Read Sukuma Bible 2015 – Bibilia Ilagano Lya Kale 2015 Kūfuma 18 Bible Online

Kūfuma 18 - Sukuma Bible 2015 – Bibilia Ilagano Lya Kale 2015 bible

Kūfuma 18

¹Ū Yesilo ūyo walī ngabīji wa Midiani na nkwīye o ng'wa Musa, akigwa pyī īyo Mulungu walī wang'wītīla ū Musa na a banhū bakwe a Baisilaeli, nū mumo ū SEEBA akabīngīja a Baisilaeli ī Misili.

²Ū Musa walī wantūma kūja kaya ū nke wakwe ū Sipola; nang'hwe ū Yesilo ū nkwīye o ng'wa Musa ūnsola,

³hamò na a bitūnja bakwe a babīlī. Ūmò witanagwa Gelishomu, nguno ū Musa akahaya, “Naalobelile mu sī ya kūle.”

⁴Ū ūngī walī wang'wilīka ī lina lyakwe, Eliezeli; nguno akahaya, “Ū Mulungu o ng'wa baba walī ngunanhi wane, hū ng'wene akanipīja kwīnga mu nhabaala ya līlūshū lya ng'wa Falao.”

⁵Na lūūlū ū Yesilo, ū nkwīye o ng'wa Musa wiza hamò na a bitūnja bakwe ū Musa, nū ninaabo; būnsangīla kwitogolo ūko walī watūūla ng'hambī, bbihī na lūgūlū lwa ng'wa Mulungu.

⁶Ū Yesilo ūtūma nhūng'wa kūhaya, “Nene Yesilo nkwīyo nalīkūgeniha, nalī nang'hwe nū nke wako, hamò na a bitūnja bako būbīlī wabo.”

⁷Na lūūlū ū Musa ūfuma hanze kūjūnsūng'wanha ū nkwīye; ūshika winama ūmo shalī shīmīle sha koolecha ikūjo, hūna ūmbipa. Hanuma ya henaho bigīsīlīja ī mhola jabo, hūna bingīla ng'wiheema.

⁸Ū Musa ūng'wīla ū ise būkwi pyī ī yose, īyo SEEBA walī wang'wītīla ū Falao na a Bamisili kūlwa kūbalwīlīīla a Baisilaeli. Ūng'wīla nī ya mihayo ī midito īyo baalī bamanhya nayo ū mu nzīla, nū mumo akabapīgīja ū SEEBA ū mu yose yenīyo.

⁹Ū Yesilo akayega no ū kwigwa pyī ī yawiza īyo SEEBA walī wabīītīla a Baisilaeli, kūlwa kūbapīja kūfuma mu nkono gwa Bamisili.

¹⁰Ūhaya, “Akumīlījiwe ū SEEBA ūyo wamupīgije mu nkono gwa Bamisili na go ng'wa Falao, ūbakomoola a banhū kūfuma ū mu nkono gwa Bamisili.

¹¹Ī haha lūūlū nadeeba gīkī ū SEEBA ntaale kūtinda bamulungu bose, nguno wagwītile ū mhayo gwenūyū kū banhū abo babīītīlaga yabūbi a Baisilaeli mu kwikumīlīja.”

¹²Hūna ū Yesilo ū nkwīye o ng'wa Musa ūmfunīja ū Mulungu shitambò sha kūpemva; nū Alooni wiza hamò nabo pye a banamhala ba Baisilaeli, kwiza kūlya nang'hwe shilīwa ū ise būkwi o ng'wa Musa, kū būtongi bo ng'wa Mulungu.

¹³A ha ntondo yaho ū Musa wigasha, wandya kūbalamula a banhū; a banhū bīmīīla bampīdije ū Musa kwandīja dilū kūshisha mhīndī.

¹⁴Ū nkwīye aho wībona pyī īyo wabīītīlaga a banhū; ūhaya, “Bebe ūlībīītīla mhayo kī a banhū? Nibūlī ūkwigashaga kūlamula iyene dūhū, hūna a banhū benaba pye a bose balocha līīmi bīmīīlile bakūpīndije?”

¹⁵Ū Musa ūnshokeja, “Nguno a banhū bakwizaga kūlī nene kūkooba būlamuji bo ng'wa Mulungu.

¹⁶Būlī ikanza ūlū bilemeelwa, bakizaga kūlī nene nafunya būlamuji ha gatī ya munhū na munhū; hūna nabinha na katongeelele ka ng'wa Mulungu, nī shilagīlo shakwe.”

¹⁷Ū ise būkwi ūnshokeja, “Ūyo ūlīgwīta gūtī gwawiza.

¹⁸Ū bebe na a banhū benaba bakwizaga kūkūbona, ī ng'halīlo yaho mukwifulamya. Ū nīmo gwenūyū ndito no, ūtūdūla ū kūgūbbyeedecha iyene.

¹⁹Na lūūlū nidegelekage nakwinhe būūbū būganikīji, nū Mulungu abize hamò nang'ho. Ū bebe bizaga ha gatī ya ng'wa Mulungu na a banhū benaba; ī mihayo yabo ūyīīshisha ū bebe ū kūlī Mulungu.

²⁰Ūbalanga ī mbika ja kajīle nī shilagīlo; ūboolekeja ī nhūngwa ja kikalīle a kawiza, nī milīmo īyo ībigelile kwīshikīlīja.

²¹Alīyo ū mu banhū benaba, solanhyaga banhū ba būdūla, banhū abo bang'ogohile Mulungu hangī basanyiwa, na balemile kūhongwa. A benabo hū batūūlage babize bataale ba mabità ga banhū, ū wa shihūmbī, ū w'igana, ū wa makūmi atanò, na a b'ikūmi ikūmi.

²²A benabo binhage ū nīmo gwa kūyūbalamula a banhū ū mu mihayo ya būlī lūshikū. Ū bebe bayūkwenhela ī mihayo ī midito dūhū; ī mido mido bayīdīlīla boi. Ū mu gīko gūkūbbūpa ū nigo gwako; nguno bakūkūgunanha ū kūgūbūūcha.

²³Ūlū wīta ūmo nalīkūwīlīla nū Mulungu ūlagīla chene, ūkūbiza na nguzu ja kūdūla kūgwīta ū nīmo gwenūyū. Hama na a banhū benaba pye bakūyūshoka ū mu kaya jabo bifuulaga ū mu maganiko.”

²⁴Ū Musa akang'wigwa ū ise būkwi, wīta pyī īyo akanganikīla;

²⁵Ūsola banhū abo baalī na būdūla kūfuma ū mu Baisilaeli, ūbatūūla ha būtaale wa mabità ga banhū, ū wa shihūmbī, ū w'igana, ū wa makūmi atanò, na a b'ikūmi ikūmi.

²⁶A benabo hū būyūbalamula a banhū ū mu mihayo ya būlī lūshikū; ī mihayo ī midaamu dūhū h'īyo būyūng'wenhela ū Musa, alīyo ī minogu, būyūyīmala boi.

²⁷Na lūūlū ū Musa akīīta ūnshindīkīla ū ise būkwi, ūshoka kaya kū sī yakwe.