Read Sukuma Bible 2015 – Bibilia Ilagano Lya Kale 2015 Nehemia 2 Bible Online

Nehemia 2 - Sukuma Bible 2015 – Bibilia Ilagano Lya Kale 2015 bible

Nehemia 2

¹Ū mu ng'weji gwa Nisani, ng'waka gwa makūmi abīlī gwa būsugi wa ntemi Atashasta, aho yenhwa divai nīsola nūkantengela ū ntemi. Naalī nataalī kūbonekana nalī na būpīna ū kū būtongi bokwe nūūlū kamò.

²Hūna lūūlū ū ntemi ūnibūūja, “Bebe ni kinehe ūlībonekana ūzoobaalile gīko alīyo ūtī nsaatu? Ū gwenūyū gūtūdūla kūbiza mhayo gūngī, ūlū ītī būpīna bo mu ng'holò!” Nakogoha no.

³Hūna nūng'wīla ū ntemi, “Kūlaga ūhangame wanyama! Nakūlekela kī ū kūpīnīhala alīyo ū nzengo go ng'wise ūko balaalile bataale bane gūlī mamisaka gike, nī mibita yago yapemvwa moto!”

⁴Ū ntemi ūnibūūja, “Ī gīsī lūūlū ūlū kwīta mhayo kī?” Nane nūnomba ū Mulungu wa ng'wigūlū,

⁵hūna nūnshokeja ū ntemi, “Ūlū gūlībeelela ū mu miso ga ntemi, hama ū ntūmami wako ūlū wīlūkīlagwa wiza ū kū būtongi wako, nitūmage naje ī Būyudaya, ū kū nzengo gwa mashigo ga bakūlūgenji bane; nakagūzenge.”

⁶Ī likanza lyenīlo ū ngole nang'hwe walī igashije hamò nū ntemi; hūna ū ntemi ūnibūūja, “Ū lūgendo lwako lūkūbiza lwa shikū jinga, ūkūshoka nanalī?” Ū ntemi walī atogilwe ū kūnizunīlīja ū kūja, na lūūlū nūng'winha ī likanza.

⁷Nūng'wīla na, “Ūlū alīzunya ū ntemi, nalīlomba ninhwe nyalūba ja kūjana ū kū basugi ba sī ījo jilī kū nkīlo gwa mongo, natizūpandīka makoye ūlū nalībīta, kūshisha nashike ī Būyudaya.

⁸Napandīke na nyalūba ya kūntwalīla ū Asafu, ū nang'hani w'ipoolu lya ntemi, anizunīlīje kūpandīka mitī kūlwa migamba, ya kūtūūla ha mibita ī ya ha ndugu īyo īpīndīlīgije hekalu, na kūlwa ndugu ya nzengo, na kūbeeja numba īyo nalikale ū nene.” Ū ntemi ūnizunīlīja īyo nakīlomba, nguno ū nkono gwawiza ū go ng'wa Mulungu wane gwalī hamò nane.

⁹Hūna nūja, aho nashika ū kū basugi ba sī ja kū nkīlo gwa mongo nūbinha ī nyalūba ja kūfuma ū kūlī ntemi. Nīyo ū ntemi walī waninha na bashilikale, na badamhīji ba falasa.

¹⁰Alīyo ū Sanibalati, ū muna Holoni, nū Tobia ū muna Amoni ūyo walī ntūmami, aho bigwa gīko, bakasaaya no ū kūbona gīkī wizile munhū kūbeeja nīmo gwa kūbagunanha a Baisilaeli.

¹¹Nanoga nūshikīīla ī Yelusalemu, aho nikala ikanza lya shikū idatū,

¹²nūbūka mu makanza ga būjikū, na banhū bagehu naalī nabo. Kwike naalī nataalī kūng'wīla munhū ose ose īsho walī washitūūla ū Mulungu wane ū mu ng'holò yane kūlwa kwīyītīla ī Yelusalemu. Nīyo naalī natī na ndamhī ja kwigela, ūlū ītī īyo naalī nadamhīlile dūhū ū nene.

¹³Aho nabūka ū mu būjikū wenūbo, nūfuma hanze kūbītīla ha mita gwa kū longa, gwa kūbīta ūjile kū lwinzī lwa nyamhawa, na kū mita gwa mapalala. Najilīngūlīlaga ī ndugu ja nzengo gwa Yelusalemu ūmo jalī jakambagūlīlwa, nī mibita yaho īyo yalī yapemvwa moto.

¹⁴Ū kūfuma a henaho nūjīlīīla kū mita gwa kū lūzwīlo, na kwilambo lya ntemi; kwike gūgaya ū ng'wanya gwa kūbīta ī ndamhī yane īyo naalī nadamhīlile.

¹⁵Na lūūlū nūsīngīja nalūlondeelile ū longa ītaalī būjikū gīko, kūnū nakwīlīngūlīlaga ī ndugu; nanoga nūshokanya niza ningīlīla kū mita gwa kū longa.

¹⁶A basugi baalī batamanile ūko naalī naja, nūūlū īyo nīyītaga, nguno kūshisha ikanza lyenīlo naalī nataalī ū kūbawīla a Bayudaya nūūlū a bagabīji na a batongeeji, nūūlū a basugi; pye a bose nūūlū abo yalī gīkī bakūgwīta ū nīmo.

¹⁷Hūna nūbawīla, “Bing'we angū mulībona gīkī tūlī mu makoye ahene; ī Yelusalemu īlī mamisaka gike, nī mibita yaho yapemvwa moto, twīzengagi ī ndugu ya Yelusalemu, twīnge ū mu būdalahwa.”

¹⁸Hūna nūbinha ī ng'hūlū ja nkono gwawiza ū go ng'wa Mulungu wane ūyo gwalī hamò nane, nī mihayo īyo walī waniwīla ū ntemi. Būhaya, “Twandyagi ū kūzenga.” Na ng'hana biyinha nguzu, bandya ū kūgwīta ū nīmo gwawiza gwenūyo.

¹⁹Alīyo ū Sanibalati, ū muna Holoni, nū Tobia, ū muna Amoni ūyo walī ntūmami, hamò na Geshemu, ū Ng'walabu, aho bigwa gīko bandya kwiyineenelegeja bakūtūsekaga mu būdalahi. Būyūhaya, “Mulīīta nīmo kī ū gwenūyū? Mulīngomela ū ntemi a bing'we?”

²⁰Nane nūbashokeja nūbawīla, “Ū Mulungu wa ng'wigūlū akūtwinha būtindi, a bise batūmami bakwe tūkwandya ū kūzenga; alīyo a bing'we mutī na ngabo gete, nūūlū shikolo shing'we ndūhū, shitīho nūūlū shose shose sha kūng'wīta ng'wizūkīlwe ū mu Yelusalemu.”