Read Sukuma Bible 2015 – Bibilia Ilagano Lya Kale 2015 2 Mihayo ya Shikū 26 Bible Online

2 Mihayo ya Shikū 26 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 26

¹Hanuma a banhū ba Yuda a bose būnsola ng'witūnja wakwe Uzia, makanza genayo walī na myaka ikūmi n'ītandatū; būntemya a ha ng'wanya go ng'wa ise ū Amazia.

²Aho wifuula ū Amazia hamò na bakūlūgenji bakwe, ū Uzia ūgūzenga būpya ū nzengo gwa Elasi, hama ūgūshosha mu būsugi wa Yuda.

³Ū Uzia walī na myaka ikūmi n'ītandatū aho alandya kūbiza ntemi, ūtema ū mu Yelusalemu ikanza lya myaka makūmi atanò n'ībīlī. Ū nina walī muna Yelusalemu, ī lina lyakwe witanagwa Yekolia.

⁴Akīīta yawiza ū mu miso ga ng'wa SEEBA gīt'ūmo walī wītīla dūhū ū ise ū Amazia.

⁵Wankoobaga ū Mulungu ū mu shikū ja ng'wa Zekalia ūyo akananga kūng'ogoha Mulungu, ū ng'wikanza lyose īlo walī akalalilwe kūnkooba SEEBA, ū Mulungu wang'wīlūkīlaga mbango.

⁶Ikanza ilebe ūja kū būlūgū kwilwisha na Bafilisiti, ūūkakambagūla ndugu ja Gaasi, Yabune na Ashidodi. Hanuma ya henaho ūzenga mizengo bbihī na Ashidodi, na kū mapandī gangī ū mu sī ya Bafilisiti.

⁷Ū Mulungu akangunanha ū mu wilwisha wakwe na a Bafilisiti, na a Baalabu abo bikalaga mu Gulu-baali, na Bameuni.

⁸A Baamoni a bene būtoba na goodi ū kūlī Uzia, nīyo ū lūkumo lwakwe lūsambaala kūshisha lūūshika Misili, nguno akabiza munhū wa būdūla būtaale no.

⁹Hama ū mu Yelusalemu ūzenga numba ndīīhu ja balang'hani, a ha mita gwa ha lūpembe, ha mita gwa kū ntulumenho, na a ha kuluba aho jalī jimanhīgije ndugu; ūjiguzuhya jūdaama.

¹⁰Nū kū sī y'itogolo ūzenga numba ndīīhu ja balang'hani, ūsīmba na malambo mingī, nguno walī na madaale mingī ga mitugo; gaalī kū mitulumenho ya ngūlū na kū mbūga. Na migūnda ya mizabibu walī nayo ū mu mitulumenho ya ngūlū, nū mu sī ja malago a masoga, nguno walī atogilwe milīmo ya būlīmi; walī na banhū batūmamaga ū mu migūnda yakwe yenīyo.

¹¹Nī libità lya ng'wa Uzia lyalī na bashilikale balangilwe chiza, hama būgabanhyiwa mu magele gamalīīlile kwingīla mu būlūgū, kūlenganīla na a kabalīle ka ng'wa Yeileli ū ng'wandīki hamò na Maaseya, abo baalī ha sīlīlī ya būtongeeji bo ng'wa Hanaani, ūmò o batūmami ba h'ikūlū.

¹²A batongeeji a bose a ba magele ga ndūgū ja bashilikale baalī shihūmbī shibīlī na magana atandatū.

¹³A ha sīlīlī yabo baalīho bashilikale shihūmbī magana adatū na mpungatī, na magana atanò; banhū balangilwe mihayo ya būlūgū, ibità lya nguzu ningī lya kūdūla kūngunanha ū ntemi kwilwisha na banishi bakwe.

¹⁴Ū Uzia walī wabinha shilanga pye a bashilikale, mūda, machimu, mahima ga kūlang'hana mitwe mu būlūgū, shizwalo sha mu būlūgū, būta na nhaago.

¹⁵Ū mu nzengo gwa Yelusalemu ūtūūla mashini jibeejiwe na banhū ba masala, ja kūdūla kūlasa masonga na kūponda mawe mataale, hūna jūtūūlwa ū mu numba ja balang'hani, nū kū mhembe ja nzengo. Ū Uzia akakumūka no, lūsambaala ū lūkumo lwakwe lūsegenela, nguno walī wagunanhwa kūshisha ūbiza munhū wa būdūla būtaale.

¹⁶Alīyo aho wabiza na būdūla būtaale gīko, wigūngūhya; ūbiza wigwisha wei ng'wenekīlī, nguno akīnga ū mu būshikanu ū kūlī SEEBA Mulungu wakwe. Nose wingīla na mu hekalu ya ng'wa SEEBA kūzuukīja būbbani ha ng'walīlo gwa būbbani.

¹⁷Ū ngabīji Azalia na a bagabīji ba ng'wa SEEBA a bangī pye a bose būshisha ng'holò, būnkūbīja moi.

¹⁸Būshika būng'wīla, “Ū nīmo gwa kūzuukīja būbbani kūlī SEEBA gūtī gwako ū bebe Uzia. Ū gwenūyo nīmo gwa bagabīji ba shibyalīlwe sha ng'wa Alooni, abo bamala kwejiwa na kūtūūlwa ho kūlwa nīmo gwa kūzuukīja būbbani. Fumaga ū ng'wipandī lyeela wītaga mhayo gūhūbile; ū SEEBA Mulungu atūkwīlūkīla ja kūkwenhela ikūjo.”

¹⁹Ī likanza lyenīlo ū Uzia walī n'izuukījo lya būbbani, ūsangwa wahaya kūzuukīja būbbani; na lūūlū ūpelana no. Alīyo aho alī ū mu hekalu ya ng'wa SEEBA kū būtongi bo ng'walīlo gwa kūzuukīja ho būbbani, abakiimaalīlile a bagabīji akūheezelaga kūlwa kūbapelanīla, kwimanīla wagulumūkīlwa mbiji ū kū būshū bokwe.

²⁰Ū ngabīji ntaale Azalia na a bagabīji a bangī aho bankalalīla, būmona alī na mbiji ū kū būshū bokwe; na lūūlū būnkangīlīja afume hanze wangū. Nīyo nū wei ng'wenekīlī ūcha minala ūfuma, nguno akabona gīkī watūlwa na SEEBA.

²¹Hūna ū ntemi Uzia ūbiza munhū wa mbiji kūshisha lūshikū lwa kūcha kwakwe. Ūkomanyiwa ūtūūlwa mu numba yakwe ya heke, munhū wa mbiji atazunīlījiwe kwingīla mu hekalu ya ng'wa SEEBA. Ng'witūnja wakwe Yosamu ūbiza ntaale wa mihayo ya ng'wikūlū, na a banhū ba sī ūbasuga wei.

²²Ī mihayo yīngī ī ya mu shikū ja būsugi bo ng'wa Uzia, kūfuma wandījo kūshisha kū būkalīkījo wayo, yandīkilwe na ng'hangi Isaya ng'witūnja o ng'wa Amozi.

²³Ū Uzia wifuula na bakūlūgenji bakwe, ūjīkwa bbihī nabo, ng'witongo lya batemi lya kūjīkīla; nguno a banhū bakahaya, “Ū ng'wenūyo walī na mbiji!” Ng'witūnja wakwe Yosamu ūbiza ntemi a ha ng'wanya gwakwe.