Read Sukuma Bible 2015 – Bibilia Ilagano Lya Kale 2015 Esita 1 Bible Online

Esita 1 - Sukuma Bible 2015 – Bibilia Ilagano Lya Kale 2015 bible

Esita 1

¹Ī mihayo īyī īkilonga mu shikū ja ntemi Ahasuelo, ū Ahasuelo ūyo walī asugile mabbaala magalī ga sī[1] igana na makūmi abīlī na mpungatī; kūfuma kū sī ya Bahindi, kūshisha Esiopia.

²Ū mu shikū jenījo ū ntemi Ahasuelo aho alī nsugi, ī lisumbī lyakwe lya buūtemi lyalī mu nzengo gwa Susa.

³Aho wingīla mu ng'waka gwa kadatū go būtemi bokwe, ūbabeegeja shigukulu a bana ng'oma na a batūmami bakwe. Baalīho na a bataale ba mabità ga bashilikale ga Būajemi na Būmedi, na a bana ng'oma ba mu sī pyī ījo jalī ha sīlīlī yakwe, na a basugi bajo.

⁴Akamala shikū igana na makūmi anaane akoolechaga ūmo walī ū būsabi wa mu būtemi wakwe, na a magaka g'ikūjo lyakwe.

⁵Jahayūshila ī shikū jenījo, ū ntemi ūbabeegeja shigukulu sha shikū mpungatī pye a banhū, bataale na bado, abo baalī mu nzengo gwa Susa; ī shigukulu shikabeegejiwa mu gwalugwa ya ha ng'wa ntemi.

⁶Ī gwalugwa yūtūūlīlwa būlenji bo shitambaala shape na sha būlulu, shūlūnganījiwa na migwasho ya kitaani yape na ya nzulunge, hūna yūgwashiwa kū matendele ga feza, na ng'hīngī ja mawe gape. Na masumbī ga zahabu na ga feza gaalī gatūūlilwe h'ipandī lībeejiwe chiza na būlenji bo mawe ga langi ningī ndabagīzu, na gaza, na ga būlulu, na gapi; na mawe gangī gangī ga mpango ntaale.

⁷A banhū batūūlīlagwa ī divai mu shikombe sha zahabu, shisoga, alīyo būlī shene shalī sha mbika yasho iyene dūhū. Hama ī divai ya h'ikūlū yalī ningī no, kūlenganīla nū wiza ng'holò bo ntemi.

⁸Ū ntemi walī walagīja gīkī būlī munhū adūgije kūng'wa gīt'ūmo amanīlile wei ng'wenekīlī; nguno ū ntemi walī wabawīla a batoneeji ba divai kūng'winha būlī munhū ī mbika īyo alatogwe.

⁹Ū ngole walī Vashiti, nang'hwe ūbabeegeja shigukulu a bakīma ū mu numba ya h'ikūlū lya ntemi Ahasuelo.

¹⁰Baalīho basoloolwa mpungatī bantūmamīlaga ū ntemi Ahasuelo, ba Mehumani, Bizita, Halibona, Bigisa, Abagisa, Zetaali, na Kalikasi; mu lūshikū lwa mpungatī aho gwazalabana ū moyo gwakwe kūlwa divai, ūbalagīja

¹¹kūnjīla ū ngole Vashiti, ize azwalile ī ngikili yakwe y'ikūjo lya nyagole, ashike aho walī ū ntemi, iyooleche ū kū banhū na a bana ng'oma abo baalīho, bamone ūmo walī ū būsoga; nguno walī nsoga no ū kūlola.

¹²Alīyo abo bakatūng'wa aho bajishisha ī mhola ja ntemi ū kūlī ngole Vashiti, ūlema ū kwiza; a heneho ū ntemi akapelana no, ūpembeka.

¹³Hūna lūūlū ū ntemi ūhooya nabo a banhū ba masala, abo baalī bagadeebile a makanza; nguno walī na shīmīle sha kūganikīlwa na bamani ba mihayo ya shilagīlo na ya kalamulīle.

¹⁴A banhū abo baashikaga kū būtongi bo ntemi[2] baalī, Kalishena, Shesali, Adimata, Talishishi, Melesi, Melisena, Memukani; banhū mpungatī, bana ng'oma ba Būajemi na Būmedi. A benabo hū baalī badūgije kūhooya nū ntemi, nīyo ū mu būsugi wenūbo baalī na masumbī g'ikūjo itaale.

¹⁵Hūna ū ntemi ūbabūūja, “Ī gīsī ng'hana, ū kūlondeela kajīle a ka shilagīlo, ū ngole Vashiti ūlū kwītīlwa mhayo kī? Nguno mulībona gīkī walema ū kwīta īyo wīhaya ntemi Ahasuelo, īyo bantwalīla a basoloolwa!”

¹⁶Ū Memukani ūnshokeja ū ntemi, na bana ng'oma badegelekile; ūhaya, “Ū ngole Vashiti wahūbaga no, nīyo ītī kūlī ntemi dūhū, alīyo nū kū bana ng'oma, pyī nū kū banhū ba mu sī jose ījo jilī mu būsugi bo ntemi Ahasuelo.

¹⁷Nguno ū mhayo ūyo wagwītaga ū ngole Vashiti gwenūyū, gūkūmanīka ū kū bakīma pye a bose, hūna lūūlū bakūbadalaha no a bagoshi babo; nguno bakūyūbashokeja balīhaya gīkī, ‘Ū ntemi Ahasuelo walī watūmīgije gīkī ū ngole Vashiti ize ū kūlī wei, ūlema.’

¹⁸Pye a bakīma ba mu Būajemi nī Būmedi abo baligwe īyo wītaga ū ngole ī lelo, bakūyūbawīla gīko na a bana ng'oma ba ntemi, na lūūlū līkūbiza ho ibengwe itaale no, na yombo ītī ya kūkalīka.

¹⁹Alilūūlū baba wanyama, ūlū gūlīnyeja ū ntemi, ī likūlū līfunye mhayo, nīyo gwandīkwe mu shilagīlo sha Baajemi na Bamedi gūtizūgalūka gete; gīkī, ū ngole Vashiti atizegeela hangī nūūlū hado ū kū būtongi bo ntemi Ahasuelo, nī likūjo lyakwe ī lya nyagole inhwe ūngī, ūyo alī ntūngīlīja kūtinda ū wei.

²⁰Hūna lūūlū ū mu gīko, ī shilagīlo īsho alashifunye ū ntemi ūlū shūsambaajiwa hose hose pyī ū mu būtemi bokwe ū būtaale wenūbū, pye a bakīma bakūbakūja a bagoshi babo, ni babizage bataale nūūlū bado.”

²¹Ū mhayo gwenūyū gūnyeja ū ntemi na a bana ng'oma bakwe, hūna lūūlū ū ntemi wīta ng'hana gīt'ūmo akanganikīla ū Memukani.

²²Ūsambaaja nyalūba pye a hose, būlī sī yandīkīlwa mu nuguta jayo, na būlī banhū mu lūlīmi lwabo, gūhayiwa hape mu ndīmi ja banhū bose, gīkī būlī ngosha abize nsugi wa kaya yakwe.