Read Sukuma Bible 2015 – Bibilia Ilagano Lya Kale 2015 2 Mihayo ya Shikū 1 Bible Online

2 Mihayo ya Shikū 1 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 1

¹Ū Solomoni ng'witūnja o ng'wa Daūdi akabiza na nguzu ū mu būtemi bokwe, nguno ū SEEBA Mulungu wakwe walī hamò nang'hwe; h'ūyo akang'winha kūhangama no no no.

²Hūna ū Solomoni ūhooya na a Baisilaeli a bose, baalīho a bataale ba mabità ga bashilikale shihūmbī shihūmbī, na bataale ba mabità ga bashilikale igana igana; baalīho na a balamuji, na a batongeeji a bose, a bataale ba ndūgū ja mu Isilaeli.

³Na lūūlū ū Solomoni nī libità lya banhū ī lyose būja Gibeoni kwipandī lya higūlya; nguno ī liheema lya kwibilingīla lya ng'wa Mulungu lyalī kwenūko, īlo Musa ntūmami o ng'wa SEEBA walī walībeeja aho bataalī kwitogolo.

⁴Ū mu shikū jenījo ū Daūdi walī wamala kūlyenha ī lisandīko lya ng'wa SEEBA kūfuma ī Kiliati-yalimu; ūlītūūla ū ng'wipandī īlo walī walībeegeja; nguno walī walīkomela iheema mu nzengo gwa Yelusalemu.

⁵Alīyo ū ng'walīlo gwa shaba ūyo gwalī gwabeejiwa na Bezaleli ng'witūnja o ng'wa Uuli, ng'witūnja o ng'wa Huuli gwalī gūtaalī Gibeoni kū būtongi w'ipandī lya kwikala lya ng'wa SEEBA; na lūūlū ū Solomoni nī libità ī lyose būja koi kūjūnomba ū SEEBA.

⁶Ū Solomoni ūja a ha ng'walīlo gwa shaba ū kū būtongi bo ng'wa SEEBA ū ng'wiheema lya kwibilingīla, ūfunya mitugo[1] shihūmbī shimò kūbiza shitambò sha kūpemvwa a ha ng'walīlo gwenūyo.

⁷Ū būjikū wenūbo ū Mulungu ūng'wilongela ū Solomoni ūng'wīla, “Lombaga shose shose īsho ūtogilwe nakwinhe.”

⁸Ū Solomoni ūnshokeja ū Mulungu, “Ū baba ū Daūdi wang'olekegije wiza būtaale no, hūna ū nene ūnīīta kūbiza ntemi a ha ng'wanya gwakwe.

⁹Na lūūlū SEEBA Mulungu, shikīlījaga ū kwisagīja kwako ū kūlī baba ū Daūdi, nguno wanīītile kūbiza ntemi wa banhū bingī gītī lūbuubuu lwa hasī.

¹⁰Ninhage masala na witegeleja, nadūle ū kūbatongeela a banhū benaba; nguno nani ūyo adūgije kūlīsuga ī lihanga lya banhū bako ī litaale lyenīlī.”

¹¹Hūna ū Mulungu ūng'wīla, “Īkī ī ng'hūmbū ja ng'holò yako jilī ha mhayo gwenūyū, waleka kūlomba būsabi, sabo ningī, ikūjo, nūūlū gīkī banishi bako bache; nūūlū ūtalombile myaka mingī ya būlamu, alīyo walomba ūpandīke masala na witegeleja ūmane ū kūbasuga a banhū bane abo nakwītile kūbiza ntemi wabo,

¹²na ng'hana ūkūpandīka ū witegeleja nū būdeeba. Nū būsabi nakūkwinha, pyī nī sabo ningī, nī likūjo; ūkūpandīka ūmo ataalī kūpandīkīla ntemi ūngī ose ose, na atalabiza ho ūngī wa kūbiza gītī bebe.

¹³Na lūūlū ū Solomoni wīnga ū kū būtongi w'iheema lya kwibilingīla ū kwipandī lyeelya ī Gibeoni, ūja Yelusalemu. Ūbasuga a Baisilaeli.

¹⁴Ū Solomoni walī wakumingīja magogoteni mingī ga falasa, hamò na badamhīji ba falasa bingī no; walī na magogoteni shihūmbī shimò na magana anè, na falasa shihūmbī ikūmi na shibīlī; ī shose shenīshi walī ashibīkile mu mizengo īyo walī wazenga kūlwa magogoteni ga būlūgū; na shingī wikalaga nasho ū mu nzengo gwa Yelusalemu.

¹⁵Nīyo ū ntemi walī wajikwīja no ī feza ū mu Yelusalemu, jūyūbonekana hose hose gītī mawe dūhū, nī mitī ya mibanga yalī mingī no, gītī mipumbula[2] īyo īkazwaga mu matūmbī.

¹⁶Ī falasa ja ng'wa Solomoni jalagījiagwa kūfuma Misili na Kū; a bachooji ba sabo ba ng'wikūlū bajaga Kū baakajigūla.

¹⁷A magogoteni ayo gagūlagwa būlī lyene īlo balīgūlaga na kūlyenha, lyabasojaga shekeeli ja feza ja būdito wa kilo mpungatī, ī falasa būlī yene yabasojaga shekeeli ja feza ja būdito wa kūkīla a ha kilo īmò na nusu. Nabo babajingījaga ī shikolo shenīsho pye a batemi ba Bahītī na a Baalamu.”