Read Sukuma Bible 2015 – Bibilia Ilagano Lya Kale 2015 Kūfuma 23 Bible Online

Kūfuma 23 - Sukuma Bible 2015 – Bibilia Ilagano Lya Kale 2015 bible

Kūfuma 23

¹“Yaya kūkumūcha mihayo ya būlomolomo; yaya gete nūūlū kūbiza nkaanīji ng'hūnga kūlwa kūngunanha nkenaagūji,

²Nūūlū kūjananījiwa n'ibità lya banhū mu kwīta yabūbi, nī chene yaya. Ūlū ūlīfunya būkaanīji ng'wibanza, ūtizūbiza na būsangī na bachaamya ba mihayo ya būtūngīlīnja.

³Ū munhū ng'habī ūlū ūshishiwa ng'wibanza kūlwa būhūbi, ū bebe ūtizīchamya ī ng'hana ūkūngunījaga, īkī gīkī ng'habī.

⁴Ūlū ūbona ng'ombe nūūlū nzobe ya ng'wanishi wako īkūtagaalījaga mu matogolo sagala, ngunanhage ūntwalīle,

⁵nūūlū ūbona nzobe ya munhū atakūtogagwa yagwishiagwa nigo, ngunanhage ū kwīgūngūmūla; yaya ū kūnekanīja.

⁶Ū mu mabanza, yaya ū kwīchaamya ī ng'hana ya bahabī abo ūkwikalaga hamò nabo.

⁷Yaya kūmūūla munhū mu mhayo ūyo gūtī gwa ng'hana; hama ūtizūng'winha nsango gwa kūbūlagwa munhū ntūngīlīja ūyo atī ng'hūbi; nguno ū nkenaagūji natīko kwizunīlīja nang'hwe ū nene.

⁸Yaya kwanukūla būhongwa, nguno ū būhongwa būkabbokujaga miso ga banhū, na kūchaamya mihayo ya būtūngīlīja.

⁹Yaya kūnuhya munhū ū nobeji mu sī yako, a bing'we mugamanile a makoye ga kūlobela; nguno ning'we ng'walī balobeji mu sī ya Misili.”

¹⁰“A malaale gako galīmage na kūgesa, kūshisha ikanza lya myaka itandatū.

¹¹Alīyo ū ng'waka gwa mpungatī, galekage galaale gifuule; bayūbīta mo a bahabī abo balīmo ū mu sī yako baapūmbīīla ī shilīwa, nī ndimu ja mu mabbaala jiyūgwasha īsho shilīsaajiwa, ītaga gīko nū kū migūnda yako ī ya mizabibu, nī ya mizeituni.

¹²Ī milīmo yako tūmamaga mu shikū itandatū, alīyo ū mu lwa mpungatī yaya ū kūtūmama, ī nzīkū yako nī nzobe yako jipandīke kwifuula; nū nsese wako pyī nū nobeji, nabo bapandīke kwifuula.

¹³Dīlīlagi, ng'wīshikīlīje pyī īyo namuwīlaga; a mina ga bamulungu bangī yaya gete ū kūgahaya, gatizigwiwa kūfuma mu milomo ying'we nūūlū hado.”

¹⁴“Ng'hangala idatū ū mu ng'waka ūkwīta shigukulu kūlwa nguno yane.

¹⁵Lizūkagwe ī likanza lya migatī ītī na shibimbya. Ng'wikanza lya shikū mpungatī ūkūlya migatī ya būsu būtasangije shibimbya, gīt'ūmo nakakūlagīīlīla. Ū mhayo gwenūyū gwītage mu ng'weji gwa Abibu, ī likanza īlo līhelilwe; nguno ū mu ng'weji gwenūyo hū ūkafuma ū mu Misili. Atizigela wa kwiza kwiyoolecha kū būtongi wane alī makono dalali.

¹⁶Lizūkagwe nī likanza lya magesa, ī likanza lya matwajo ga kwandya ga shose īsho ūkalīmaga mu migūnda yako. Hama lizūkagwe nī likanza lya kūkuminga shilīwa kūshenha mu kaya kūfuma kū malaale, ī lya kūmalīīja milīmo ya ng'waka.

¹⁷Ng'hangala idatū ū mu ng'waka, pye a bagosha shibigelile kūshika kū būtongi bo ng'wa Seeba MULUNGU.

¹⁸Yaya kūnifunīja mininga ga shitambò hamò na shikolo shose shose īsho shilī na shibimbya. A mazezele ga shitambò sha mu lūshikū lwa shigukulu shane gatizūlekwa gakalaala kūshisha ntondo dilū.

¹⁹A matwajo ga kwandya ū mu shikolo īsho ūkalīmaga mu ngūnda, genhage mu numba ya ng'wa SEEBA Mulungu wako. Yaya kūzuga mbūli mu mabeelè ga ninayo.”

²⁰“Alilūūlū nalīntūma malaika wa kūmutongeela ū mu nzīla, aje hamò ning'we kūshisha ū kwipandī īlo namulongegije.

²¹Ng'wigwagi gete, hangī ng'wīdīlīle īyo akwīhayaga. Yaya ū kūbūlema ū būtongeeji bokwe, nguno atūmulekeja ū būhūbi wing'we; īkī alī na būdūla kūlwa lina lyane.

²²Ūlū ng'wīdegeleka chiza īyo akūmuwīla, na ng'wīta būlī mhayo ūyo nalīmulagīla, nakūbiza ng'wanishi wa banishi bing'we; nīyo a bilwisha bing'we nakwilwisha nabo nene.

²³Ū malaika wane akūja hamò ning'we amutongeelile, kūshisha amushishe ū mu sī ya Baamoli, Bahītī, Bapelizi, Bakanaani, Bahīvī na Bayebusi, abo nakūbapyagūla mo gete.

²⁴Yaya ū kūgema kwinama kū bamulungu babo nūūlū hado, nūūlū kūbalamya na kūshimīzīla mu shīmīle shabo. Ūkūbakenaagūla gete, na kūgabelagūla pye a mashikolo gabo ayo bakagalamyaga.

²⁵Ū bebe namyage SEEBA Mulungu wako, hūna ī jakwe jikūbiza hamò nī shilīwa shako na a minzī gako; na a mabūsaatu nakūkwīngīja.

²⁶Nīyo a makoye ga kūfundafunda nūūlū ga būgūmba, gatūbiza ho ū mu sī yako; nī shikū ja būlamu wako nakūjishikanya ī jose.

²⁷Nakūtūma lyogohya lyane lītonge ū kū būtongi wako, naginhe kūbbaha pye a mahanga ayo galayūkūchaama; hama a banishi bako nakūbīīta bakwinhīle ngongo bakūkūpeelaga.

²⁸Nakūtūma būkalasa būbapeeje a Bahīvī, Bakanaani na a Bahītī bakwīngīle ū mu nzīla.

²⁹Kwike natūbīnja pye a bose mu ng'waka gūmò, nguno ūlū nīīta gīko ī sī īkūgaya a banhū ūkwīlīlwe mashiinū.

³⁰Nakūbapeeja hado hado bakwīngīle, kūshisha ūkwīje a banhū ba kwīlang'hana ī sī.

³¹Hama ī mbīmbī jako nakūjitūūla nene; kwandīja kū Nyanza Yaza kūshisha kū Nyanza ya Bafilisiti, na kūfuma kwitogolo ikalamuku kūshisha kū Mongo. A banhū ba mu sī yenīyo nakūbatūūla mu makono gako, hūna ū bebe ūkūbapeeja.

³²Yaya kūgema kūtūūla būlagane nabo, nūūlū na bamulungu babo.

³³Yaya ū kūbaleka bikale ū mu sī yako, bakūkwenheleja kūnīītīla shibi ū nene, nguno a kalamīje ka kūbalamya bamulungu babo kakūbiza lūtu ū kūlī bebe.”