Read Sukuma Bible 2015 – Bibilia Ilagano Lya Kale 2015 Nehemia 1 Bible Online

Nehemia 1 - Sukuma Bible 2015 – Bibilia Ilagano Lya Kale 2015 bible

Nehemia 1

¹Īyī yene mihayo ya ng'wa Nehemia ng'witūnja o ng'wa Hakalia: Mu ng'weji gwa Kisileu, ng'waka gwa makūmi abīlī, naalī mu nzengo gwa Susa,

²Ūmò wa baana bang'wise, lina lyakwe Hanaani, wiza na banhū balebe kūfuma kū sī ya Būyudaya. Hūna nūbabūūja ūmo balīīla a Bayudaya abo baalī bapūlūgūka ū kūsaamiwa, nī mihayo ya nzengo gwa Yelusalemu.

³Būniwīla, “Abo bapūlūgūkile ū kūsaamiwa bikala ū mu sī yenīyo, balī mu makoye mataale, hangī nīyo mhayo gwa soni no; nī ndugu ya nzengo gwa Yelusalemu yakambagūlilwe, nī mibita yaho yūpemvwa moto!”

⁴Aho nīyigwa ī mihayo yenīyī nifudīka hasī, nūtandūka kūlīla; nūfunga shikū ningī nakūlījiagwa būpīna, kūnū nakūnombaga ū Mulungu wa ng'wigūlū.

⁵Nūhaya gīkī, “Ee SEEBA, Mulungu wa ng'wigūlū, ūyo ūlī Mulungu ntaale na wa kogohwa. Bebe ūyo ūtalyībaga ī lilagane lyako lya būtogwa īlo walagana na banhū abo bakūtogilwe na bagadimile a malange gako,

⁶nalīlomba ūtege ū gūtū gwako, na a miso gako ūgaloleche; wigwe ū kūlomba kwa ntūmami wako, ūmo akūkūlombelaga līīmi na būjikū, kūlwa nguno ya batūmami bako, a Baisilaeli. Nalītambūūla ī shibi shise a bise Baisilaeli, īsho twīta tūkūhūba bebe. Ū nene hamò nī kaya ya ng'wa baba tūlī bahūbi ū kūlī bebe.

⁷Īyo twīta ū kū būtongi wako īlī ya malofu no; tūtagadimile a malange gako na a kahelele, pyī nī shilagīlo īsho wang'winha ntūmami wako Musa.

⁸Gwizūkagwe ū mhayo ūyo ūkang'wīla ntūmami wako Musa ūlīhaya gīkī, ‘Ūlū ng'wīnga ū mu wishigwa, nakūmubbalaasanya mu mahanga,

⁹alīyo ūlū ng'ūnishokela, hūna ng'ūbiza bigwi ū kū malange gane, ū mu gīko a banhū bing'we abo basaamījiwa kū mahanga, nūūlū bakabiza balī kūle na kinehe, nakūbakuminga nabīnje koi, nabenhe ū kwipandī īlo naalīsola kūbiza wikalo wa lina lyane.’

¹⁰Alilūūlū, a benaba balī batūmami bako, na banhū bako gete; abo ūkabakomoola mu nguzu jako na būdūla wako būtaale, na nkono gwako gwa būdūla.

¹¹Ee SEEBA, nalīlomba ūtege ū gūtū gwako ū kūlī ntūmami wako ūyū, nū kūlomba kwa batūmami bako abo bayejiwe na mhayo gwa kūlīkūja ī lina lyako. Ī lelo yenīyī ng'winhage būpyeni ū ntūmami wako, ūng'wīlūkīle ja kwanukūlwa ū kū būtongi wa munhū ng'wenūyū.” Naalī na nīmo gwa kūntengela ntemi sha kūng'wa shakwe.