Read Sukuma Bible 2015 – Bibilia Ilagano Lya Kale 2015 Esita 7 Bible Online

Esita 7 - Sukuma Bible 2015 – Bibilia Ilagano Lya Kale 2015 bible

Esita 7

¹Hūna lūūlū ū ntemi nū Hamani būja ū kūlya ī shigukulu nū ngole Esita.

²Aho balīng'wa divai nū mu lūshikū ū lwa kabīlī lwenūlo, ū ntemi ūmūja ū Esita, “Ngole Esita, ī ng'hūmbū jako jilī ha mhayo kī? Ūkwinhwa dūhū. Ūlīlomba mhayo kī? Nūūlū īkabiza nusu ya būtemi ūkūshikīlīgījiwa!”

³Ū ngole Esita ūshosha alīhaya, “Ūlū nanukūlagwa ū mu miso ga ntemi, na gūbize gūlīnyeja ū wanyama, nalikūmbīlīja ninhwe ū būpanga bone; na a banhū bane nalīlomba balekwe bikale mhola.

⁴Nguno ū nene na a banhū bane twajinjiwe gīkī tūkenaagūlwe, tūbūlagwe, tūmalwe gete. Ūlū ni twajinjiwe kūbiza basese dūhū, bagosha na bakīma, ni nahuumūla; nguno ū mpango ūyo gwafunyiwe nū ng'wanishi wise, gūtūdūla ū kūlenganījiwa nū būjimīīja ūbo būlangwīle ū ntemi!”

⁵Ū ntemi Ahasuelo ūmūja ū ngole Esita, “Nani ū ng'wenūyo? Nīyo ni alī halī ū munhū ūyo wagimile kwīta mhayo gūlī gīko?”

⁶Ū Esita ūshosha ūhaya, “Ū ng'wanishi na ng'wiboneeji wise ūūyū aha, ū Hamani ng'wenūyū wabūbi no!” A henaho ū Hamani ogoha kīngī nasho, wandya kūdetema ū kū būtongi bo ntemi nū ngole.

⁷Ū ntemi ūpelana no, ūbūka ūfuma hanze, ūja mu gwalugwa ya h'ikūlū, wīleka ī divai yakwe. Ū Hamani ūdeeba gīkī ū ntemi alīng'wiganikīla gwabūbi, ūsaaga ū mu numba alīng'wikūmbīlīja ū ngole Esita atizīngījiwa ū būpanga bokwe.

⁸Ū ntemi aho alingīla hangī ū mu chumba sha shilīwa, ū Hamani nang'hwe ūsangwa alīshikīīla a h'isumbī īlo walī igashije ū Esita. Ū ntemi ūhaya, “Chū alīhaya kūmpondya nū ngole ū mu kaya ūmu, alīyo nū nene nalīho!” Ū ntemi aho wagūkalīcha dūhū ū mhayo gwenūyo, haho na haho būnkundīkīja ū Hamani ū kū būshū.

⁹Hūna Halibona, ūmò wa basoloolwa abo bantūmamīlaga ū ntemi; ūhaya, “Nīyo līlīho na līntī a ha ng'wakwe ū Hamani, līngamba lya būlīhu bo fuuti makūmi mpungatī n'itanò kūja ng'wigūlya; walīsīmbīlaga kūlwa kūnungeleja hoi Modekai, ū munhū ūyo akayomba mhayo ūmpīja ū ntemi.” Ū ntemi ūhaya, “Nungelejagi hoi ū wei.”

¹⁰Na ng'hana būkanungeleja ū Hamani a ha līntī īlo walī walīsīmbīla kūlwa ng'wa Modekai. Hūna būchuuleela ū būpelanu bo ntemi.