Read Sukuma Bible 2015 – Bibilia Ilagano Lya Kale 2015 Ezila 9 Bible Online

Ezila 9 - Sukuma Bible 2015 – Bibilia Ilagano Lya Kale 2015 bible

Ezila 9

¹Aho yabīta ī yenīyī, a batongeeji ba banhū biza kūnibona; būniwīla, “A Baisilaeli, na a bagabīji na Balawī bataalī ū kūlekana na a banhū ba mahanga nī mihayo yabo ī ya malofu, mihayo ya Bakanaani, Bahītī, Bapelizi, Bayebusi, Baamoni, Bamoabu, Bamisili, na Baamoli.

²Nguno babasola bamò ba bashīke babo būbīīta kūbiza bake babo, na bake ba bitūnja babo. Ū mu gīko ī lihanga lyeela ī haha līsanganīkīlile na banhū ba mu sī jenīji. Nīyo a basugi hū batongeeji ū mu mhayo gwabūbi gwenūyū.”

³Aho nagwigwa ū mhayo gwenūyū nūtandūla ī ng'hanjo yane nī shizwalo shane; nūyūjidutūūla ī nzwīlī nī ndezu jane, hama nigasha nadedebalile nakūkumyaga dūhū!

⁴Hūna abo baalī na logohano kū mihayo ya ng'wa Mulungu wa Isilaeli, bibilinga aho naalī, kūlwa nguno yago ū mhayo gwa malofu gwenūyū, ūyo baalī baagwīta a banhū aho bashoka kūfuma kū būsaamiwa. Nakigasha henaho nadedebalile nakūkumyaga dūhū, kūshisha ikanza lya kūfunya shitambò sha mhīndī.

⁵Na lūūlū aho lyashika ī likanza lya shitambò sha mhīndī, nūbūka aho naalī nigasha mu kwiluhya nene ng'wenekīlī, ī ng'hanjo yane nī shizwalo shane shitandagūkile. Nūtuja mazwi, nūng'wambīla a makono gane ū SEEBA Mulungu wane.

⁶Nūhaya, “Ee Mulungu wane, nalīcha minala, hangī nalī na soni no nūūlū ū kūbūūcha ū būshū bone ū kūlī bebe Mulungu wane. Nguno ū būhūbi wise būlī būtaale no kūtinda a maganiko gise,[5] nīyo ū būkenaagūji wise bolinhile kūshisha ng'wigūlū.

⁷Kūfuma mu shikū ja bakūlūgenji bise, kūshisha lelo tūlī mu kwihīga dūhū pyī ī shikū. Hama kūlwa nguno ya būkenaagūji wise, a bise na a batemi bise, na bagabīji bise, nose tūkalekanījiwa tūyūbūlagwa sagala, na bangī kūsaamiwa kūtwalwa nding'wa, na kūkenaagūjiwa būlī shikolo, hamò na kūtūūlwa mu mbika ya magooke mabi gīt'ūmo tūlī ī lelo īyī!

⁸Kwike ī haha, ū SEEBA Mulungu wise kūlwa nguno ya shigongo shakwe, watūlekeelelile būshiigo, hama ūtwinha na wikalo ū ng'wipandī lyakwe ī lyeela. Na lūūlū ū mu gīko ū Mulungu wise alīginha isana a miso gise, na gīkī twifuule nūūlū hado kūfuma ū mu būsese wise.

⁹Nūūlū īkī tūlī basese, nahene ū SEEBA wise atatūlekanīgije twikale ū mu būsese wise. Watoolekegije būtogwa bokwe, ūtwīta kūchīlwa shigongo ū mu miso ga batemi ba Būajemi, ūtwinha būpanga būpya tūdūle kwīzenga hangī ī numba ya ng'wa Mulungu wise, na kwībeegeleja ū būkenaagūke wayo, ūtwinha na ndugu ya kūtūlang'hana ū mu Būyudaya nū mu Yelusalemu.

¹⁰Alīyo ī haha lūūlū SEEBA, tūhaye mhayo kī a ha numa ya yenīyī? Nguno a malange gako twagaponije,

¹¹ayo wagafunya mu nzīla ya batūmami bako a bahangi, ūlīhaya gīkī, ‘Ī sī īyo mulīja kwīdima ībize ying'we, yasosohajiwa na būsoso wa banhū bayo. Pyī ūmo īgelelile bīyokaja būsoso wabo, kūlwa nguno ya mihayo yabo ya malofu.

¹²Hūna lūūlū, yaya ū kūbazunīlīja a bashīke bing'we ū kūtoolwa na a bitūnja babo, nūūlū mutizūbasolela a bitūnja bing'we a bashīke babo. Yaya gete ū kūbalombela mhola nūūlū mbango, hū mukūbiza na nguzu, na kūdūla kūshilya ī shizeeze sha mu sī yenīyo, na kūbalekela a baana bing'we ībize wingīji wabo wa welelo na welelo.

¹³Nīyo nī yīyo yatūgwīla kūlwa nhūngwa jise ja malofu, na kūlwa būkenaagūji wise būtaale, Mulungu wise tūmanile gete gīkī ūtatwinhile nsango gwa kūlenganīla nū būhūbi wise; hama nīyo ūtūlekeelela na būshiigo gīt'ūmo īlī ī haha.

¹⁴Numho tūshokeele hangī ū kūshikenaagūla ī shilagīlo shako mu nzīla ya kwitooleela na banhū abo bakīītaga mihayo ya malofu gīko? Ūtūtūpelanīla no lūūlū, nose ūtūkenaagūle gete būgaye na būshiigo atizūbonekana na wa mbīyū?

¹⁵Ee SEEBA Mulungu wa Isilaeli, ū bebe ūlī ntūngīlīja! Ī lelo īyī tūlīho tūlekilwe gītī būshiigo. Ūlītūbona tūlīho aha mu būsobya wise, alīyo atīho nūūlū ūmò wise ūyo igeleelilwe kwīmīīla kū būtongi wako.’”