Read Sukuma Bible 2015 – Bibilia Ilagano Lya Kale 2015 Ezila 8 Bible Online

Ezila 8 - Sukuma Bible 2015 – Bibilia Ilagano Lya Kale 2015 bible

Ezila 8

¹A banhū aba h'abo baalī batongeeji ba kaya ja bakūlūgenji babo, na a babo bakandīkwa hamò nabo. Hū bene abo bakīnga hamò nane ī Babuloni, mu shikū ja būsugi bo ntemi Atashasta:

²Ū mu shibyalīlwe sha ng'wa Finehasi walīho Gelishomu; ū mu shibyalīlwe sha ng'wa Itamaali walīho Danyeli; ū mu shibyalīlwe sha ng'wa Daūdi walīho Hatushi

³wa mu kaya ya ng'wa Shekania. Ū mu shibyalīlwe sha ng'wa Paloshi; Zekalia na banhū igana na makūmi atanò abo baalī bandīkwa hamò nang'hwe.

⁴A ba shibyalīlwe sha ng'wa Pahati-moabu; Eliehona ng'witūnja o ng'wa Zelahiya, walī na banhū magana abīlī

⁵A ba shibyalīlwe sha ng'wa Zatu; Shekania o ng'wa Yahazieli, walī na banhū magana adatū

⁶A ba shibyalīlwe sha ng'wa Adini; Ebedi o ng'wa Yonasani, walī na banhū makūmi atanò.

⁷A ba shibyalīlwe sha ng'wa Elamu; Yeshaya o ng'wa Asalia, walī na banhū makūmi mpungatī.

⁸A ba shibyalīlwe sha ng'wa Shefatia; Zebadia o ng'wa Mikaeli, walī na banhū makūmi anaane.

⁹A ba shibyalīlwe sha ng'wa Yoabu; Obadia o ng'wa Yehieli, walī na banhū magana abīlī n'ikūmi n'inaane.

¹⁰A ba shibyalīlwe sha ng'wa Bani; Shelomitī o ng'wa Yosifia, walī na banhū igana na makūmi atandatū.

¹¹A ba shibyalīlwe sha ng'wa Bebai; Zekalia o ng'wa Bebai, walī na banhū makūmi abīlī na banaane.

¹²A ba shibyalīlwe sha ng'wa Azigadi; Yonasani o ng'wa Hakatani, walī na banhū igana n'ikūmi.

¹³A ba shibyalīlwe sha ng'wa Adonikamu; abo bakabiza ba kūmalīja, a mina gabo ba Elifeleti, Yeūli, na Shemaya hamò na banhū makūmi atandatū.

¹⁴A ba shibyalīlwe sha ng'wa Bigivai; Usai na Zakuli, hamò na banhū makūmi mpungatī.

¹⁵Hūna lūūlū a banhū benaba nakababilinga kū mongo ūyo gūkahūūmaga gūjile Ahava; a henaho twikala shikū idatū. Nahayūbalola chiza a banhū na a bagabīji, nūbona gīkī a Balawī baalī batīho hoi.

¹⁶Nūtūma bitanwe ba Eliezeli, Alieli, Shemaya, Elinasani, Yalibu, Elinasani, Nasani, Zekalia, na Meshulamu abo baalī batongeeji; bitanwa na ba Yoalibu na Elinasani, abo baalī banhū bitegeleja;

¹⁷hūna nūbatūma baje Kasifia kūlī Ido, ūyo walī ntongeeji wa kwenūko. Nūbalangīīla ī ya kūjūhaya ū kūlī Ido na a baana ba ng'wawe, a batūmami ba mu hekalu, abo bikalaga Kasifia; batūtūmīle banhū ba kūjūtūmama ū mu numba ya ng'wa Mulungu wise.

¹⁸Īkī ū nkono gwawiza ū go ng'wa Mulungu wise gwalī hamò nise, būtwenhela Selebia, munhū wa būdūla būtaale; ū wei walī wa kūfuma mu shibyalīlwe sha ng'wa Mahili ng'wana Lawī, ū ng'witūnja o ng'wa Isilaeli. Biza na bitūnja bakwe ū Selebia hamò na badūgū bakwe; a bose baalī banhū ikūmi na banaane.

¹⁹Na Hashabia wiza hamò na Yeshaya, wa kūfuma mu shibyalīlwe sha ng'wa Melali, hamò na baana ba ng'wawe na bitūnja babo; a bose banhū makūmi abīlī.

²⁰Benha na batūmami magana abīlī na makūmi abīlī ba mu hekalu; banhū ba nīmo ūyo gwandiwa na Daūdi hamò na bagunanhi bakwe kūlwa kūbagunanha a Balawī. A banhū benaba pye baalī bandīkilwe a mina gabo.

²¹Hūna aho tūtaalī a ha mongo gwa Ahava, nūlagīla gīkī tūfunge kūlwa kwidohya kū būtongi bo ng'wa Mulungu wise, na kūnomba atwīlūkīle lūgendo lwawiza, a bise benekīlī na a baana bise, nī shose īsho twalī nasho.

²²Nguno nakacha minala ū kūnomba ū ntemi kūtwinha bashilikale na badamhīji ba falasa, ba kūtūlang'hana tūtizūnyang'wa ū mu nzīla; nguno twalī twamala kūng'wīla ū ntemi, “Ū nkono gwawiza ū go ng'wa Mulungu wise gūlī hamò na būlī munhū ūyo akankoobaga wei, alīyo ū būpelanu bokwe būlī kū bose abo bakanekaga.”

²³Hūna lūūlū tūfunga, tūnomba ū Mulungu wise ū mhayo gwenūyū, ūtwigwa ū kūlomba kwise.

²⁴Hanuma ya henaho nūsolanya bagabīji ikūmi na babīlī abo baalī batongeeji; hamò na Shelebia, na Hashabia na badūgū babo ikūmi.

²⁵Nūbapimīla ī shakwinha sha feza nī zahabu, nī shiseme īsho shalī shafunyiwa na ntemi, hamò na bagunanhi bakwe na a batūmami bakwe a bangī, na a Baisilaeli abo baalī kwenūko, abo baalī bafunya sabo jabo kūlwa nguno ya numba ya ng'wa Mulungu wise.

²⁶Nūbapimīla, nūbinha tani makūmi abīlī n'ibīlī ja feza, shiseme igana līmò sha feza, sha būdito wa kūshika tani idatū na nusu; zahabu ja būdito bo tani idatū na nusu,

²⁷mabakuli makūmi abīlī ga zahabu, būdito wago gītī kilo inaane na nusu; na shiseme shibīlī sha shaba īguusilwe yūteemagīla no no no, yūbiza na mpango ntaale gītī zahabu.

²⁸Nūbawīla, “A bing'we mulī beela kūlwa ng'wa SEEBA, nī shiseme shilī sheela. Ī feza nī zahabu shilī shakwinha sha wiyaabī kūlī SEEBA Mulungu wa bakūlūgenji bing'we.

²⁹Shilang'hanagi chiza ī shikolo shenīshi, kūshisha ikanza lya kūshipima mu chumba sha mu numba ya ng'wa SEEBA ī Yelusalemu, kū būtongi wa bagabīji a batongeeji, na a Balawī, na a batongeeji ba kaya ja Baisilaeli.

³⁰Hūna a bagabīji benabo na a Balawī būjanukūla ī feza nī zahabu nī shiseme ī sheela īsho shikaping'wa ū būdito washo binhwa kūshitwala Yelusalemu kū numba ya ng'wa Mulungu wise.”

³¹Lūshikū lw'ikūmi na kabīlī ū mu ng'weji gwa kwandya twīnga a ha mongo gwa Ahava; tūbūka tūjile Yelusalemu. Ū nkono go ng'wa Mulungu wise gwalī hamò nise, ūtūlang'hana ū kū banishi na a biboneeji ū mu nzīla.

³²Hūna tūshika ī Yelusalemu, twifuula shikū idatū.

³³Ū mu lūshikū lwa kanè twingīla mu numba ya ng'wa Mulungu wise, tūkashipima ī shikolo, ī feza, zahabu, nī shiseme ī sheela, tūshitūūla mu makono ga ngabīji Melemosi ng'witūnja o ng'wa Ulia; baalī hamò nang'hwe ba Eliezeli, ng'witūnja o ng'wa Finehasi, na a Balawī baalīho, na Yozabadi ng'witūnja o ng'wa Yeshua, na Noadia ng'witūnja o ng'wa Binui.

³⁴Pyī ī shikolo shikandya shūbalwa tame, hūna shūping'wa; ū būdito washo wandīkwa ī likanza lyenīlo.

³⁵Ī likanza lyenīlo abo baalī bashoka kūfuma kū būding'wa būmfunīja ū Mulungu wa Isilaeli shitambò sha kūpemvwa, nzagamba ikūmi n'ibīlī kūlwa nguno ya Baisilaeli bose, ng'ondi makūmi kenda n'itandatū, na ng'ondi songi makūmi mpungatī na mpungatī. Na ngulyati ikūmi n'ibīlī shakwinha sha kweja shibi. Ī shose shenīshi shalī shitambò sha kūpemvwa kūlwa ng'wa SEEBA.

³⁶Nī shilagīlo sha ntemi būshishisha ū kū batūmami ba ntemi na a basugi a ba sī ja kū nkīlo gwa mongo; nabo ng'hana būbagunanha a banhū, nū nīmo gwa numba ya ng'wa Mulungu wise.