Read Sukuma Bible 2015 – Bibilia Ilagano Lya Kale 2015 2 Mihayo ya Shikū 35 Bible Online

2 Mihayo ya Shikū 35 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 35

¹Hūna ū Yosia ūlagīja gīkī ībize ho pasaka ū mu Yelusalemu kūlwa ng'wa SEEBA; ī ng'holo ja pasaka jūsīnzwa mu lūshikū lw'ikūmi n'inè ng'weji gwa kwandya.

²A bagabīji ūbahelela ī ndīīma jabo; hūna ūbatimbya ng'holò gīkī bagwīte mu welwa ng'holò ū nīmo gwa mu hekalu ya ng'wa SEEBA.

³A Balawī, abo baalī baamala kwejiwa kūlwa ng'wa SEEBA, abo nīmo gwabo gwalī kūbalanga a banhū; ūbawīla, “Ī lisandīko lyeela lītūūlagi mu hekalu, īyo wīzenga Solomoni ng'witūnja o ng'wa Daūdi ntemi wa Isilaeli; mutī na nguno ya kwikala ng'ūlībūūcha ha mabega ging'we būlī makanza. Ī haha managi gīkī ū nīmo gwing'we gūlī kūntūmamīla SEEBA Mulungu wing'we, hamò na a banhū bakwe a Baisilaeli.

⁴Gabanhīkagi būlī bene mu ndūgū jabo kūlondeela magele ging'we; gīt'ūmo kahelele ako katūūlwa na Daūdi ntemi wa Isilaeli, hamò nū ng'witūnja wakwe ū Solomoni.

⁵Īmīīlagi mu magelè magele, hamò nabo a baana ba ng'wing'we kūlondeela ndūgū ja basaabo; būlī hene lībize ho igelè lya Balawī.

⁶Nī ng'holo ja pasaka mukūjisīnza bing'we; na lūūlū iyeejagi mujigolanyī ī ng'holo ja pasaka jenījo kūlwa nguno ya baana ba ng'wing'we; ng'wīte gīt'ūmo SEEBA alagīlile mu nzīla ya ng'wa Musa.”

⁷Ī shakwinha sha pasaka īsho akafunya ū Yosia kūlwa nguno ya banhū bose abo baalīho ho a henaho, jalī ng'holo hamò na mbūli shihumbī makūmi adatū, na nzagamba shihūmbī shidatū. Ī jose jenījo jalī ja kūfuma mu sabo ja ntemi dūhū.

⁸A batūmami bakwe nabo būfunya kūlwa nguno ya banhū, na a bagabīji hamò na a Balawī. A batūmami ba mu hekalu ya ng'wa Mulungu a ba Hilikia, Zekalia nū Yehieli būbinha a bagabīji shakwinha sha pasaka, mitugo shihūmbī shibīlī na magana atandatū, na ng'ombe magana adatū.

⁹Ū Konania nang'hwe hamò na a baana ba ng'wawe a ba Shemaya nū Nesaneeli; hamò na a batongeeji ba Balawī a ba Hashabia, Yeieli nū Yozabadi, būfunya shakwinha sha pasaka kūlwa nguno ya Balawī, ng'holo na mbūli shihūmbī shitanò, na ng'ombe magana atanò.

¹⁰Ī likanza aho lyang'wa, a bagabīji bīmīīla būlī ng'wene h'ipandī lyakwe, a Balawī nabo bihela mu magele gabo gīt'ūmo walī walagīīlīla ū ntemi.

¹¹Ī mitugo ja pasaka jandya kūsīnzwa, a bagabīji nabo bandya kūgaseseebela a mininga ayo binhīlījiagwa; a Balawī h'abo bajibaagaga ī mitugo.

¹²Ī shitambò sha kūpemvwa būshitūūla ha mhūjo kūlwa kūbinha a banhū ūmo baalī bigasha mu magele mado mado, kūlondeela ndūgū ja basaabo, gīkī bafunye shitambò kūlī SEEBA, gīt'ūmo yandīkilwe mu Shitabo sha ng'wa Musa. Nī nzagamba būjīīta gīko.

¹³Ī mitugo ja pasaka būjoocha gīt'ūmo īhayīlilwe; ī shakwinha ī sheela būshizuga ī shene mu manengelo, masufulia, na mazugīlo gangī gangī, hūna būjigabanhya wangū ū kū banhū a bose.

¹⁴Hanuma ya henaho hū bibeegeja nī shabo na a bagabīji; nguno a bagabīji, a ba shibyalīlwe sha ng'wa Alooni baalī na nīmo gwa kūfunya shitambò sha kūpemvwa, hamò na a masazu; kūshisha wil'ū būjikū. Na lūūlū a Balawī būbeeja ī shabo nī sha bagabīji ba shibyalīlwe sha ng'wa Alooni.

¹⁵A bīmbi a ba shibyalwe sha ng'wa Asafu baalī ū mu mapandī gabo ayo baalī bahelelwa na Daūdi hamò na Asafu na Hemani na Yedusuni, abo baalī baboni ba ntemi. A balang'hani ba ha mibita baalī batī na nguno ya kwīnga a ha mapandī gabo, nguno a bichaabo a Balawī bakabalonja longeja nabo ī shabo.

¹⁶Hūna lūūlū ū nīmo gwa kūnamya SEEBA mu nzīla ya kwīyegela ī pasaka, gwītwa mu lūshikū lwenūlo pyī ū gose; nū nīmo gwa kūfunya ī shitambò sha kūpemvwa gwītwa gīt'ūmo ntemi Yosia walī walagīīlīla.

¹⁷A Baisilaeli abo baalīho ī likanza lyenīlo būmala shikū mpungatī bakwīyegelaga ī Psaska nī shigukulu sha migatī ītī na shibimbya.

¹⁸Ī pasaka yalī ītaalī kūyegelwa gīko ū mu Isilaeli kūfuma mu shikū ja ng'hangi Sang'weli. Walī atīho ntemi wa Isilaeli nūūlū ūmò ūyo walī wabīta kwīyegela ī pasaka gīt'ūmo akīītīla ū Yosia; kwīlya hamò na bagabīji, Balawī, na a banhū ba Yuda a bose, na a Baisilaeli abo baalīho hoi, hamò na a banhū ba Yelusalemu.

¹⁹Ī pasaka yenīyo īkaliwa mu ng'waka gw'ikūmi n'īnaane ū mu shikū ja būtemi bo ng'wa Yosia.

²⁰Hanuma ya yose yenīyī, ū Yosia aho wamalamaja ū kwīgolanya ī hekalu, Neko ntemi wa Misili ūbūūka kūjiilwisha būlūgū Kakemishi kū mongo gwa Fulati. Ū Yosia ūnchaamīīla gīkī alwe būlūgū nang'hwe.

²¹Alīyo ū Neko ūntūmīla banhū kūng'wīla, “Bebe ntemi wa Yuda, gūlīho mhayo kī a ha gatī yako nū nene? Ī likanza lyenīlī natizile kūkūūbūkīla bebe, najile kū banhū abo nalī na wilwisha nabo; ū Mulungu wanikomigile naje wangū, na lūūlū lekaga ū kwīhangīja īyo īhelilwe na Mulungu ūyo alī hamò nane, nguno akūkūkenaagūla.”

²²Kwike ū Yosia atanyamukile gīkī aleke ū kūnchaamīīla; ūzwalīla shizwalo sha kūng'wīta ajimīīlīke, hūna ūja kwilwisha nang'hwe ū būlūgū. Ūbiza walema ū kwīyigwa īyo wīhayaga ū Neko kūlwa kūlagīlwa na Mulungu. Ūja dūhū kūndumīla, ū būlūgū wenūbo būlwīlwa ha mbūga ya Megido.

²³Balasi būnasa ū ntemi Yosia; hūna ūbawīla a batūmami bakwe, “Nīnjagi a henaha munitwale, nalabūlwa!”

²⁴Būng'wīnja ū ng'wigogoteni lyakwe, būntūūla ng'wigogoteni līngī walī nalyo, būnshosha Yelusalemu ūūkashikīla kūcha. Ūjīkwa mu shigila sha bakūlūgenji bakwe; pye a banhū ba Yuda nī Yelusalemu būnīla.

²⁵Yelemia ūbeeja mīmbo ga kūnīla ū Yosia; kūshisha lelo īyī pye a bagosha na a bakīma a bīmbi bataalī bakang'wizūkagwa ū Yosia ū mu mīmbo ga ng'hūngū genayo. Shūbiza shīmīle sha banhū ū mu Isilaeli ū kwīmba a mīmbo genayo; nīyo ī haha gandīkilwe mu shitabo sha ng'hūngū.

²⁶Ī milīmo ya ng'wa Yosia ī yīngī, hamò nī yawiza īyo wīyīta kūlwa kūlondeela īyo yandīkilwe mu shilagīlo sha ng'wa SEEBA;

²⁷Ī yose īyo wīta, kūfuma wandījo kūshisha būkalīkījo, yandīkilwe mu shitabo sha batemi ba Isilaeli na Yuda.