Read Sukuma Bible 2015 – Bibilia Ilagano Lya Kale 2015 Esita 6 Bible Online

Esita 6 - Sukuma Bible 2015 – Bibilia Ilagano Lya Kale 2015 bible

Esita 6

¹Ū būjikū wa lūshikū lwenūlo ū ntemi yūtala ī tūlo, na lūūlū ūlagīja enhelwe ī shitabo sha mihayo ya shikū ja kū numa, ūsomelwa ī ya kaīle ka būsugi bokwe.

²Gūbonwa mo mhayo go ng'wa Modekai gwandīkilwe, gīkī akakulūla mbisīla ya ba Bigisana na Teleshi, abo baalī batūmami ba ntemi, balang'hani ba ha nyango; ūmo baalī basīīganīla kūhaya kūmūlaga ū ntemi Ahasuelo.

³Hūna ū ntemi ūbūūja, “Ū Modekai ng'wenūyū akīītīlwa mhayo kī ū gwikūjo na koolecha kūnūmba?” A batūmami bakwe būnshokeja balīhaya, “Ataalī kwītīlwa mhayo gose gose.”

⁴A henaho ū ntemi ūbūūja, “Alīho nani ū ng'wibīndo?” Ū Hamani ūsangwa hū oshika dūhū ū ng'wibīndo lya hanze, ī lya numba y'ikūlū. Wizaga kūhooya nū ntemi mhayo gwa kūnungeleja Modekai ha ngamba ūyo walī wagūsīmbīla.

⁵Hūna ū ntūmami wa ntemi ūhaya, “Alīho Hamani wīmīīlaga ng'wibīndo.” Ū ntemi ūhaya, “Ng'wīlage ize ūmu.”

⁶Aho wingīla ū Hamani, ū ntemi ūmūja, “Ī gīsī ng'hana, ū munhū ūyo ntemi atogilwe kūnkūja, ūlībona ūlū kwītīlwa mhayo kī?” Ū Hamani wiganika aliwīla, “Alīho nani ūngī ūyo adūgije kūkūjiwa na ntemi ūūkanikīla na nene?”

⁷Na lūūlū ū Hamani ūnshokeja ū ntemi alīhaya, “Ū munhū ūyo ntemi atogilwe kūnkūja,

⁸ni enhelagwe ng'hanjo y'ikūjo lya nyatemi, īyo wabīta kwīzwala ū ntemi, nī falasa īyo wīdamhīla ū ntemi, hama ītūūlīlwe na ngikili ya nyatemi a ha ntwe gwayo.

⁹Hūna ī ng'hanjo yenīyo nī falasa inhwe ū ngong'ho gong'ho ūyo asanyiwe no no no na ntemi. Hama ū munhū ūyo ntemi atogilwe kūnkūja banzwalīkīje ī ng'hanjo ī y'ikūjo, hūna bandamhīje a ha falasa yenīyo; baje bakwītongeelaga ū mu mabbalabbla ga mu nzengo, kūnū bakūhamukaga ū kū būtongi bokwe būhaya, ‘Ū munhū ūyo ntemi atogilwe kūnkūja akwītīlwa gīkī!’”

¹⁰Hūna ū ntemi ūng'wīla, “Gīko odala jigi; jaga wangū ūkasole ī ng'hanjo nī falasa. Ū Modekai ū Nyudaya, ūyo igashije ha mita gwa ha ng'wa ntemi, ūng'wītīle gīt'ūmo wahayīla, gūtizūleba ho mhayo nūūlū gūmò ū mu yose īyo wīhaya yenīyī.”

¹¹Na ng'hana ū Hamani ūsola ī ng'hanjo nī falasa, ūnzwalīkīja ū Modekai, hūna ūntongeela ū mu mabbalabbala ga mu nzengo adamhīlile ī falasa; kūnū akūhamukaga ū kū būtongi bokwe alīhaya, “Ū munhū ūyo ntemi atogilwe kūnkūja akwītīlwa gīkī!”

¹²Hanuma ya henaho ū Modekai ūshoka hangī a ha mita gwa ha ng'wa ntemi. Ū Hamani ū ng'wene wihuuta kūshoka kū ng'wakwe, wagookaga kīngī nasho, wiyinamīlaga ūūkikundīkīja nū ntwe.

¹³Aho washika ūng'wīla ū nke wakwe ū Zeledi, na a banwani biye; wīhaya pyī īyo īkang'wilongela yenīyo. Hūna a baganikīji bakwe nū nke wakwe būng'wīla, “Ū Modekai ng'wenūyū, ūyo wandyaga kūgwa kū būtongi bokwe ūlū Nyudaya, ūtūdūla ū kwilwisha nang'hwe ū bebe, ūkūlabūka dūhū ū kū būtongi bokwe!”

¹⁴Aho bataalī būyomba nang'hwe, kwimanīla biza basoloolwa ba ha ng'wa ntemi kūnsola ū Hamani, būng'wihuutya kūja ū kū shigukulu īsho Esita walī washibeeja.