Read Sukuma Bible 2015 – Bibilia Ilagano Lya Kale 2015 Kūfuma 13 Bible Online

Kūfuma 13 - Sukuma Bible 2015 – Bibilia Ilagano Lya Kale 2015 bible

Kūfuma 13

¹Hanuma ya henaho, ū SEEBA ūng'wīla ū Musa gīkī,

²“Basolanhyage pye a babyalwa ba kwandya a bagosha, ūbeeje babize bane.[10] Būlī ng'wene ū wa kūhangūla nda ya ng'wa nina ū mu Baisilaeli alī wane; abize munhū nūūlū gūbize ntugo.”

³Hūna ū Musa ūbawīla a banhū, “Lwizūkagwi ū lūshikū lwenūlū, ū lūshikū lwa kwīnga kwing'we mu sī ya Misili, ī sī ya būsese. Ū lwenūlo lūlī lūshikū lwa ng'wa SEEBA kūmufunya ū mu sī yenīyo na nkono gwa būdūla būtaale; na lūūlū yaya kūlya shose shose īsho shilī na shibimbya.

⁴Ī lelo yenīyī hū mulīnga, ū mu ng'weji gwenūyū gwa Abibu.

⁵Ū SEEBA ūlū ūmushisha ū mu sī īyo wabilahīlīla bakūlūgenji bing'we gīkī akūng'winha, ī ya Bakanaani, Bahītī, Baamoli, Bahīvī na Bayebusi, ī sī ya būhondo yakūsūlūlūka būki na mabeele; shiigelile mugūdīlīle gete ū mhayo gwenūyū, muyūbeeja shigukulu ū mu ng'weji gwenūyū.

⁶Muyūlya migatī ītī na shibimbya ikanza lya shikū mpungatī, hūna ū lwa mpungatī lwabiza lūshikū lūtaale kūlwa ng'wa SEEBA.

⁷Ī shikū mpungatī jenījo jibize ja kūlya migatī ītī na shibimbya, shitiziziilonga shikolo shose shose ū mu bing'we īsho shilī na shibimbya. Nīyo ī shibimbya shitiziziilonga hose hose nūūlū hado ū mu sī ying'we.

⁸Ū mu lūshikū lwenūlo ng'wīlage ū ng'witūnja wako gīkī, ‘ī yenīyī nakwīyītaga kūlwa mihayo mitaale īyo SEEBA akanīītīla ū nene aho nalīnga mu sī ya Misili.’

⁹Ū mhayo gwenūyū ū kūlī bebe gūbize gītī lūmeng'ho ha nkono, nūūlū shiizūkījo kū būshū wako, gīkī ī shilagīlo sha ng'wa SEEBA īkwigeleelilwe wikale ūkūshitūmamīlaga gwa, ū mu kalūngalūngīle kako. Nguno ū SEEBA wakwīngije ū mu Misili na nkono gwakwe gwa būdūla.

¹⁰Ū mhayo gwenūyū gūdīlīlage, ūlīlagīlwa kwizūkwa kūgwīta būlī ng'waka a makanza gīt'aya.”

¹¹Ū SEEBA ūlū ūkūshisha ū mu sī ya Bakanaani, hūna ūkwinha yūbiza yako, gīt'ūmo wabisagīgīja bakūlūgenji bako mu kwilahīla,

¹²pye a babyalwa bako a ba kwandya ūkūbisaaba gīkī balī beela kūlwa ng'wa SEEBA. Nī mbyalwa ja kwandya ū mu mitugo jako jilī ja ng'wa SEEBA ī jose.

¹³Būlī nzobe ī ya kwandya kūbyalwa īkomoolage na ng'wana wa ng'holo; alīyo ūlū ūtatogilwe ū kwīkomoola, ībūlagage,[11] ū mu baana bako a baatangī, būlī ng'wana ū ngosha nkomoolage.

¹⁴Ū kū shikū ja kū būtongi, ū ng'witūnja wako ūlū ūkūbūūja gīkī, “Ū mhayo gwenūyū gūlī na makūlū kī?” Ng'wīlage, “Ū SEEBA akatwīnja mu sī ya Misili na nkono gwa būdūla, ūtūfunya mu sī ya būsese.

¹⁵Ū Falao walī walema gete na makaala ū kūtūzunīlīja ū kwīnga, hūna ū SEEBA ūbabūlaga pye a babyalwa ba kwandya ū mu Misili; a ba banhū, nī mitugo ī mbyalwa ja kwandya. H'ī nguno yene nakashifunyaga pyī ī sha kwandya kūbyalwa, shabiza shitambò kūlī SEEBA; hama a babyalwa bane ba kwandya a bagosha nakabakomoolaga.”

¹⁶Ū mhayo gwenūyū gūkūbiza gītī lūmeng'ho ha nkono gwako, nūūlū shimanīkījo kū būshū wako, gīkī ū SEEBA akatwīnja ū mu sī ya Misili na nkono gwakwe gwa būdūla.

¹⁷Na lūūlū ū Falao aho wabazunīlīja a banhū baje, ū Mulungu atabatūngīīgije kū nzīla ya kūbīta mu sī ya Bafilisiti, nūūlū īkī ī yenīyo yalī nguhī. Nguno ū Mulungu akahaya, “Ūlū būpamanya na būlūgū, badūgije kūgalūcha a maganiko būshoka hangī Misili.”

¹⁸Hūna lūūlū, ū Mulungu ūbabītya a banhū benabo kū nzīla ya kwipīndīīla, ūbabītīja kwitogolo lya kūjīlīīla kū Nyanza Yaza.[12] A Baisilaeli aho balīja, baaja bamanukile nūūlū kūmanhya na būlūgū.

¹⁹Ū Musa ūgasola na a maguha ga ng'wa Yosefu, nguno ū Yosefu walī wabilahīja a Baisilaeli ūbawīla, “Namanile hape gīkī ū Mulungu akūmugeniha ang'wīnje ū ng'wenūmu; alilūūlū, mukūgabūūcha na a maguha gane muje nago.”

²⁰Aho bīnga Sukoti, bakaja būūkakoma ng'hambī Etamu, kūko n'itogolo ikalamūku.

²¹Ū SEEBA hū ng'wene wabatongeelaga ī nzīla; ī līīmi walī mu ng'hīngī y'ilunde, al'ī būjikū mu ng'hīngī ya moto kūlwa kūbatwimīla ū mu nzīla; badūle kūshimīza līīmi na būjikū.

²²Ī ng'hīngī y'ilunde īyo yabatongeelaga ī līīmi a banhū benabo, ītīngile ū kū būtongi wabo, pyī nī ya moto ī būjikū.