Read Sukuma Bible 2015 – Bibilia Ilagano Lya Kale 2015 Kūfuma 17 Bible Online

Kūfuma 17 - Sukuma Bible 2015 – Bibilia Ilagano Lya Kale 2015 bible

Kūfuma 17

¹Ī libità lya Baisilaeli ī lyose lyūshimīza kwīnga ū ng'witogolo lya Sini, būja bakūsaama saamaga gīt'ūmo walī wabalagīīlīlaga ū SEEBA. Būshika ipandī litanagwa Lefidimu būtūūla ng'hambī, kwike gaalī gatīho a minzī ga kūng'wa a banhū.

²Hūna lūūlū bandya kūnkoya ū Musa balīng'wīla, “Twinhage minzī ga kūng'wa.” Nang'hwe ū Musa ūbawīla, “Nibūlī mulīnisayīla nene? Nibūlī mukwikalaga ng'ūngema ū SEEBA?”

³Alīyo īkī a banhū baalī bakolwa notà aho balī henaho, bakankoya no ū Musa; būyūng'wīla, “Nibūlī ūkatwīnja ī Misili na a baana bise, nī mitugo jise kwiza kūtūbūlaga na notà?”

⁴Hūna ū Musa ūnītīīla ū SEEBA alīhaya, “Nabīītīle mhayo kī a banhū benaba? Nguno balī hihī kūniponda mawe.”

⁵Ū SEEBA ūng'wīla ū Musa, “Balekage henaho a banhū, ūtongele kū būtongi ū bebe. Solaga na banamhala bamò na bamò ū ng'wibità lya Baisilaeli, ūgūsole nū nang'ha ūyo ūkatūlīla mongo gwa Nile; hūna ūje.

⁶Ūlū ūlashike Holebu līlīko itale, ū nene nakwīmīīla hamò nang'ho bbihī nalyo ī litale lyenīlo; ūkūlītūla gafume mo minzī, bang'we a banhū.” Na ng'hana ū Musa ūgwīta ū mhayo gwenūyo mu būtongi wa banamhala ba Baisilaeli.

⁷Ī lipandī lyenīlo ūlitana Masa na Meliba nguno a Baisilaeli bakankoya ho a henaho, nīyo nū SEEBA bakangema balīhaya, “Ū SEEBA alī hamò nise, nūūlū yaya?”

⁸Kwitulwa Baamaleki biza kūbadumīla a Baisilaeli aho balī Lefidimu.

⁹Ū Musa ūng'wīla Yoshwa, “Bebe solaga bagosha bamò na bamò ū mu bise, ūje ūkilwishe nabo a Baamaleki. Ū nene ī ntondo nakwīmīīla kwigūlya ya lūgūlū, nagūdimīīlile mu nkono ū nang'ha go ng'wa Mulungu.”

¹⁰Na ng'hana ū Yoshwa ūja ū kwilwisha būlūga nabo a Baamaleki gīt'ūmo Musa akanagīīlīla; ū wei ū Musa ūlinha kwigūlya ya lūgūlū, hamò na ba Alooni na Huuli.

¹¹Ū Musa ūyūbiza ūlū wabūūcha ng'wigūlya a makono gakwe, a Baisilaeli bapyena, alīyo ūlū wagicha a makono, a Baamaleki bapyena.

¹²Ū Musa aho wanoga, begeleja iwe, būntūūlīla hasī ūligasīja. A ba Alooni nū Huuli būgadimīīla a makono gakwe bagabūūkije ng'wigūlya, ūmò nkono ūyū ūngī ū gūngī; a makono gakwe gikala ng'wigūlya kūshisha lyūloka ī līīmi.

¹³Na lūūlū ū Yoshwa ūbapyena a Baamaleki na būūgī bo līlūshū.

¹⁴Hūna ū SEEBA ūng'wīla ū Musa, “Gūyū mhayo gwandīkage mu shitabo, a banhū bikale bagwizūkilwe; hama ū Yoshwa ūnsomboolele mu welwa ng'holò agūdime. Nguno a Baamaleki nakūbapyagūla bashile gete ū mu sī.”

¹⁵Ū Musa ūzenga ng'walīlò; ūgwinha lina lya, “Ū SEEBA alī lūbembeela lwane.”

¹⁶Nguno akahaya, “Makono gaalī gabūūchiwe kū būtongi w'isumbī lya būtemi lya ng'wa SEEBA. Ū SEEBA akūbiza na būlūgū nabo gwa a Baamaleki kūfuma shibyalīlwe kūshisha shibyalīlwe.”