Read Sukuma Bible 2015 – Bibilia Ilagano Lya Kale 2015 Kūfuma 19 Bible Online

Kūfuma 19 - Sukuma Bible 2015 – Bibilia Ilagano Lya Kale 2015 bible

Kūfuma 19

¹Aho yashika myeji idatū kūfuma kwīnga kwabo Misili a Baisilaeli, ū mu lūshikū lwa kūshikīīla ī likanza lyenīlo, būshika ng'witogolo lya Sinai.

²A Baisilaeli aho bīnga ī Lefidimu, bakashimīza būūkashika ng'witogolo lya Sinai; na lūūlū a banhū benabo būtūūla ng'hambī yabo bbihī na lūgūlū, ū ng'witogolo lyenīlo.

³Hūna ū Musa ūlinha ū mu lūgūlū kūhoya na Mulungu; nang'hwe ū SEEBA ūng'witana kūfuma ū mu lūgūlū lwenūlo, ūng'wīla, “Ī mihayo īyī ūkūbawīla a banhū ba numba ya ng'wa Yakobo, ūkūbasomboolela a baana ba ng'wa Isilaeli gīkī,

⁴‘Bing'we benekīlī ng'wabonile ūmo naabīītīlile a Bamisili, nū mumo naamubūūkīgije na manana ga ng'hoonà nūng'wenha kūūnū kūlī nene.

⁵Na lūūlū ūlū ng'ūniigwa gete ū nene, nī lilagane lyane ng'ūlīdima, ū mu mahanga gose na gose mukūbiza sabo yane ya mpango ntaale no.

⁶Na ng'hana ī sī pyī ī yose īlī sabo yane, alīyo a bing'we mukūbiza ū kūlī nene būtemi wa bagabīji, n'ihanga lyeela,’ ī mihayo yenīyī h'īyo ūkūbawīla a Baisilaeli.”

⁷Hanuma ya henaho ū Musa ūshoka, wiza ūbakuminga a banamhala ba banhū ūbasomboolela pyī ī mihayo īyo SEEBA akankomeleja kūbawīla.

⁸A banhū a bose būshosha balīhaya, “Tūkwīyīta pyī īyo wīhayaga ū SEEBA.” Ū Musa ūnshokeja ū SEEBA ī lishosho lyabo.

⁹Hūna ū SEEBA ūng'wīla ū Musa, “Nakwiza ū kūlī bebe ng'wilunde idito, bigwe a banhū nalīhoya nang'ho, bakūsanye shikū jose.” Hūna ū Musa ūng'wīla ū SEEBA īyo bakahaya a banhū.

¹⁰Ū SEEBA ūng'wīla ū Musa, “Jaga ū kū banhū ūkabeeje ī lelo nī ntondo, ūbakomige bafule ī shizwalo shabo.

¹¹Bamalīīle balinde lūshikū lwa kadatū kwīngīīla lelo, nguno ū mu lūshikū lwenūlo ū SEEBA akwika ū mu lūgūlū lwa Sinai kū būtongi wa banhū bose.

¹²Tūūlaga lūbīmbī kūlūpīndīlīja ū lūgūlū, hūna ūbawīle gīkī, ‘Ilang'hanagi mutizūlinha ū mu lūgūlū, nūūlū kūlūkuumya dūhū aho lwandīgije yaya; ose ose ūyo ūlūkuumya akūbūlagwa ng'hana gete.

¹³Akūpondwa mawe, nūūlū kūlaswa masonga; kwike atūkuumiwa na nkono gwa munhū. Atūlekwa ikale mpanga, abize munhū, nūūlū gūbize ntugo,’ ūlū lyūfuulwa ipembe[13] lya kūng'ang'aala ikanza ilīhu, bakwiza ū kū lūgūlū.”

¹⁴Ū Musa aho wīnga ū mu lūgūlū, ūja ū kū banhū kūbawīla biyeeje, bafule nī shizwalo shabo.

¹⁵Hūna ūbawīla, “Igolanyagi chiza mumalīīle kūlwa lūshikū lwa ntondo būngī; yaya ū kūlaala na a bake bing'we.”

¹⁶Ī dilū ya lūshikū lwa kadatū lwaho, lyūbiza ho ilunde idito a ha lūgūlū, na būpalalūki na ndabi; n'ilaka lya higūlya ly'ipembe itaale, būlī munhū ū mu ng'hambī akayūdetema.

¹⁷Hūna ū Musa ūbafunya a banhū ū mu ng'hambī, ūbatonga kūjūmanhya nū Mulungu; būshika bīmīīla aho lwandīgije ū lūgūlū.

¹⁸Ū lūgūlū lwenūlo ū lwa Sinai lwalī lwakundīkījiwa lyochi, nguno ū SEEBA walī wika hoi mu moto, ī lyochi lidosaga kūja ng'wigūlya gītī līlīfuma mu liiko; pyī ū lūgūlū lūyūtingina kīngī nasho!

¹⁹Ī lilaka ly'ipembe aho lyongeja kūbiza lya higūlya, ū Musa wandya kūyomba; nū Mulungu ūnyombya n'ilaka.

²⁰Ū SEEBA akika ū mu lūgūlū lwa Sinai, ūng'witana ū Musa alinhe mo; ng'hana ū Musa ūlinha ū mu lūgūlū.

²¹Hūna ū SEEBA ūng'wīla ū Musa, “Jaga ū kū banhū ūkabahūgūle batizūgima kūlinha kwiza kūmona SEEBA, nguno bakwenheleja banhū bingī bashile kūcha.

²²Na a bagabīji abo balegeela kūlī SEEBA ni biyeejage tame, būtizūbihoolekela ū būpelanu bokwe.”

²³Ū Musa ūng'wīla ū SEEBA, “A banhū batūdūla ū kwiza ū mu lūgūlū lwa Sinai, nguno bebe ng'wenekīlī watūhūgūlile ūtūwīla, ‘Tūūlagi mbīmbī ja kūlūpīndya ū lūgūlū; mulūkomanye lūbize heeke, nguno lūlī lwela.’”

²⁴Ū SEEBA ūshosha, “Jaga ko ūkize nū Alooni, alīyo a bagabīji na a banhū batizūgima kwiza ū kūlī SEEBA, būtizūbihoolekela ū būpelanu bokwe.”

²⁵Na lūūlū ū Musa ūja ū kū banhū ūūkabawīla ī yenīyo.