Read Sukuma Bible 2015 – Bibilia Ilagano Lya Kale 2015 1 Mihayo ya Shikū 28 Bible Online

1 Mihayo ya Shikū 28 - Sukuma Bible 2015 – Bibilia Ilagano Lya Kale 2015 bible

1 Mihayo ya Shikū 28

¹Ū Daūdi ūbitana kwibilinga Yelusalemu pye a bataale ba būsugi ū mu Isilaeli; biza a bataale ba magele ga bashilikale shihūmbī-shihūmbī, na ga bashilikale igana-igana abo baalī ū mu būtūmami wa ntemi; na a balang'hani ba sabo na mitugo ja ntemi nī ja bitūnja bakwe. Na a batūmami bataale ba ng'wikūlū, na a bagosha ba mbagashūūla, na a bashilikale a bose abo batogohaga mhayo gose-gose.

²Hūna ū ntemi Daūdi wīmīīla ūbawīla gīkī, “Bing'we badūgū bane na banhū bane, nidegelekagi; ū mu ng'holò yane līkilonga iganiko lya kūzenga numba kūlwa wifuulīlo w'isandīko lya būlagane wa ng'wa SEEBA, lībize ipandī lya kūtūūla mhambala kūlwa ng'wa Mulungu wise, nūgolanya nī milonjo ya gīkī nandye ū kūzenga.

³Alīyo ū Mulungu ūniwīla gīkī, ‘Ū bebe ūtūzenga numba kūlwa lina lyane, nguno ūlī nshilikale, a mining ayo wagiita ha sī mingī no.’

⁴Alīyo ī chene ū SEEBA Mulungu wanisola kūfuma ū mu numba ya ng'wise ī yose, gīkī nabize ntemi wa Isilaeli welelo bose. Nguno akansola ū Yuda kūbiza ntongeeji, hanuma ū kūfuma ū mu lūganda lwa ng'wa Yuda wīsola ī numba ya ng'wise, hūna ū kūfuma mu bitūnja ba ng'wa baba, gūnyeja ū SEEBA gwa kūnīīta ū nene kūbiza ntemi wa Isilaeli ī yose.

⁵Hama ū mu bitūnja bane bose (gīt'ūmo mumanīlie gīkī ū SEEBA waninha bitūnja bingī), wansolile ng'witūnja wane Solomoni gīkī igashe a hisumbī lya būtemi wa ng'wa SEEBA ū mu Isilaeli.

⁶Akaniwīla gīkī, ‘Ū ng'witūnja wako ū Solomoni hū ng'wene ūyo akwīzenga ī numba yane, na a mapandī gayo a ga kwibilingīla, nguno ū ng'wenūyo nansolile kūbiza ng'witūnja wane, ū nene nakūbiza Ise.

⁷Ūlū ūshikīlīja a kahelele kane, nī shilagīlo shane ūshidima mu būtūūlelengeta gīt'ūmo īlī ī mihayo ī haha, ū būtemi bokwe nakūwīta būlame shikū jose ja welelo na welelo.’

⁸Na lūūlū ī haha nalīmukomeleja mu būtongi wa Baisilaeli bose na mu miso ga kwibilinga kwa banhū ba ng'wa SEEBA, nū Mulungu wise. Ilang'hanagi gete mushimīzīle ū mu shilagīlo sha ng'wa SEEBA Mulungu wing'we, hū mukūdūla ū kwikala ū mu sī ī yawiza īyī, na a baana bing'we mukūbalekela ībize wingīji wabo wa welelo na welelo.

⁹Ū bebe nang'ho ng'wana wane Solomoni, ng'witegelejage gete ū Mulungu wa ng'wa so, ūntūmamīle we na ng'holò yako yose; na a maganiko gako gazunye ū kūntūmamīla. Nguno ū SEEBA hū ng'wene ū ngīsīlīja wa ng'holò jose, na a maganiko a gose agamanile nī mbūūkī yago. Ūlū ūnkooba akwilonga ū kūlī bebe, alīyo ūlū ūng'wība akūkūponya ilalī.

¹⁰Ali lūūlū, ilang'hanage nguno ū SEEBA wakūsolile kwīzenga ī hekalu, īlo līl'ipandī lyeela; idadīlage ūgwīte ū nīmo.”

¹¹Hūna ū Daūdi ūng'winha ū ng'witūnja wakwe ū Solomoni plana ya koolekeja ūmo īkūbizīla ī heekalu ūlū yūzengwa: ī libīndo lyayo, ī numba jayo, ī chumba sha kūbīkīla shikolo, ī chumba sha kwigūlya, ī chumba sha mu gatī, na haho līlabize ipandī lyeela no-no-no.

¹²Ūng'winha a kahelele ka yose īyo Moyo walī wantūūlīla ū mu maganiko gakwe kūlwa mapandī ga kwibilingīla ū mu hekalu ya ng'wa SEEBA, nī chumba ī shingī ī shose shilīmo, nī chumba sha kūtūūlīla sabo ya mu hekalu ya ng'wa Mulungu, nī sha kūtūūlīla ī shikolo īsho shikūyūfunyiwa kūlwa nguno ya ng'wa SEEBA.

¹³Ūng'winha na a kihelele ka ndīīma ja bagabīji na a Balawī; ūnangīīla pyī ī mbika ja katūmamīle ka milīmo ya mu hekalu ya ng'wa SEEBA; nī shiseme ī shose īsho shiigeleellilwe kūtūmamīlwa mu makanza ga kūlamya.

¹⁴Ūng'helela nū būdito wa zahabu ījo jiigelile kūbeeja pyī ī shikolo sha zahabu īsho shilayūtūmamīlwa mu mbika jose na jose ja milīmo ya kūlamya; nū būdito wa feza ījo jiigelile kūbeeja pyī ī shikolo sha feza īsho shilayūtūmamīlwa mu mbika jose na jose ja milīmo ya kūlamya.

¹⁵Ūng'winha nū būdito wa zahabu ījo jiigelile kūbeejiwa makīndīkīlo ga tala a ga zahabu nī tala jago; nū būdito wa būlī ikīndīkīlo lya tala nī tala jalyo. Nū būdito wa feza ījo jiigelile kūbeeja makīndīkīlo ga tala, a ga feza nī tala jago; kūlenganīla na katūmamīle ka būlī ikīndīkīlo lya tala.

¹⁶Ūng'winha nū būdito wa zahabu ījo jikūnaagīlwa ha būlī meza ya kūtūūla migatī myeela; nū būdito wa feza ja kūtūmamīlwa ha meza ja feza.

¹⁷Ūng'winha nū būdito wa zahabu ī yawiza no-no-no kūlwa nguno ya kūbeeja uuma, mabbakuli ga kūseeseebelela, na shinje; nū būdito wa zahabu ja kūbeeja būlī isinia lya zahabu, nū būdito wa feza jakūbeeja būlī isinia lya feza.

¹⁸Ūng'winha nū būdito wa zahabu īyo īmalile kweejiwa kūlwa kūtūūla ha ng'walīlo gwa kūzuukīja būbbani. Ūng'winha nī shiikolanīgījo shaalyo ī lisandīko ūmo līkūbiza ūlū gūtūūlwa hoi a makelubi ga zahabu, ayo gaalile a manana gago kūlīshīkīja ī lisandīko lya būlagane wa ng'wa SEEBA.

¹⁹Ū Daūdi ūhaya gīkī, “Ī yose yenīyī yandīkile, nguno ū nkono gwa ng'wa SEEBA gwalī hamò naane, ūninha witegeleja ū mu mihayo yose yenīyī.”

²⁰Ū Daūdi ūng'wīla ū ng'witūnja wakwe ū Solomoni na gīkī, “Idadīlage ūtimbye ng'holò, ūgwīte ū nīmo. Yaya ū kogoha, nūūlū ūtizūgwa ng'holò; nguno ū SEEBA Mulungu, ū Mulungu wane, alī hamò nang'ho. Atīko kūkūlekanīja nūūlū kūkwība, kūshisha gūshile pyī ū nīmo gwa kūbeeja īyo yigeleelilwe kwītwa mu hekalu ya ng'wa SEEBA.

²¹A magele ga bagabīji na a ga Balawī galīho galindanile kwīta ī milīmo ū mu hekalu ya ng'wa Mulungu, na būlī munhū ūyo alī na būdūla ūyo atogilwe kūgunanha akūkūgunanha ū mu nīmo ū gose. A bataale ba būsugi bakūkwigwa mu yose īyo ūlabalagīle.