīyo ī numba īyo īlazengwe kūlwa ng'wa SEEBA shiigelile ībize yawiza jigi, hama ībize na lūkumo lwawiza n'ikūjo itaale ū mu mahanga gose; na lūūlū nakwīgolanīja pye ī shikolo īsho shiigeleelilwe.” Na ng'hana ū Daūdi aho ataalī kūcha akabeeja milonjo mitaale.

⁶Hūna ūng'witana ū ng'witūnja wakwe ū Solomoni, ūnganikīla īyo yigelile ayīīte kūlwa kūnzengela numba ū SEEBA Mulungu wa Baisilaeli.

⁷Ū Daūdi ūng'wīla ū Solomoni gīkī, “Ng'wana wane, ū mu ng'holò yane līkilonga iganiko lya kūzenga numba kūlwa nguno ya lina lya ng'wa SEEBA Mulungu wane.

⁸Alīyo gūnizīīla mhayo kūfuma kūlī SEEBA gūlīniwīla gīkī, ‘Ū bebe wita mininga mingī no, nū būlūgū walwa wingī no, na lūūlū yaya ū kūzenga ī numba kūlwa lina lyane, nguno mining mingī no ayo wagiita ha sī ū kū būtongi wane.

⁹Alīyo ūkūbyala ng'wana, ūyo akūbiza munhū wa mhola na kwifuula; nakūng'winha kwifuula kūfuma ū kū banishi bakwe hose-hose abo bampīndije mhandī jose. Ī lina lyakwe akūbiza Solomoni; ū mu shikū jakwe nakūtūūla mhola na būlembeezu ū mu Isilaeli.

¹⁰Ū ng'wenūyo hū ng'wene akūzenga numba kūlwa lina lyane. Akūbiza ng'wana wane, nū nene nakūbiza Ise. Ū būtemi wakwe ū kū Baisilaeli nakūwīta būshinge ho kūshisha welelo bose.’

¹¹Ali lūūlū ng'wana wane, ū Seba ni abizage hamò nang'ho, hama ūbize na kwīlūkīlwa kwawiza wīzenge ī numba ya ng'wa SEEBA Mulungu wako gīt'ūmo ahayīlile gīkī ūkwīta.

¹²Ū SEEBA ni akwinhage witegeleja na masala, ūlū alakwīte kūbiza nūsugi wa Baisilaeli; ūbize na būdūla wa kūshidima ī shilagīlo sha ng'wa SEEBA Mulungu wako.

¹³Nguno ūlū ūbiza ng'witegeleja ū mu kūshidima ī shilagīlo na malange ga ng'wa SEEBA ayo akang'winha Musa kūlwa nguno ya Baisilaeli, a henaho hū ūkūdūla ū kwīyīīta ī yose. Bizaga na nguzu, hangī ūbize ng'wiyūmīlīja; yaya ū kogoha nūūlū kūgwa ng'holò.

¹⁴Ū nene naakoyile nago ū nīmo gwa kūkuminga ī shizengelo sha hekalu ya ng'wa SEEBA, alīyo ī haha nasūmbije zahabu ningī, tani shihūmbī shidatū na magana mpungatī na makūmi atanò; na feza tani shihūmbī makūmi adatū na mpungatī na magana atanò. Ī shaba nī chūma ī shene shilī shingī no, shilambu nū kūbūmana ū būdito washo; pye nī mitī na a mawe, nū bebe ūkongeleleja lūūlū.

¹⁵A batūmami abo ūlī nabo a bene bingī no: baakoolī ba kūponda mawe, bazengi na baselemala; nīyo ūlī na banhū bamani ba kūtūmama milīmo ya būlī mbika.

¹⁶Balīho abo badeebile kūbeeja shikolo sha zahabu na sha feza, sha shaba na sha chūma; nīyo a baakoolī a bene bingī no, lweelwe ndo. Ali lūūlū gwandyage ū nīmo, SEEBA abize hamò nang'ho.”

¹⁷Hanuma ya henaho ū Daūdi ūbakomeleja pye a batongeeji ba Baisilaeli kūngunanha ū ng'witūnja wakwe ū Solomoni.

¹⁸Ūbawīla gīkī, “Bīng'we, ū SEEBA Mulungu wing'we atī hamò ning'we? Ataalī kūng'winha kwifuula hose-hose ū kū mapandī ayo gamupīndīlīgije? Nguno pye a bajiga-jiga ba mu sī īyī wabatūūlile mu nkono gwane, ī haha ī sī yenīyī īlī ha sīlīlī ya ng'wa SEEBA, hamò na banhū bakwe.

¹⁹Ali lūūlū, a bīng'we ifunyagi gete ū būpanga wing'we; ī ng'holò jing'we jinkoobe ū SEEBA Mulungu wing'we. Andyagi ū kūzenga ī lipandī lyeela kūlwa ng'wa SEEBA Mulungu, mulyenhe ī lisandīko lya būlagane wa ng'wa SEEBA, nī shikolo ī shingī ī sheela, īsho shilī sabo ya ng'wa SEEBA; mushitūūle mu hekalu īyo īlazengwe kūlwa lina lya ng'wa SEEBA.”