Read Sukuma Bible 2015 – Bibilia Ilagano Lya Kale 2015 2 Mihayo ya Shikū 4 Bible Online

2 Mihayo ya Shikū 4 - Sukuma Bible 2015 – Bibilia Ilagano Lya Kale 2015 bible

2 Mihayo ya Shikū 4

¹Ūbeeja na ng'walīlo gwa shaba, gwa fuuti makūmi adatū ū būlīhu nū būgalī galī wago; ū būgūngūhu fuuti ikūmi na'itanò.

²Ūbeeja na nyanza[6] ya chūma sha kūsula; ū būgalī galī wayo ū kūfuma kū lūgala ūlū kūja ū kū lūgala ū lūngī jalī fuuti ikūmi n'itanò; ū būgūngūhu fuuti mpungatī na nusu. Ūlū lūgoye lwa kūshipīndīlīja lūkūbiza na būlīhu wa fuuti makūmi anè n'itanò.

³A ha sīlīlī ya lūgala shalī shihelilwe shiikolile sha nzagamba ja ng'ombe shūpīndīlījiwa, būlī ha ng'wanya gwa nusu miita shūbiza ho shiikolile ikūmi. Ī shiikolile shenīsho shalī sha chūma shisulilwe hamò nī nyanza, hūna shūhelwa ng'hīlīlī ibīlī kūlūpīndīlīja pyī ū lūgala.

⁴Ī nyanza yalī ījaadīkilwe ha migongo ya shiikolile sha nzagamba ja ng'ombe ikūmi n'ibīlī, idatū jūūlolela sukuma, idatū ng'weli, idatū dakama, idatū kīya. Hūna ī nyanza yūūlembeela a higūlya ya nzagamba jenījo; ī joi jiilogeja madako.

⁵Ū būgīnu wa shiseme sha nyanza shenīsho walī gītī inchi idatū gīko; ū lūgala lwalī lūbeegije lūtaamuka gītī lwa shikombe, hūna lyūbiza gītī booba būtaale waalile. Ī nyanza yenīyo yalī na būtaale wa kūdūla kūbūūcha galani ja minzī shihūmbī ikūmi na shimò, na magana atanò.

⁶Ūbeeja na shiseme shingī ikūmi sha kūbiza gītī makalayi; ūshitūūla kūlwa koogeja, shitanò kū lwandī lwa dakama, na shitanò kū lwandī ū lwa sukuma. Ī shitambò sha kūpemvwa shoojiagwa ng'wenūmo, alīyo ī nyanza ī yene bītūmamīlaga bagabīji kūlwa kooja magūlū na makono gabo.

⁷Ūbeeja na makīndīkīlo ikūmi ga tala ga zahabu, kūlenganīla na a kabeegeje kajo ako kaalī kahayiwe; hūna ūjitūūla mu hekalu, itanò jūbiza kū lwandī lwa dakama itanò lwandī lwa sukuma.

⁸Hanuma ya henaho ūbeeja na meza ikūmi ūjitūūla ū mu hekalu; itanò kū lwandī lwa dakama, itanò lwa sukuma. Ūbeeja na mabbakuli igana ga zahabu ga kūseseebelela.

⁹Nī gwaalugwa ya bagabīji wībeeja, nī libīndo ī litaale, nī milyango ya h'ibīndo. Ī milyango wīnaagīla shaba.

¹⁰Ī nyanza wītūūla kū lwandī lwa dakama ya kīya.

¹¹Ūbeeja na nzweso, hamò na makolelo na mabakuli ga kūseseebelela. Na lūūlū ū Hulamu ūmala pyī ī milīmo ya ntemi Solomoni īyo wībeejaga mu hekalu ya ng'wa Mulungu; ī milīmo ya kūbeeja shikolo gītī,

¹²ng'hīngī īj'ibīlī, na a makundīkījo ayo abīlī a ga kūbiza gītī mabbakuli, ayo akajizwīka ī ng'hīngī jenījo būbīlī wajo; nū tūlweyo ūto akatūdaamīlīja a ha makundīkījo ga ng'hīngī genayo kūlwa būlenji;

¹³na a makomamanga a magana anè ayo akagatūūla a higūlya ya makundīkījo genayo būbīlī wago, (ng'hīlīlī ibīlī ja makomamanga ījo jikatūūlwa a higūlya ya tūlweyo kūlwa kūtūūla būlenji a ha makundīkījo a ga kūbiza gītī mabbakuli, ayo gaalī a ha ng'hīngī jenījo);

¹⁴na a makīndīkīlo ayo ikūmi nī shiseme īsho ikūmi ī sha kūtūūla a makīndīkīlo genayo;

¹⁵nī nyanza, nī nzagamba īj'ikūmi n'ibīlī ījo jalī ha sīlīlī yayo;

¹⁶nī nzweso, na a makolelo, na a mabbakuli ga kūseseebelela. Ī shikolo shose shenīshi īsho Hulamu-abi akameegeja ntemi Solomoni kūlwa nguno ya hekalu ya ng'wa SEEBA, shalī sha shaba īguusilwe yūlabangīla.

¹⁷Ū ntemi walī walagīja yaabiwa ī shaba mu maabījo ga malongo, kū mbūga ya kū mongo gwa Yolodani; sī ya mīmbī na Sukoti na Zalesani.

¹⁸Ī shikolo īsho Solomoni akabeeja shenīshi shikakwīla no, ūleka nū kūbūlola ū būdito wa shaba.

¹⁹Na lūūlū ū Solomoni ūbiza washibeeja pyī ī shikolo īsho shalī mu hekalu ya ng'wa SEEBA; shikolo gītī, Ng'walīlo gwa zahabu, meza ījo jatūmamīlagwa kūtūūlwa migatī ya shiizūkījo;

²⁰makīndīkīlo ga tala ayo gaalī ga zahabu yawiza nī tala jago, kūlwa kūbaka ū kū būtongi w'ipandī ī lyeela no no no, gīt'ūmo gwalī gūhelelilwe.

²¹Nī shikolo ī shingī ī sha zahabu; gītī, būlenji wa bonji, tala, na a masabūlīlo ga shikolo shisebu (a gene gaalī gabeejiwe ga zahabu yoi yenekīlī dūhū);

²²majimījo ga tala ga zahabu yawiza, mabbakūli ga kūseseebelela, shijiko, shiseme sha kūtūmamīla kūzuukīja būbbani, milyango ya zahabu ya kwingīlīla mu hekalu; nī milyango ya mu gatī ī ya kwingīlīla ng'wipandī lyeela no no no; nī milyango ya ha nyango ū gwa kwingīla mu chumba shitaale ī sha mu hekalu.