Read Sukuma Bible 2015 – Bibilia Ilagano Lya Kale 2015 Ezila 4 Bible Online

Ezila 4 - Sukuma Bible 2015 – Bibilia Ilagano Lya Kale 2015 bible

Ezila 4

¹Hūna lūūlū a banishi ba Yuda na Benjamini aho bigwa gīkī a banhū abo baalī basaamiwa bashoka ū kūfuma kū būding'wa, na gīkī balīyīzenga ī hekalu kūlwa ng'wa SEEBA ū Mulungu wa Isilaeli,

²bakiza ū kūlī Zelubabeli na a bataale ba kaya ja bakūlūgenji; būbawīla, “Tūzunīlījagi nise tūzenge hamò ning'we, nguno nise tūkanamyaga ū Mulungu wing'we gīt'ūmo mukīītīlaga a bing'we. Nī shitambò tūkamfunījaga pyī ī shikū kwandīja makanza ga ng'wa Esahadoni, ū ntemi wa Ashulu ūyo watwenha ū ng'wenūmu.”

³Alīyo ū Zelubabeli nū Yeshua, na a bataale a bangī a ba kaya ja bakūlūgenji ū mu Isilaeli, būbawīla gīkī, “A bing'we mutī na ngabo gete ū mu nīmo gwa kūnzengela hekalu ū Mulungu wise. Ū gwenūyo gwise iyene, tūkūnzengela bise ū SEEBA Mulungu wa Isilaeli, gīt'ūmo ntemi Koleshi wa Būajemi watūlagīlile.”

⁴Hūna a banhū abo baalī ū mu sī yenīyo bandya kūtūmamīla nzīla ja kūbagwisha ng'holò a Bayudaya, gīkī babogohye ū kūzenga.

⁵Nīyo būgodisha na banhū ba kūjūhoya nabo, būyūbawīla mihayo ya kūbogohya bagūleke ū nīmo gwenūyo. Ū mhayo gwenūyo baagwīta ū mu shikū ja ng'wa Koleshi ī jose aho alī ntemi wa Būajemi, kūshisha mu shikū ja ng'wa Dalio ūyo akabiza ntemi wa Būajemi.

⁶Ū mu shikū ja būsugi bo ng'wa Ahasūlo, bandīka mihayo ya kūbabūūla a bikaji ba Yuda nī Yelusalemu.

⁷Nū mu shikū ja ng'wa Atashasta, ba Bishilamu, na Misiledasi na Tabeeli na a bichabo a bangī bakang'wandīkīla nyalūba ū ntemi Atashasta wa Būajemi. Ī nyalūba yalī yandīkilwe mu nuguta ja Shialamu, nū lūlīmi lwalī lwa Shialamu.

⁸Ū Lehumu, ūyo walī ntaale wa būsugi, nū Shimushai ū ng'wandīki, bakang'wandīkīla ū ntemi Atashasta, nyalūba ya kūbabūūlīla a bikaji ba mu nzengo gwa Yelusalemu; bandīka mu mbika īyī:

⁹Kūfuma kū ba, Lehumu ntaale wa būsugi, na Shimushai ng'wandīki, hamò na a bichabo a balamuji, batongeeji, batūmami, na a babo bafuma Būajemi, na Eleki, na Babuloni, na bangī ba kūfuma Susa, hū ū kūhaya Elamu,

¹⁰na a banhū ba mahanga a gangī abo baalī basaamiwa na nkūjiwa ntaale Osinapeeli, benhwa mu nzengo gwa Samalia na hose hose ū mu sī īyo īlī kū nkīlo gwa mongo.

¹¹Ī mihayo ya mu nyalūba yene yīyī, “Kūlī ntemi Atashasta, kūfuma kū batūmami bako abo balī kū sī ya kū nkīlo gwa mongo. Anukūlaga kūgīsha kwise.

¹²Alilūūlū, ū ntemi ni ikalage amanile gīkī, a Bayudaya abo baafumile kūlī bebe kwiza kūnū tūlī, baajile Yelusalemu. Nīyo bandije kūgūzenga hangī ū nzengo gwenūyo; alīyo hū gwabūbi gete, hangī ngomi gwa bagomi. Balīyīzenga ī ndugu kūnū bībeegeleja nī misingi.

¹³Kwike īkūbeelela ū ntemi amane gīkī, ū nzengo gwenūyū ūlū gūlazengwe gūshile, nī ndugu jago jimalwe, bakooya ū kūtoba ī goodi, nū kūfunya ī sabo īyo īkafunyiagwa kūlwa kūlang'hana sī, na kūlwa kūfunya būlūmbi kū selekali. Ū mu gīko ī likūlū līkūjimīīja hela ningī no.

¹⁴Alilūūlū, īkī ī sabo ya kūfuma kwikūlū h'īyo ītūlang'hanile, ītī yawiza a bise twikale twiloleelile dūhū, alīyo ū ntemi alīdalahwa gīko. H'ī chene twabona tūng'wandīkīle ū ntemi tūng'winhe ī mihayo yenīyī.

¹⁵Wītwe būgīsīlīja bo ng'hana ū mu shitabo īsho shandīkwa na a bataale bako. Ū mu mihayo īyo yandīkilwe ūkūbona hape gīkī ū nzengo gwenūyū nambu no, hama gūkabakoyaga no a batemi na a basugi ba sī ījo jigūsugile. Nīyo kūfuma kale gūlī na nzīla ja kūbagomisha a banhū; h'ī nguno yene ū nzengo gwenūyū nose gūkakenaagūlwa gete.

¹⁶A bise tūlīnanja hape ū ntemi gīkī, ū nzengo gwenūyū ūlū gūlazengwe nī ndugu jago jishikaane, ūkūgayiwa gete ī sha kūsola ū kūfuma ū kū sī īyo īlī kū nkīlo gwa mongo.”

¹⁷Ū ntemi ūbashokeja ī lishosho a ba Lehumu ūyo walī nsugi, nū Shimushai ū ng'wandīki, na a bichabo a bangī abo bikalaga Samalia nū mu sī ī jingī ī ja kū sī ya kū nkīlo gwa mongo. Ūhaya, Anukūlagi kūgīsha:

¹⁸Ī nyalūba īyo ng'watūtūmīlile kūnū yashomelejiwe hūna yūsong'wa kū būtongi bone hape hape.

¹⁹Nane namalile na kūfunya shilagīlo; nū būgīsīlīja wītīlwe, na ng'hana yūbonekana gīkī, kūfuma kale ū nzengo gwenūyo gūkakoyaga batemi, na gīkī gūkabizaga na būgomi na nzīla ja kūbagomisha a banhū.

²⁰Yabonekanile na gīkī ū mu shikū ī ja kū numa babīta kwilonga batemi ba nguzu ū mu Yelusalemu; bīsuga pyī ī sī īyo īlī kū nkīlo gwa mongo. A batemi benabo bafunījiagwa goodi, na sabo ya kūlang'hana sī, hamò nī sabo īyo īkafunyiagwa kūlwa kwīlūmba selekali.

²¹Alilūūlū, a bing'we funyagi shilagīlo a banhū benabo boye ū kūzenga; baleke ū kūgūzenga ū nzengo gwenūyo, kūshisha nene nafunye shilagīlo hangī.

²²Nīyo ilang'hanagi mutizūdondosha ū mu mhayo gwenūyū; nibūlī ng'wikale mulolile dūhū, bongeje kūkūla ū būbi nū būkenaagūji ūbo alīītīlwa ū ntemi?

²³Ī mihayo ya nyalūba ya ntemi Atashasta aho basomelwa dūhū a ba Lehumu nū Shimushai ū ng'wandīki, na a bichabo, haho na haho būj'ī Yelusalemu ū kū Bayudaya, būkabalemeja bo nguzu, būgooya ū nīmo.

²⁴Kwandīja henaho ū nīmo gwa nzenga ya numba ya ng'wa Mulungu īyo īlī mu Yelusalemu gwīma, kūshisha mu ng'waka gwa kabīlī gwa būsugi bo ntemi Dalio ūyo akandya kwīsuga ī Būajemi.