Read Sukuma Bible 2015 – Bibilia Ilagano Lya Kale 2015 1 Mihayo ya Shikū 27 Bible Online

1 Mihayo ya Shikū 27 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 27

¹Ūkū kwene kwihela kwa bataale ba Baisilaeli: bataale ba ndūgū jabo, na bataale ba mabità ga bashilikale shihūmbī-shihūmbī, na mabità ga bashilikale bashilikale igana-igana; na a bataale babo abo baalī batūmami ba ntemi mu mihayo yose, ūmo gaalī gaheleliwe a magele ga bashilikale ba būlūgū, abo bilekelaga ndīīma būlī ng'wenji ū mu ng'waka ngima. Būl'igele lyalī na bashilikale shihūmbī makūmi abīlī na shinè.

²Ū ntaale w'igele īlo līkadima lūdīīma lwa kwandya ū mu ng'weji gwa kwandya, walī Yashobeamu ng'witūnja wa ng'wa Zabudi. Ū ng'wigele lyakwe baalīmo bashilikale shihūmbī makūmi abīlī na shinè.

³Walī wa kūfuma mu shibyalīlwe sha ng'wa Peleezi; ū mu ng'weji gwa kwandya hū walī ntaale wabo pye a batongeeji ba mabità.

⁴Ū ntaale w'igele lya lūdīīma ū mu ng'weji gwa kabīlī walī Dodai muna Ahohi; ū ntongeeji w'igele lyakwe walī Mikiloti. Ū ng'wigele lyakwe baalīmo bashilikale shihūmbī makūmi abīlī na shinè.

⁵Ū wa kadatū, ūyo akabiza ntaale wa mabità mu ng'weji gwa kadatū, walī Benaya ng'witūnja wa ng'wa Yehoyada ūyo walī ngabīji, hū walī ntaale wabo ū ng'wenūyo, ū ng'wigele lyakwe baalīmo bashilikale shihūmbī makūmi abīlī na shinè.

⁶Ū Benaya ng'wenūyo hū ūyo walī ūmò wa banhū ba makaya abo makūmi adatū, na walī ntaale wabo. Ng'witūnja wakwe Amizabadi walī ntaale w'igele lyakwe.

⁷Ū wa kanè ūyo walī ntaale mu ng'weji gwa kanè, walī Asaheli ng'wana wa ng'wawe wa ng'wa Yoabu; ng'witūnja wakwe Zebadia h'ūyo akingīla a ha ng'wanya gwakwe. Ū ng'wigele lyakwe baalīmo bashilikale shihūmbī makūmi abīlī na shinè.

⁸Ū wa katanò ūyo walī ntaale wa mabità mu ng'weji gwa katanò walī Shamuhuti, muna Izīla. Ū ng'wigele lyakwe baalīmo bashilikale shihūmbī makūmi abīlī na shinè.

⁹Ū wa katandatū ūyo walī ntaale mu ng'weji gwa katandatū, walī Ila ng'witūnja wa ng'wa Ikeshi muna Tekoa. Ū ng'wigele lyakwe baalīmo bashilikale shihūmbī makūmi abīlī na shinè.

¹⁰Ū wa mpungatī ūyo walī ntaale mu ng'weji gwa mpungatī, walī Helezi muna Peloti; munhū wa kūfuma mu lūganda lwa ng'wa Efulaimu. Ū ng'wigele lyakwe baalīmo bashilikale shihūmbī makūmi abīlī na shinè.

¹¹Ū wa kanaane ūyo walī ntaale mu ng'weji gwa kanaane walī Sibekai muna Hushati, munhū wa Zela. Ū ng'wigele lyakwe baalīmo bashilikale shihūmbī makūmi abīlī na shinè.

¹²Ū wa kenda ūyo walī ntaale mu ng'weji gwa kenda walī Abiezeeli muna Anasosi; munhū wa lūganda lwa ng'wa Benjamini. Ū ng'wigele lyakwe baalīmo bashilikale shihūmbī makūmi abīlī na shinè.

¹³Ū w'ikūmi ūyo walī ntaale mu ng'weji gw'ikūmi walī Mahalai muna Netofa; munhū wa Zelahi. Ū ng'wigele lyakwe baalīmo bashilikale shihūmbī makūmi abīlī na shinè.

¹⁴Ū w'ikūmi n'īmò ūyo walī ntaale mu ng'weji gw'ikūmi na gūmò walī Benaya muna Pilasoni; munhū wa mu lūganda lwa ng'wa Efulaimu. Ū ng'wigele lyakwe baalīmo bashilikale shihūmbī makūmi abīlī na shinè.

¹⁵Ū w'ikūmi na kabīlī, ūyo walī ntaale mu ng'weji gw'ikūmi n'ibīlī walī Helidai muna Netofa, wa kūfuma mu lūdūgū lwa ng'wa Osinieli. Ū ng'wigele lyakwe baalīmo bashilikale shihūmbī makūmi abīlī na shinè.

¹⁶A mina aya ga batongeeji ba ng'anda ja Baisilaeli: Ū mu lūganda lwa ng'wa Lubeni walī Elieza ng'witūnja wa ng'wa Zikili; ū mu lūganda lwa ng'wa Simeoni walī Shefatia ng'witūnja wa ng'wa Maaka;

¹⁷ū mu lūganda lwa ng'wa Lawī walī Hashabia ng'witūnja wa ng'wa Kemueli; ū mu numba ya ng'wa Alooni walī Sadoki;

¹⁸ū mu lūganda lwa ng'wa Yuda walī Elihu nkūlūye wa ng'wa Daūdi; ū mu lūganda lwa ng'wa Isakaali walī Omuli ng'witūnja wa ng'wa Mikaeli;

¹⁹ū mu lūganda lwa ng'wa Zabuloni walī Ishimaya ng'witūnja wa ng'wa Obadia; ū mu lūganda lwa ng'wa Nafutaali walī Yelimoti ng'witūnja wa ng'wa Azilieli;

²⁰ū mu lūganda lwa ng'wa Efulaimu walī Hoshea ng'witūnja wa ng'wa Azazia; ū mu nusu ya lūganda lwa ng'wa Manase walī Yoeli ng'witūnja wa ng'wa Pedaya;

²¹ū mu nusu ya lūganda lwa ng'wa Manase, ī Gileadi, walī Ido ng'witūnja wa ng'wa Zekalia; ū mu lūganda lwa ng'wa Benjamini walī Yaasieli ng'witūnja wa ng'wa Abuneeli;

²²ū mu lūganda lwa ng'wa Dani walī Azaleli ng'witūnja wa ng'wa Yelohamu; A benaba hū baalī batongeeji ū mu ng'anda ja Baisilaeli.

²³Ū Daūdi atabasolile a bagosha a ba myaka ya kwandīja makūmi abīlī na kwika sīlīlī, nguno ū Seeba walī wisagīja gīkī akūbakwīja a Baisilaeli bakwīle gītī sonda ja ng'wilunde.

²⁴Ū Yoabu ū ng'wana Seluya akandya ū kūbabala a bagosha, alīyo atabamalile kūlwa nguno y'ihūūya īlo līkabagwīla a Baisilaeli, nguno ya kūpelanīlwa kūlwa būbalwa wenūbo; na lūūlū ī lisaabu lyenīlo lītingījiwe ū mu shitabo sha masaabu ga ntemi Daūdi.

²⁵Azimaveti ng'witūnja wa ng'wa Adieli walī nang'hani wa mabīkīlo ga sabo ja h'ikūlū. Yonasani ng'witūnja wa ng'wa Uzia walī nang'hani wa mabīkīlo ga sabo ayo gaalī mu mizengo, na kū magūngūli, nū mu ng'hambī ja bashilikale a balang'hani.

²⁶Ū ntaale wa batūmami ba mu malaale, abo baalī balīmi ba migūnda, walī Ezili ng'witūnja wa ng'wa Kelubu.

²⁷Ū nang'hani wa migūnda ya mizabibu walī Shimei muna Lama. Zabudi muna Shefamu walī nang'hani wa mabīkīlo ga divai.

²⁸Baali-hanani muna Geedeli walī nang'hani wa mitī ya mizeituni na mikūyū ya kū mitulumenho ya ng'weli. Ū nang'hani wa maguta ga mizeituni walī Yoashi.

²⁹Shitilai muna Shaloni walī nang'hani wa madaale ga mitugo ījo jadīīmīlagwa mu mbūga ya Shaloni. Mitugo jingī jadīīmīlagwa kū malago, ū nang'hani wajo walī Shafati ng'witūnjwa wa ng'wa Adilai.

³⁰Ū nang'hani wa ngamīla walī Ng'wishimaeli nebe, lina lyakwe Obili; ū nang'hani wa nzobe walī Yehideiya muna Melonoti.

³¹Ū nang'hani wa madaale ga ng'holo walī Yazizi munhū wa Hagili. A bose benaba baalī balang'hani ba sabo ja ntemi Daūdi.

³²Walīho Yonasani mamiye wa ng'wa Daūdi, munhū ng'witegeleja mu kūganikīla banhū, hangī nnoleeji wa mihayo; ū munhū ng'wenūyo walī watūūlwa ha nīmo gwa wandīki. Hama nīyo ū wei hamò na Yahieli ng'witūnja wa ng'wa Hakimoni, baalī baleji ba bitūnja ba ntemi.

³³Ū nganikīji wa ntemi walī Ahisofeeli; Hushai muna Aliki walī nwani ng'wiye wa ntemi.

³⁴Ū Ahisofeeli ū ng'wanya gwakwe gūkasolwa na Yehoyada, ng'witūnja wa ng'wa Benaya hamò na Abiasaali; ū ntaale wa mabita ga ntemi walī Yoabu.