Read Sukuma Bible 2015 – Bibilia Ilagano Lya Kale 2015 Esita 8 Bible Online

Esita 8 - Sukuma Bible 2015 – Bibilia Ilagano Lya Kale 2015 bible

Esita 8

¹Ū mu lūshikū lwenūlo, ū ntemi Ahasuelo ūng'winha Esita ī numba īyo yalī ya ng'wa Hamani, ū ng'wanisha o Bayudaya. Nū Modekai wegeela ū kū būtongi bo ntemi, nguno ū Esita akasangwa wamalile koolecha walī nani ū kūlī we.

²Ū ntemi wīyīnja ī sīlī yakwe ī y'imeng'helo ū kū lwala lwakwe, nguno akantaaja ū Hamani; ūng'winha Modekai. Hūna ū Esita ūntūūla ū Modekai ū mu numba īyo yalī ya ng'wa Hamani.

³Ū Esita ūgwa hangī mu magūlū ga ntemi, kūnū alīlīla shisoji alīnomba ashigalūche ī shilagīlo ī shabūbi īsho shalī shatūūlwa na Hamani ū muna Agagi, īsho walī washitūūla kūlwa kūbakenaagūla a Bayudaya.

⁴Hūna ū ntemi ūng'olota nū nang'ha gwa zahabu, ū Esita ūbūka wīmīīla ū kū būtongi bo ntemi.

⁵Ūhaya, “Ūlū gūlīnyeja ū wanyama, na nabize nanukūlagwa ū mu miso gakwe, nū kūlī we gūbeelelile īje gīko, nū nene abize aniyegelile, nalīlomba shandīkwe shilagīlo sha kūjigalūcha ī nyalūba ījo jalī jandīkilwe na Hamani ng'witūnja o ng'wa Hamedasa, ū muna Agagi; ījo walī wajandīkile kūlwa kūbamala a Bayudaya mu sī jose ījo jilī ha sīlīlī ya būsugi bo ntemi.

⁶Nguno nakūdūla ginehe ū kwiyūmīlīja kūwiloleela ū būbi ūbo būliza kūbakenaagūla a banhū bane? Nūūlū nadūgije kwiyūmīlīja ginehe ū kūbabona a banhū ba mu kaya ya ng'wise balīyagajiwa?”

⁷Hūna ū ntemi Ahasuelo ūng'wīla ū ngole Esita nū Modekai ū Nyudaya, “Angū mulībona gīkī ī numba īyo yalī ya ng'wa Hamani naang'winhile Esita, ū wei ūningelejiwa ha līntī nguno walī na ng'hūmbū ja kūbayagaja a Bayudaya.

⁸Alilūūlū, andīkagi nyalūba yīngī mufunye shilagīlo mu lina lya ntemi kūlwa Bayudaya, muhaye ūmo mulībonela bing'we, ng'wītūūlīle lūmeng'ho lwa sīīlī ya ntemi. Nguno mhayo gose gose ūlū gwandīkwa mu lina lya ntemi hūna gūtūūlīlwa lūmeng'ho lwa sīlī ya ntemi gūtīko kūgalūchiwa.”

⁹Lītabītile ikanza bitanwa hangī a bandīki ba ntemi, mu lūshikū lwa makūmi abīlī n'idatū lwa ng'weji gwa kadatū, ng'weji gwa Sivani. Bandīka pyī īyo Modekai akalagīla kūlwa nguno ya Bayudaya, būbandīkīla a baanangwa ba ntemi, na a basugi, na a bana ng'oma pye a bose, a ba mu sī ījo igana na makūmi abīlī na mpungatī; kūfuma kū sī ya Bahindi, kūshisha Esiopia. Ī mihayo yenīyī īkandīkwa mu nuguta ja banhū ba būlī sī, na mu ndīmi ja banhū bose. Na a Bayudaya bandīkīlwa mu nuguta jabo na mu lūlīmi lwabo.

¹⁰Ū Modekai akandīka ī nyalūba jenījo mu lina lya ntemi Ahasuelo, ūjitūūlīla lūmeng'ho lwa sīīlī ya ntemi, hūna ūbatūma banhū būdamhīla falasa mheeji, ījo jatūmamīlagwa mu milīmo ya ntemi; būjitwala būlī kwene.

¹¹Ī nyalūba jenījo jalī ja kūbazunīlīja a Bayudaya mu būlī nzengo kwibilinga bilwīīlīle; kūbakenaagūla na kūbabūlaga na kūbamala gete banhū b'ihanga lyose lyose nūūlū sī yose yose abo balize na mabità gabo kūbadumīla a boi, nūūlū a bake babo na a baana babo. Na kūjisola ī sabo ja banishi babo.

¹²Ū lūshikū ūlo lūkasolwa kūlwa Bayudaya kwīta ū mhayo gwenūyū ū mu sī ījo jalī jisugilwe na ntemi Ahasuelo lwalī lw'ikūmi n'idatū mu ng'weji gw'ikūmi n'ībīlī, ū ng'weji gwa Adali.

¹³Aho yandīkwa ī mihayo yenīyo yūtwalwa mu būlī sī, gīkī shītwe kūbiza shilagīlo, hūna a banhū ba mahanga gose būmanīkījiwa, a Bayudaya bandya kwibeeja beeja kūlwa kwilwīlīīla ū mu lūshikū lwenūlo ū kū banishi babo.

¹⁴A banhū abo baalī batūmījiwa aho badamhīla ī falasa ja h'ikūlū, būja wangū kūlwa shilagīlo sha ntemi; nū mu nzengo ntaale ū gwa Susa shūfunyiwa ī shilagīlo shenīsho.

¹⁵Ū Modekai wīnga ū kū būtongi bo ntemi azwalīlile shizwalo sha nyatemi, sha langi ya būlulu na shape; na ngikili nhaale ya zahabu, na ng'hanjo ya nzulunge ya kitaani yawiza. Ū nzengo gwa Susa gokala mhūndū na yoge ya būyegi.

¹⁶Ū kū Bayudaya lyūbiza ikanza lya kūyega na kūzalabana, na kūtambīīla, n'ikūjo.

¹⁷Ū mu sī jose nī mizengo ī yose yabizaga ūlū shashika ī shilagīlo sha ntemi, ū kū Bayudaya bobizaga ho būyegi būtaale no na kūtambīīla, na shigukulu na mabina. Bingī kūfuma ū mu banhū ba mahanga būyiigalūcha kūbiza Bayudaya, nguno līkabagwīla ī lyogohya lya Bayudaya.