Read Sukuma Bible 2015 – Bibilia Ilagano Lya Kale 2015 2 Mihayo ya Shikū 22 Bible Online

2 Mihayo ya Shikū 22 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 22

¹A banhū ba Yuda būntemya ū Ahazia, ū ng'witūnja o ng'wa Yeholamu wa kūmalīja; nguno banhū bakiza hamò na Baalabu kūūbūka, bīdumīla ī ng'hambī būbabūlaga pye a bitūnja a bataale. Na lūūlū ū Ahazia ū ng'witūnja o ng'wa Yeholamu ntemi wa Yuda ūbiza ntemi.

²Ū Ahazia aho alandya kūtema walī na myaka makūmi abīlī n'ībīlī,[14] ūsuga ng'waka gūmò ū mu Yelusalemu. Ū nina witanagwa ī lina lyakwe Asalia, ng'wizūkūlū o ng'wa Omuli.

³Nang'hwe ū Ahazia akalondeela nhūngwa ja kaya ya ng'wa Ahabu ū mu kashimīzīle kakwe, nguno ū nina wansamīlījaga kwīta yabūbi.

⁴Na ng'hana wīta yabūbi ū mu miso ga ng'wa SEEBA, gīt'ūmo yalī yītīla ī numba ya ng'wa Ahabu. Nguno aho waacha ū ise, būbiza boi a baganikīji bakwe ū mu kajīle; būng'hūbya!

⁵Ūwigwa ū būganikīji wabo, kūshisha ūja na Lamosi-gileadi hamò na Yolamu ng'witūnja o ng'wa Ahabu ntemi wa Isilaeli, kūjiilwisha būlūgū na Hazaeli ntemi wa Alamu. A Baalamu būnabūla ū Yolamu,

⁶ūshoka Yezileeli kwifuula, na kūpīla a magulagīje ayo bakaminya alī Lamosi kū būlūgū, aho wilwishaga nū Hazaeli ū ntemi wa Alamu. Nang'hwe ū Ahazia ū ng'witūnja o ng'wa Yeholamu ntemi wa Yuda, ūkūbīja ī Yezileeli kūjūnola ū Yolamu ū ng'witūnja o ng'wa Ahabu, nguno akalabūlwa ū mu būlūgū.

⁷Ū Mulungu walī ahelile gīkī ū Ahazia ache mu nzīla ya kūja kūnola ū Yolamu. Nguno aho washika koi, būja nū Yolamu kūnsūng'wanha Yehu ng'witūnja o ng'wa Nimushi, ūyo SEEBA walī wamila maguta kūlwa kwīkenaagūla ī numba ya ng'wa Ahabu.

⁸Ū Yehu aho alīyīgwisīja nsango ī numba ya ng'wa Ahabu, ūbabona na banhū ba ng'wikūlū lya Yuda, na bitūnja ba badūgūye ū Ahazia, abo baalī hamò nū Ahazia kūlwa kūntūmamīla; nabo ūbabūlaga.

⁹Hanuma ya henaho ūja akūnkoobaga nū Ahazia, banhū bakwe būmpandīkīla Samalia walī wibisa; būndima. Wenhwa ū kūlī Yehu wiza ūbūlagwa būnjīka; nguno akahaya, “Ū ng'wenūyo walī ng'witūnja o ng'wa Yehoshafati, ūyo wankoobaga SEEBA na ng'holò yakwe yose.” Na lūūlū ū mu numba ya ng'wa Ahazia ūgaya mo nūūlū ūmò ūyo walī na būdūla wa kūbūdima ū būtemi.

¹⁰Ū Asalia, ū nina o ng'wa Ahazia, aho wabona gīkī ū ng'witūnja wakwe waacha, nang'hwe wandya kūbakenaagūla pye a banhū ba shibyalīlwe sha ntemi.

¹¹Alīyo walīho nshīke o ntemi Yeholamu[15] witanagwa Yehosheba, ūnsola Yoashi ng'witūnja o ng'wa Ahazia; ūng'wīnja ū mu baana ba ntemi abo baalī bahelilwe kūbūlagwa, ūūkamisa hamò na neji wakwe mu chumba sha kūlaala. Nguno ū Yehosheba ng'wenūyo walī nshīke o ng'wa Yeholamu, n'ilūmbūye o ng'wa Ahazia; hama walī nke wa ngabīji Yehoyada; ū nshīke ng'wenūyo ūmisa ū nīgīnī, gīkī ū Asalia atizūmona akamūlaga.

¹²Bakikala hamò nang'hwe bamisile mu hekalu ikanza lya myak'ītandatū; ī likanza ī lyose īlo Asalia walī ayīdimile ī sī.