Read Sukuma Bible 2015 – Bibilia Ilagano Lya Kale 2015 2 Mihayo ya Shikū 19 Bible Online

2 Mihayo ya Shikū 19 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 19

¹Ū Yehoshafati ū ntemi wa Yuda aho washoka ū kwikūlū lyakwe ī Yelusalemu alī mhola,

²ng'hangi Yehu ng'witūnja o ng'wa Hanaani ūnsūng'wanha; ūng'wīla, “Ni kinehe ū bebe nose ū kūgunanhaga babūbi, na kūbatogwa abo batantogilwe SEEBA? Managa gīkī wansaayīkije ū SEEBA.

³Kwike a hene ū bebe ūlī nabo ū wiza, nguno ī sī wīyīngīgije a ma Ashela; nī ng'holò yako īlolelile kūlī Mulungu kūnkooba we.”

⁴Ū Yehoshafati wikalaga Yelusalemu, hūna ūbūūka hangī kūja akūbayeeleelaga a banhū, kwandīja Beeli-sheba kūshisha kū sī ja magūlya ga Efulaimu; ūbashosha kūlī SEEBA, ū Mulungu wa bakūlūgenji babo.

⁵Ūtūūla balamuji ū mu mizengo ya Yuda ī yose īyo yalī īpīndīlījiwe ndugu.

⁶Ūbawīla, “Ng'ūyidedeeng'hanya chiza īyo mukwīyītaga, nguno mutūfunyaga būlamuji kūlwa nguno ya ng'wa munhū, alīyo kūlwa nguno ya ng'wa SEEBA, ūyo alī hamò ning'we būl'ikanza ūlū mulīlamula.

⁷Alilūūlū, bizagi na logohano lwa ng'wa SEEBA; nguno ū kūlī SEEBA Mulungu wise būtīho būbi nūūlū būsolaanhya, nūūlū būhongi.”

⁸Nū mu Yelusalemu ū Yehoshafati ūbasola bamò ba Balawī na bagabīji, na a bataale ba ndūgū ja Baisilaeli, ūbatūūla kūbiza balang'hani ba shilagīlo sha ng'wa SEEBA, na balamuji ba mihayo; būbiza ba mu Yelusalemu ng'wenūmo.

⁹Ūbinha ī shilagīlo alīhaya, “Shiigelile mutūmame mu būtūngīlīja na ng'holò īmò, nīyo mu logohano lwa ng'wa SEEBA.

¹⁰Būlī mhayo ūyo gūng'wizīīla kūfuma kū baana ba ng'wing'we abo bakwikalaga ū mu mizengo, nūūlū gūbize mhayo gwa būbūlagi, nūūlū mihayo yīngī ya shilagīlo, malange, katongeelele, nūūlū kajīle; ng'ūbahūgūla. Yaya ū kūng'hūba ū SEEBA, nguno ūlū ītī chene numho ū būpelanu bokwe būkūng'wizīīla a bing'we na a badūgū bing'we; alīyo ūlū ng'ūbalanga, mutūhūba.

¹¹Ū Amalia ū ntaale wa bagabīji, akūbiza ntaale wing'we ū mu būtūmami wa kūlī SEEBA; ū mu milīmo ya ntemi ū ntaale wing'we akūbiza Zebadia ng'witūnja o ng'wa Ishimaeli, ū ntaale wa lūganda lya ng'wa Yuda. A Balawī bakūbiza batūmami ba kūmugunanha. Tūmamagi mu būshisha ng'holò, ū SEEBA abize hamò nabo abo bakwītaga chiza.”