Read Sukuma Bible 2015 – Bibilia Ilagano Lya Kale 2015 Kūfuma 1 Bible Online

Kūfuma 1 - Sukuma Bible 2015 – Bibilia Ilagano Lya Kale 2015 bible

Kūfuma 1

¹Aya h'a mina ga bitūnja ba ng'wa Isilaeli abo bakasaamīla Misili hamò na saabo Yakobo, būlī ng'wene na kaya yakwe.

²Lubeni, Simioni, Lawī na Yuda;

³Isakaali, Zabuloni na Benjamini;

⁴Dani na Nafutali, Gadi na Asheli.

⁵A banhū a bose ū mu būbyīlebo ng'wa Yakobo baalī makūmi mpungatī; ū Yosefu ū ng'wene walī watonga ko ī Misili.

⁶Hanuma ya myaka kūbīta, ū Yosefu na a baana bang'wawe būzumalīka; kūshisha pye a banhū ba shibyalīlwe shenīsho būshila kūcha.

⁷Alīyo īkī a Baisilaeli baalī bibyaji no no no, bakakwīla kīngī nasho, kūshisha bookala hose pyī ū mu sī yenīyo.

⁸Kwimanīla watema ntemi mpya ū mu sī ya Misili, ūyo walī atang'witegelegije ū Yosefu.

⁹Hūna ūbawīla a banhū bakwe, “Bing'we a banhū benaba a Baisilaeli balīkwīla no, kūtūheeba a bise.

¹⁰Tūbachagūkagi, batizikala bongeja ū kūkwīla; nguno būlūgū būshikile kūbūūka, bisanja kū lwandī lwa banishi bise, būūlwa nise, būpandīka ng'wanya gwa kwīnga ū mu sī īyī.”

¹¹Na lūūlū bandya kūyūbatūmamya milīmo midito, būbatūūlīla banhū ba kūbīmīīla ū mu būtūmami wabo; būnzengela ū Falao mizengo ya Pitomu na Lamesesi, ya kūbīkīla sabo jakwe.

¹²Alīyo nūūlū īkī a Baisilaeli baluhiagwa gīko, nahene bongejaga dūhū ū kūkwīla, na kūtang'anha hose pye, kūshisha a Bamisili būbogoha no; hūna bongeja

¹³Ū kūbadidoheja ī milīmo yabo.

¹⁴Babaluhyaga no; nīyo ū būpanga wabo būbiza mu makoye mataale, kūlwa būdito bo milīmo ya kūluba būlongo na kūbeeja madafaali, na milīmo ya kū malaale. A Bamisili babatūmamyaga a Baisilaeli pyī ī milīmo yabo mu wiboneeji būtaale no.

¹⁵Wanoga nose ū Falao ūbitana ba Shifula na Pua, bakīma ba Shihebulania, abo baalī na nīmo gwa kūbagunanha babyīle ng'wikanza lya kwitūūla; ūbawīla gīkī,

¹⁶“Ūlū mulībagunanha kwitūūla a bakīma ba Shihebulania, ng'ūlola chiza. Ūlū ng'ūbona gīkī ū ng'wana ūyo alībyalwa ngosha, mūlagagi; ūlū nkīma nekagi ikale mpanga.”

¹⁷Alīyo īkī a bagunanhi benabo baalī bang'ogohile Mulungu, batīītile ūmo akabalagīīlīla kwīta ū ntemi wa Misili; būyūbaleka a baana a bagosha bikala bapanga.

¹⁸Hūna ū ntemi wa Misili ūbitana a bakīma benabo ūbabūūja, “Nibūlī mulīyūbaleka na a baana a bagosha bikala bapanga? Mhayo kī gūlīng'wenheleja ng'wīte gīko?”

¹⁹A bakīma benabo būnshokeja ū Falao, “A bakīma ba Shihebulania batī gīt'ūmo balī a Bamisli a bakīma; a bene balī na nguzu no, a bagunanhi ūlū balīshika ho bakabasangaga bamalaga kūbyala.”

²⁰Kūlwa mhayo gwenūyo, ū Mulungu akabīītīla yawiza a bagunanhi benabo; nabo a banhū bongeja ū kūkwīla.

²¹Na lūūlū īkī a bagunanhi benabo baalī bang'ogohile ū Mulungu, nang'hwe akabinha kaya jabo benekīlī.

²²Hūna ū Falao ūbakomeleja pye a banhū bakwe alīhaya, “Būlī ng'wana ūyo ūbyalwa, ūlū ngosha nsolagi mukamponye mu mongo; ū nkīma nekagi ikale mpanga.”