Read Sukuma Bible 2015 – Bibilia Ilagano Lya Kale 2015 Esita 5 Bible Online

Esita 5 - Sukuma Bible 2015 – Bibilia Ilagano Lya Kale 2015 bible

Esita 5

¹Aho lwashika ū lūshikū lwa kadatū, ū Esita ūzwalīla ī shizwalo shakwe ī sh'ikūjo lya nyagole, hūna ūkīmīīla a ha būtongi bo nyango ū gwa kwingīlīla ng'wibīndo lya mu gatī lya numba y'ikūlū, kū būtongi bo chumba sha ntemi. Ū ntemi nang'hwe ūsangwa igashije h'isumbī lyakwe lya būtemi, alolelile ū kū nyango.

²Aho wamona ū ngole Esita wīmīīlaga ū ng'wibīndo, ūyega ūng'olota na nang'ha gwa zahabu ūyo walī nago mu nkono gwakwe. A henaho ū Esita wegeela ūshika ūgūkuumya ū nang'ha ū kū neno.

³Ū ntemi ūmūja, “Ngole Esita, ūlī na mhayo kī? Ūlīlomba shikolo kī? Ūkūpandīka dūhū nūūlū īkabiza nusu ya būtemi!”

⁴Esita ūshosha, “Ūlū gūlīnyeja ū wanyama nalīlomba ize ī lelo, nū Hamani, kū shigukulu īsho nameegejaga.”

⁵Haho na haho ū ntemi ūlagīja alīhaya, “Ng'wīlagi ko ize wangū ū Hamani, twīte īyo yahayiwa na Esita.” Na ng'hana ū ntemi nū Hamani būja ū kū shigukulu īsho walī washibeeja ū Esita.

⁶Aho balīng'wa divai, ū ntemi ūmūja hangī ū Esita, “Ī ng'hūmbū jako jilī ha mhayo kī? Ūkwinhwa dūhū. Ūlīlomba mhayo kī? Nūūlū īkabiza nusu ya būtemi ūkūshikīlīgījiwa!”

⁷Ū Esita ūshosha ūhaya, “Ī ng'hūmbū jane nū kūlomba kwane kūlī gīkī,

⁸Ūlū nanukūlagwa ū mu miso ga ntemi, na gūbize gūlīnyeja ū wanyama ū kūnīītīla gīt'ūmo jilī ī ng'hūmbū jane nū kūlomba kwane, nalīlomba nī ntondo ize hangī ū ntemi nū Hamani, kū shigukulu īsho nalababeegeje. A henaho hū nakwīta ūmo alīnilombela ū wanyama.”

⁹Ū lūshikū lwenūlo ū Hamani aho alīfuma ī hanze gwalī gwayega no ū moyo gwakwe, alīyo aho wamona ū Modekai a ha mita gwa ha ng'wa ntemi, ūbona waleka ū kūbūka, nūūlū atadetemile ū kū būtongi bokwe, akampelanīla no ū Modekai.

¹⁰Kwike a hene akihaamalaja, ūja kū ng'wakwe. Aho washika witana banwani biye, nū Zeelà ū nke wakwe.

¹¹Hūna ū Hamani wandya kūbasomboolela, akwikumīlījaga kūlwa būsabi bokwe, nū wingī wa bitūnja bakwe, nī gīkī ū ntemi wang'winhile ikūjo, ūnsunang'hīja h'isumbī lyawiza kūbaheeba pye a bana ng'oma biye, na a batūmami a bangī.

¹²Ū Hamani ongeja kūhaya, “Nīyo ītagelelile henaho dūhū, nū ngole Esita atitanile munhū ūngī wa kūja nū ntemi ū kūlya ī shigukulu īsho walī washibeejaga, ūlū ītī nene iyene. Hama wanegelejaga hangī, nī ntondo nalīja nū ntemi.

¹³Alīyo ūlū nataalī nakūmonaga ū Nyudaya ng'wenūyo, ū Modekai, igashije a ha mita gwa ha ng'wa ntemi, pyī ī yenīyī ītī na solobo nūūlū hado ū kūlī nene!”

¹⁴Ū nke wakwe ū Zeelà na a banwani biye būng'wīla, “Lagījaga gūsīmbīlwe ngamba gwa būlīhu wa fuuti makūmi mpungatī n'itanò kūja ng'wigūlya; hūna ī ntondo ī dilū ūng'wīle ū ntemi anungelejiwe henaho ū Modekai, gūkwika ū moyo gwako. Hūna lūūlū ūlū ūja nū ntemi ū kū shigukulu, ūkūja ūkashilūmbe.” Ū mhayo gwenūyū gūbeela ū kūlī Hamani, ūlagīja ng'hana lyūbeejiwa ī līntī.