Read Sukuma Bible 2015 – Bibilia Ilagano Lya Kale 2015 Kūfuma 22 Bible Online

Kūfuma 22 - Sukuma Bible 2015 – Bibilia Ilagano Lya Kale 2015 bible

Kūfuma 22

¹“Ūlū munhū wiba ng'ombe nūūlū ng'holo hūna wīsīnza nūūlū wījinja, ī ng'ombe yenīyo akwīlīpa ng'ombe itanò; ī ng'holo ī yene akwīlīpa ng'holo inè.

²Ū ng'wibi ūlū ūding'wa aliba hūna ūbūlagwa, ūyo ūmūlaga atūbalīlwa nsango gwa būbūlagi.

³Alīyo ī līīmi ūlū lyamalaga kūfuma, akūbalīlwa nsango gwa būbūlagi. Ū ng'wibi īng'wigeleelilwe kūshilīpa īsho wibaga, ūlū atī na sha kūlīpa, ajinjiwe shilīpwe īsho walī wibaga.

⁴Ū ntugo gwa kwiba; ībize ng'ombe, nūūlū nzobe, nūūlū ng'holo, ūlū gūbonwa alī nago ū ng'wibi gūtaalī mpanga, īkūng'wigeleelwa kūlīpa ng'hangala ibīlī.

⁵Ūlū munhū alīdīīma mitugo jakwe mu ngītīli, nūūlū mu ng'hilimva ya ngunda gwa mizabibu, hūna wilendeja jūkigumīīla mu ngītīli ya bangī, akūlīpa kūfuma ū mu shawiza īsho alī nasho mu ngītīli yakwe, nūūlū ū mu ngūnda gwakwe gwa mizabibu.

⁶Ūlū moto gūbaka hūna gūkūla būbiza būpī, būja būkūligimaga sagala mu masaka, būūkapemba na shise sha būsīga, nūūlū būsīga būtaalī kūgeswa, nūūlū igoobe igima, ūyo wagūbachaga ū moto gwenūyo shiigelile alīpe.

⁷Ūlū munhū ūng'winha nzenganwa ng'wiye hela jakwe nūūlū sabo jingī, gīkī anang'hanīje, hūna jiiwa ū mu numba ya nzenganwa ng'wenūyo, ū ng'wibi ūlū ūding'wa akūlīpa ng'hangala ibīlī.

⁸Alīyo ū ng'wibi ūlū atilongile, ū ng'wenekīlī numba ashishiwe kū būtongi wa balamuji, īmanīke ūlū ninga hamo wakuumije nkono gwakwe a ha sabo ya ng'wiye.

⁹Mbika jose ja wihalalīja kūlwa shikolo sha kūjimīīla, gītī ng'ombe, nzobe, ng'holo, shizwalo; nūūlū shikolo shingī shose shose īsho munhū alīhaya gīkī, ‘ī shenīshi shane;’ abo balihalalīja benabo shibigelile kwīshisha kū balamuji ī halalī yabo. Ūyo alabonekane ū kū balamuji gīkī ng'hūbi, īkūng'wigeleelwa kūnīpa ū ng'wiye ng'hangala ibīlī.

¹⁰Ūlū munhū ūbilisa kūlī ng'wiye ntugo gwakwe gītī nzobe, ng'ombe, ng'holo, nūūlū ntugo gūngī gose gose, gīkī alang'hanījiwe hūna gūcha, nūūlū gūpandīka makoye gangī gangī, hamo kwīnjiwa aho banhū batamanile;

¹¹Ū mhayo gwenūyo gūkūgoloolwa a ha gatī ya banhū benabo mu nzīla ya kwilahīla kū būtongi bo ng'wa SEEBA, gīkī ū mililsīlwa atakuumije nkono gwakwe a ha sabo ya ng'wiye. Ū ng'wenekīlī akūgwanukūla ū mhayo gwenūyū, na ndūhū kūlīpīlwa.

¹²Alīyo ū ntugo ūlū gwiwa kūfuma a halī milisīlwa, akūnshokeja ū ng'wenekīlī sabo.

¹³Ū ntugo gwenūyo ūlū gūding'wa mashiinū, akūgenha a masaajiwa ooleche būkaanīji, hūna atūlīpiwa ū ntugo ūyo gwaliiwe mashiinū gwenūyo.

¹⁴Ūlū munhū ūlanda ntugo kūfuma kūlī nzenganwa ng'wiye, hūna gūpandīka makoye, nūūlū gūcha ū ng'wenekīlī atīho, ū nandi akūlīpa.

¹⁵Alīyo ūlū alīho ū ng'wenekīlī ntugo, ū nandi atūlīpa. Ū ntugo gwenūyo ūlū gwalī gwagoodishiwa, ī sabo ya kūgoodisīja īkūbalwa gīkī yigelaga ū kūgūlīpa ū ntugo gwenūyo.”

¹⁶“Ūlū munhū ūnkanya munhya hūna ūlaala nang'hwe alīyo ataanūngije,[16] akūnkwa antoole, abize nke wakwe.

¹⁷Kwike ū ise wa ng'wanikī ashikile kūlema ū kūnzunīlīja ū kūntoola, alīyo nahene akūlīpa dūhū ī sabo kūlenganīla nū mumo bakakwelagwa a banhya a bibembu.

¹⁸Yaya kūneka nkīma nogi ikale mpanga.

¹⁹Ūlū munhū ose ose wīta būjingi na shiinū, shiigelile abūlagwe.

²⁰Ose ose ūyo ūfunya shitambò kūlī mulungu ūngī, ūlū ītī kūlī SEEBA, shiigelile abūlagagwe.

²¹Ū nobeji ūyo alī mu sī yako yaya kūng'wītīla yabūbi, nūūlū kūnuhya; nguno ning'we ng'walī balobeji mu sī ya Misili.

²²Yaya kūng'wiboneela nkīma nchīlwa, nūūlū nīgīnī mpīna.

²³Nguno ūlū wīta gīko bakūnilīlīīla, nane nakūbigwa ū kūlīla kwabo.

²⁴Hūna ū būpelanu bone būkūbaka namubūlage na līlūshū, ning'we a bake bing'we babize bachīlwa, na a baana bing'we bagayiwe a basaabo.

²⁵Ūlū ūmò wa banhū bane abo balī na makoye ūlanda hela kwīnga kūlī bebe, ūtizūbiza gītī munhū wa byashala; yaya kūnomba na mbyalīlwa ja solobo.

²⁶Ūlū ūsola ng'wenda gwa ng'wiyo gīkī gūbize ndiimīli,[17] nshokejage aho līīmi lītaalī kūloka.

²⁷Nguno ū ng'wenda gwenūyo h'ūyo akikumbaga ū mīlī gwakwe. Ūlū alī nago gwenūyo dūhū, numho akwikumba kī? Ū ng'wenūyo ūlū ūnilīlīīla ū nene, nakwigwa nguno nalī na shigongo.

²⁸Yaya kūnsondagūla Mulungu, nūūlū kūndūka nsugi wa banhū bako.

²⁹Yaya ū kūdīla kūfunya a manong'ho ga kwīnga mu shiseme sha magesa gako, nūūlū kūfuma mu mabīkīlo gako ga divai. Shiigelile ūninhe nene a baana bako a bagosha a baatangī.

³⁰Ītaga gīko nū mu mbyalwa ja kwandya ja ng'ombe jako, pyī nī ng'holo. Ūkūjileka na baninaajo ikanza lya shikū mpungatī, hūna ū mu lūshikū lwa kanaane ūninhe nene.

³¹A bing'we mulī banhū beela ū kūlī nene, na lūūlū yaya ū kūlya ī ndimu ūlū jisaasagūlilwe mashiinū, ng'ūjiponeja mawa ī jenījo.”